1 Aptomjac nic nat mocjam Job: Eyastinquic coo sictiyascam as nalhpop. Avanjec aclingaycamco evalhoc, pac olngacsic actemaclha acmayovsa evalhoc coo.
2 ¡Lhip Dios Visqui ingac, nojetnesquis nasa sicmasom coo! ¡Jeltimnas sat sictemaclha meyisponcama lhip!
3 Lhip alhta selanay coo, ¿so actomja yi setvasa najan sevenéycam nac lhip? Malha apmasma lhip enlhit apquilmapsomcaa.
4 ¿Apno ya lhquip enlhit, apquilaneyo sictemaclha coo?
5 ¿Apno ya lhquip aptiyascam enlhit, yoyam comascoc sat aptiyascam as nalhpop?
6 Aptingyac mataa lhip sicsilhnanomalhca ajanco najan moyascalhma, ¿so actomja yi?
7 Apyasamcoc lhip mepqui sicsilhnanomalhca ajanco. Copvanquejec lhama enlhit jevomsic tap napato lhip, yoyam jetvacsic.
8 Lhip alhta selanay coo, yoyam jetvacsic najan jemascocsic quilhvo nac jay, ¿so actomja yi?
9 Lhip alhta apmaycam yelpa, yoyam jelanac sicyovoclhojo. ¿Quilhvo ya jetnescasiclhac mocjam yelpa, emascocsic sat sictiyascam coo?
10 Malha leche actomjayclho queso alhta intomjac sillanomalhca coo, ayinyema lhip.
11 Sictomjayclho alhta ejepetic najan eyimpejic, najan elhquipcoc najan ejac coo.
12 Lhip alhta seyimnatescama najan siyasicjayo, semquescama acyimnatem enenyic, aptomja semasma naysicsa sictiyascam coo.
13 Acyasamcoc coo, moc actemaclha aclhanma apvalhoc lhip quilhvo nac jay.
14 Apquiltamjoc lhip jeyipconic coo, acyitna inlhojo sicsilhnanomalhca ajanco.
15 Nasoc sat ancoc sicsilhnanomalhca ajanco, otvasalhcac sat napato lhip. Am sat ancoc coyitnac sicsilhnanomalhca ajanco, mejemyovejec sat lhip. Avanjec coo siclingaycamco sicmancactama.
16 Malha yamacmeyva seyamascam coo sat etnejic lhip, apvita inlhojo ayajamalhco evalhoc coo, ayinyema lhip apmopvan apanco.
17 Avanjec mataa lhip seyinmelhaycam coo, apvita inyicje enlhit apquilvitaycamco. Malha seyimpocjay intomjac mataa seyinmelhaycam lhip acvoncaclhojo.
18 Apvanquic alhta lhip jeyajic, motyaycamlha mocjam coo, mejelvitay mocjam enlhit.
19 Natamin sictiyaycamlha ejapac coo, ongvatoynalhcac nat inyicje, malha mepqui coo.
20 Otyisam sat mocjam acyavataclhojo, jeyane sat coytic actamilaycam evalhoc coo.
21 Ongvitsovacsojoc sat yicpintama ongvitsapoc, mepqui sictajemo mocjam, sicvocmo inlhojo alyascamaclha ingjangaoc naysicsa yatescamalhma.
22 Acyivey maa yatescamalhma, mepqui ayitsay olhma cotmongvoycamlha nelha — nic nat aptomjac Job.
© © Biblia en Enhlet (Lengua Norte) © Paraguayan Bible Society, 1995.
