Apyitquiscama Jesús nipquesic aplhancoc
1 Actomjac coo silanya quellhip: Naso, am sat ancoc etalhningvoctac enlhit atong nipquesic aplhancoc. Apcaplhinquic sat ancoc apjalhtam, eyca as aptomja apminyilhma. 2 Aptalhningvoctac sat ancoc enlhit atong nipquesic aplhancoc, eyca as aptomja apquilancam nipquesic. 3 Apvoctac sat ancoc apquilancam nipquesic, yejemoc sat ellicsic aptamilquiscama atong. Apquiljalhnoc apnatoscama actemaclha apquevoycam apvitip. Apquiltimec mataa apvisay moclhama apnatoscama. Apnalaclhec mataa apnatoscama tap apjalhtam. 4 Apquilantipcasquic sat ancoc aplhamoclhojo apnatoscama, apquinimcasquic mataa amamyi, yoyam enaliclha. Apquilyiplovquic mataa apnatoscama, ayinyemaclha apquilyicpilcoc actemaclha apquevoycam apvitip. 5 Melyiplovejec mataa cotnaja inlhojo apvitip. Elinyajamcoc sat mataa, ayinyemaclha am elyicpilcac actemaclha apquevoycam cotnaja apvitip —alhta aptomjac Jesús.
6 Apquiltimnasam alhta Jesús actemaclha apyitquiscama. Am alhta elyasamcoc enlhitaoc actomjaclha aplhanma Jesús.
Jesús aptomja apquilancam nipquesic aptamalma
7 Yejemoc alhta apquiltimnasamcaa mocjam Jesús:
—Actomjac coo silanya quellhip: Coo sictimem malha nipquesic aplhancoc atong. 8 Apquilvoy apquilmamyi aplhamoclhojo apquiltomja apquilminyilhma. Am eljalhnoc mataa apquilevoycam. 9 Coo sictimem atong. Aptalhningvaac sat ancoc enlhit, evomsacpoc sat tap. Etnejic sat enlhit malha nipquesic. Etalhningvotac sat aplhancoc najan etyapvoclhac sat mataa. Etangvomoc sat mataa aptom.
10 ‘Apvoctac sat ancoc apminyilhma apquiltamjoc eminyilhic najan elnapoc najan enatovacsic nipquesic. Acvaac coo, yoyam colhic acyimnatem apnenyaoc enlhit, yoyam coyangvomoc acyimnatem apnenyaoc. 11 Coo sictimem apquilancam nipquesic aptamalma. Apyinyovquic apanco acyimnatem apnenyic apquilancam nipquesic aptamalma acyanmongam apnatoscama nipquesic. 12 Apnec poc apquilancam nipquesic cotnaja apvitip. Cotnaja apnatoscama nipquesic. Apvitac sat ancoc acvaa asoc navjac aclom, quilhvoc sat eyinyoc nipquesic, ingyinyejic sat. Ayinyemaclha jave apquilancam nipquesic apanco. Jave apnatoscama nipquesic. Natamin colnapoc sat asoc navjac aclom, colhpansic sat nipquesic. 13 Apquinyec anco cotnaja apvitip. Am etamilcasac mocjam nipquesic, ayinyemaclha metnaja quilancam nipquesic apanco. 14-15 Coo sictimem apquilancam nipquesic aptamalma. Eyicpilcoc coo Tata, acyicpilcoc coo lha coo Tata. Acno coo lha, acyicpilcoc coo sicnatoscama. Elyicpilcoc coo lha sicnatoscama. Pac oyinyoc acyimnatem enquenyic acyanmongam sicnatoscama. 16 Apquilyancac mocjam poc nipquesic. Jave apquilyanca nac aso congne apjalhtam. Incaymalhquic onalovsingvoclha nipquesic. Elilyejiclhojoc sat sicpayvam. Acvamlha lhama sat cotniclha apquilyinatamaclha. Apvamlha pac lhama sat etnejic apquilancam nipquesic.
17 ‘Eyasicjavoc coo Tata, ayinyemaclha sicyinyova sicyimnatem, yoyam omiclhac sat mocjam. 18 Mejeyinyovsejec coo sicyimnatem enlhit, eyca sicyamasma ajanco sicyimnatem. Emcasquic coo sicmovan coo Tata. Evanquic oyinyoc sicyimnatem. Evanquic najan omiclhac mocjam sicyimnatem. Eycaso ayinyema coo Tata seyanya otnejic —alhta aptomjac Jesús.
19 Lhama alhta apquillinga enlhitaoc Jesús appayvam. Apquilnatjavoc alhta napocja. 20 Apquiltomjac alhta apquilpayvam aplhamoclhojo enlhit:
—Meyascamcolhma nac as enlhit, ayanem nac. Noelaylhojo nasa appayvam —alhta apquiltomjac apquilpamesma.
