Mocjam appayvam Job
1-2 Apcatingmavoc nic nat Job: Quip elaylhojo sicpayvam, cotnejic sat mactamilquisquiyam evalhoc coo.
3 Elaylhojo siclho actemaclha sicpayvam natamin apvancaac jelasmacsic mocjam.
4 ¿Naso ya sictipquiscama apvisay enlhit? Ayinayc coo paj. ¿Co laa ayinyema actamjaycam evalhoc coo?
5 Jelanojo siclho coo, elvanmac sat apquillinga sicpayvam, cotyamoc sat apquilvalhoc.
6 Impilhyinimquic mataa sicyovoclhojo ayinyema aclhanma evalhoc.
7 Visqui ingac apmasma apquilmapsomcaa, apquilvanacmo apquilyimnatem, ¿so actomja yi?
8 Apquilvanamyic mataa apquitquic najan aptovana apquilmolhama.
9 Apnam tingma apancaoc mepqui apquilay, mepqui apyanmongsayclha Dios apquiltemaclha apancaoc.
10 Inquileyvec vayqui inquinavo naysicsa anaymacoc vayqui, impalacmec mataa ayitcavoc.
11 Apquilnayvec sicaa, apquinincamco apno nipquesic apquitcavoc.
12 Inlingalhquic acpayvascama arpa, najan flauta, najan tambores naysicsa apquilnilhtingayclha najan apquiljalhyincayam apquitcavoc.
13 Impayjeclhec apquilvalhoc aclhamoclhojo acnim apquileyvam. Naysicsa actamilaycam apquilvalhoc comoc nelha apquileyvam, elatoynacpoc sat maa.
14 Apquiltomjac apquilanya: Am ongiltamjoc ongyiplovcasojo singanamaclha Dios.
15 ¿Naso ya apyimtlahnamo apanco yoyam, jingilanic nincoo, yoyam ongilmalhnam Dios? — apquiltomjac maa.
16 (Enlhit apquilmapsomcaa apquilanem elmiyovacpojo apanco. Am colhenac evalhoc actema nac jay.)
17 ¿Insapona ya calevascama apancaoc apquilmapsomcaa? ¿Apquillingamco ya acyanmongayclha apquiltemaclha apancaoc ayinyema Dios? ¿Ayinyema alhta aplom pac Dios?
18 ¿Apquilhpansacpe ya apquilmapsomcaa, malha alhcajayam ayimposcay paat acyamay? Ayinayc coo paj.
19 Yitne inyicje amyaa: Apquillingamcoc acyanmongayclha apquitquic, ayinyema apquiltemaclha apancaoc apyapmayc — intomjac amyaa. Incaymalhquic apyampayc apquilmapsomcaa colhic acyanmongseclho apquiltemaclha apancaoc.
20 Dios Visqui ingac eyanmongsiclhac sat aptemaclha apanco apyap apmapsom.
21 Natamin apquitsepma apquilyap, melhenejec sat mataa apquitquic najan apmolhama.
22 (¿Soc enlhit apmopvan eyascasingvomoc Dios, aptomja apyicpilquemo ángeles netin?)
23 Poc enlhit etyisam mataa mepqui apcay, ingyitsapoc naysicsa actamilaycam apvalhoc.
24 Naysicsa actamila apyimpejic, ingyitsapoc sat mepqui ningmasquem.
25 Ingyitsapoc sat poc enlhit naysicsa acnatjemo apvalhoc, metay acpayjayclha apvalhoc naysicsa aptiyascam as nalhpop.
26 Apno mataa poc apquilatoynamap, congne malhic aptoycamco yapa apjapaoc maa.
27 Acyasamcoc coo alquitamsama apquilvalhoc quellhip sellhanma coo.
28 Intomjac apquilvalhoc quellhip: ¿Co laa apyasa acma apquilnatam apmapsom? — intomjac apquilvalhoc.
29 ¿Am ya ellingac quellhip amyaa enlhit apquilyeycajay apquilyiplayclha amay?
30 Aplhenacpec apmapsom, metejec acyanmongayclha naysicsa apyicpilquemo sat Dios.
31 Paj poc enlhit, yoyam eyanmongsiclha aptemaclha apanco apmapsom.
32-33 Aplhamoclhojo enlhit apquillhalhma, yoyam elatoynic congne malhic. Malha aptajanma actamila intomjac apyitnama congne malhic.
34 Colapvanquejec quellhip eltamilquiscomoc evalhoc, quellhip apquiltomja apquilmopvancaa amyaa — nic nat aptomjac Job.
© © Biblia en Enhlet (Lengua Norte) © Paraguayan Bible Society, 1995.
