Actemaclha ningayoclha Dios
1 Yitnec maa ayinyemayaclha plata alyinmom, najan ayinyemayaclha oro alyinmom.
2 Tava apac hierro ayinyema congne lhopactic congno, cobre acyitna naysicsa mataymong.
3 Apsovjoc mataa enlhit apquitamsama asoc naysicsa yatescamalhma. Yoclhilhma mepqui apquileyvam enlhit apquilmetam malhic congno, tama acyivey apquilyiplaclho coning congne malhic.
4 Yoclhilhma mepqui apquileyvam enlhit apquilmetam malhic congno, tama acyivey apquilyiplaclho coning congne malhic.
5 Payjoc amyip apquimja trigo, congne malhic eyca apquilmaycam mataa talha.
6 Apquilvitac zafiros alyinmom naysicsa mataymong, najan oro alyinmom apquilvita.
7 Paj elvitac mocjam mama, paj colvitac mocjam yinic acyitnamaclha asoc acmamnave.
8 Am colvitac mocjam yamacmeyva najan asoc navjac as asoc acmamnave.
9 Apvanquic enlhit emetmoc inquilhe acyovoclhojo, malha apcaptama avjac aptomjac.
10 Malha mapa alhanaoc alyitsomalhca atamnic apquilmetam enlhit esovjam asoc acmamnave.
11 Apquilvitac maa actiyapmaclha yingmin vatsam, apquilvitac asoc colvitamalhca.
12 ¿Co laa ayinyema acyascamco ingvalhoc, najan ayinyema nintemaclha ningyascamco?
13 Paj coyitnac nipyesicsa enlhit as nalhpop, paj ongilyasamcoc acyanmongam, yoyam ongyinyoc ningilmam actemaclha ningyascamco.
14 Yitnec acpayvam yingmin océano: Paj coyitnac aso actemaclha ningyascamco. Yitnec acpayvam yingmin acvanyam: Paj colhnac así — intomjac maa.
15 Mongvanquejec ongyinyoc plata najan oro acyanmongam ningilmam acyascamco ingvalhoc.
16 Mongvanquejec ongyinyoc oro alyinmom, cornalina najan zafiro alyinmom.
17 Acmamnave anco, amcolhno oro najan memong anyi alyinmom, mongvanquejec ongilmoc.
18 Acmamnave anco actemaclha ningyascamco, am colhno coral, najan cristal, najan perlas alyinmom.
19 Acmamnave anco, am colhno crisólito co Etiopía, am colhno oro alyinmom.
20 ¿Co laa ayinyema acyascamco ingvalhoc, najan ayinyema actemaclha ningyascamco?
21 Paj colvitayac mataa asoc navjac, paj najan nata alimpay nitnoc anco.
22 Inlingalhquic inyicje amyaa — intomjac acpayvam ningitsepma najan singiltovascama.
23 Apyasamcoc Dios acyitnamaclha actemaclha ningyascamco, apyasamcoc actemaclha ningvitayclha maa.
24 Apvitac Dios aclhamoclhojo asoc as nalhpop, najan asoc aleyvam as nalhpop.
25 Aptimescasquic nic nat acyimnatem alhcajayam, najan nicjav'ayc yingmin acvanyam.
26 Apquillanac nic nat yipjopay najan acmamayaclha nalhit acnim najan yatepiyam.
27 Apvitac maa Dios actemaclha ningyascamco (acyascamco ingvalhoc). Apyipconquic nic nat Dios, apcanem nic nat acmamnave anco acyascamco ingvalhoc.
28 Aptomjac nic nat Dios apquilanya enlhit: Nintingyey Visqui ingac acvisay acyascamco ingvalhoc, ningyamasma nintemaclha acmasom acvisay ningyascamco inganco — nic nat aptomjac Dios.
© © Biblia en Enhlet (Lengua Norte) © Paraguayan Bible Society, 1995.