21 Apquiltomjac alhta poc enlhitaoc:
—Am cotnemac appayvam enlhit meyascamcolhma actema nac lha. ¿Avanqui ya somquic quilyicjamo colyapitsiclha apataoc enlhit mepqui apataoc? —alhta apquiltomjac.
Aptanovmap Jesús nipyesicsa judíos
22 Apquiltomjacpec alhta caya dedicación tingma Jerusalén, ningiltimem “apquilmalhnesquiscama Ingyapam tingma apponquinomap.” Eyquey alhta intomjac (piyam alhta). 23 Aptiyasam alhta Jesús congne tingma apvisay Salomón. 24 Apvocjingvoctac alhta judíos apquinmamcaclha Jesús. Apquiltomjac alhta apquilanya:
—¿Soctomja apquilquitamsa nac ingvalhoc? Lhip ya anco Cristo, jingiltimnas siclho nincoo. Noyilhacpojo nasa lhip —alhta apquiltomjac.
25 Apcatingmavoc alhta Jesús:
—Altimnasquic alhta inyicje sicvisay. Apquilyascacmec alhta quellhip. Actamjam coo ayinyema apvisay coo Tata. Coo sictamjaycam actomja acyascasingvoyam sicvisay. 26 Apquilyascacme eyca quellhip, ayinyemaclha jave quellhip nipquesic apquiltomja sicnatoscama. 27 Apquiljalhnoc mataa sicnatoscama nipquesic actemaclha siyevoycam. Alyicpilcoc coo sicnatoscama. Elyiplovquic mataa coo sicnatoscama. 28 Olmesic sat acyimnatem apnenyaoc cotmongvoycamlha nelha. Melnatovasacpejec sat mataa. Acmiyovquic coo sicnatoscama. Copvanquejec enlhit jelnatamoc sicnatoscama. 29 Apmeyjec coo Tata aptomja selmescama sicnatoscama, am elhnoc aplhamoclhojo enlhit. Copvanquejec enlhit elnatamoc, ayinyemaclha apquilmiyovquic coo Tata sicnatoscama. 30 Inlhama nincoo Tata najan coo —alhta aptomjac.
31 Yejemoc alhta apquilma mataymong judíos. Apquililtamjoc alhta elajic Jesús. 32 Aptomjac alhta Jesús apquilanya judíos:
—Allhicmosqui inyicje quellhip aclhamoclhojo sictamjaycam altamila alinyema coo Tata. ¿Soctomja apquililtamjo nac jelajic? —alhta aptomjac.
33 Apquilatingmavoc alhta judíos:
—Am ongiltamjoc ongilajic lhip actamila inlhojo aptamjaycam. Eyca ayinyemaclha aptipsamcaa lhip apvisay Dios Ingyapam. Enlhit apanco nac lhip, aptimesacpo inyicje apanco Dios —alhta apquiltomjac.
34 Aptomjac alhta Jesús apquilanya:
—Yitnec quellhip singanamaclha actalhesomalhca actemaclha aplhanma ilhnic nat Dios Ingyapam: “Quellhip nac apquiltomja diosaoc” —nic nat aptomjac. 35 Ningyasamcoc nincoo actemaclha Dios appayvam actalhesomalhca. Mongvanquejec ontimesquisic acmovan amyaa. Apquiltomjacpec nic nat ancoc enlhitaoc apquilvisay diosaoc ingilyap apquiltomja apquiljalhenmo Dios appayvam. 36 ¿Soctomja apquilanya nac quellhip otipsic coo apvisay Dios Ingyapam? ¿Inlhoyqui laa siclhena lhac: Coo sictimem Dios Apquitca? Eponquincasquic coo Tata. Eyapajasquic coo as nalhpop. 37 Am sat ancoc ollanac coo Tata aptamjaycam, jelyasquim sat coo. 38 Allanac sat ancoc coo Tata aptamjaycam naysicsa selyasquiyam quellhip, noelyasquim nasa sictamjaycam coo. Yoyam elyicpilcangvomoc quellhip, yoyam najan melyascamejec quellhip, aptomja seyipitcayo coo Tata najan sictomja sicyipitcayo coo Tata —alhta aptomjac.
39 Apquililtamjoc alhta judíos elmoc mocjam Jesús. Apquilpoctacmec alhta.
40 Apmiyaclhec alhta Jesús tap vatsam Jordán. Apnaclhec alhta maa apyapascascamcolha alhta siclho yingmin Juan. 41 Apquilvoclhec alhta aplhamoclhojo enlhit apnaclha Jesús. Apquiltomjac alhta apquilanya:
—Am alhta ellanac Juan aptamjaycam sinpilapquiscama actemaclha monquinatquiscama. Nasoc anco aplhanma mataa Juan as enlhit apvisay Jesús —alhta apquiltomjac.
42 Am alhta elyascacmoc aplhamoclhojo enlhit apnaycam maa.
© © Biblia en Enhlet (Lengua Norte) © Paraguayan Bible Society, 1995.
