Apquiltemaclha enlhit acma apquilnatam
1 Quip elaylhojo quellhip acma apquilnatam. Elyipcalhaoc quellhip najan eliclhangvom. Ellingamcoc sat quellhip acmasca yoyam covac sat. 2 Inquiltictajapquic apquilnatam quellhip. Intovquic apava apascoc apquilantalhnama quellhip. 3 Inquilpaysacmec asoc alyinmom acnaycamcolha quellhip. Ayeyvaoc acpaysacmo cotnejic sat malha acvitaycamco apquiltemaclha quellhip. Cosavojoc sat apjapitic quellhip malha talha. Camquitvocmec nelha acnim. Quellhip eyca apquilansaclhec mocjam apquilnatam. 4 Quip elaylhojo. Apnaclhamqui inyicje enlhitaoc acyilhna apquilcaycaoc quellhip. Apquilmiyovqui eyca quellhip acyanmongam apquiltamjaycam. Inlingalhquic amyaa netin actemaclha apquilmasma acyanmongam quellhip. Aplingac najan Visqui netin apyimtalhnamo apquillhanma enlhitaoc apquiltomja apquiltamjaycam. 5 Avanjec mataa aptoycaoc quellhip aclhamoclhojo acnim apquileyvam as nalhpop. Apnamilay apquiltomja quellhip. Incovac sat acnim yoyam eticyo quellhip. Malha acticyovam ninatoscama acnamilay sat cotnejic. 6 Apquiltimescasquic alhta quellhip apmapsom enlhit aptomja appeyvomo. Apquilajac alhta quellhip. Am alhta eyca eyanmongsaclhac aptovasomap.
Actemaclha ningilinlhanyam najan actemaclha ningilmalhnancama
7 Quellhip elyalhinga. Elinlhanmojo quellhip acvocmo acnim apvoyctamlha Visqui ingac. Apquilinlhanacmec mataa enlhit aptamjaycam amyip yoyam etac acyilhna. Apquiljalhnec siclhoc acmamay amamyi acvocmo moc acmamay yicpintama apnaclhama acyilhna. 8 Elinlhanmojo sat najan quellhip lha. Elyimnaticsojo apquilvalhoc, ayinyemaclha camquitvaac apvoyctamlha Visqui ingac. 9 Quellhip elyalhinga. Noellhenam nasa poc nipyesicsa quellhip yoyam melyicpilcacpejec sat quellhip. Quip elanojo. Dios Ingyapam aptomja singyicpilquemo apcamquitvaa, malha tingma apatong. 10 Quellhip elyalhinga. Colyit apatic apquiltemaclha ilhnic nat profetas apquiltomja apquillingascama apvisay Dios. Elhnasojo quellhip apquiltemaclha ilhnic nat mayasquiscama apyimpeoc najan apquiltemaclha apquilinlhanyam. 11 Quip elanojo. Ningillhenam apquilinyejemo enlhit nano apquiltomja apquilinlhanyacmo. Apquillinga inyicje quellhip aptemaclha apquilinlhanyacmo Job naysicsa acma apyovsa. Apquilyasamcoc najan quellhip aptemaclha Job apcajapvoyacmo apvoyam tap ayinyema Visqui ingac. Eycaso aptemaclha Visqui ingac. Ingyovsec mataa singilano, avanjec anco singamliyam.
12 Quellhip elyalhinga, elaylhojo actomja ayimja amamyi anco. Noellhamasap nasa yoyam colhejec acyascacmo. Noellhen nasa acvisay netin, noellhen nasa acvisay nalhpop, noellhen nasa acvisay moc asoc yoyam colhejec acyascacmo. Noelyinimquis nasa eltimjic: “jey”. Noelyinimquis nasa eltimjic: “paj”. Yoyam meltovasacpejec sat quellhip napato Dios Ingyapam.
13 Yimtilhec sat ancoc ingvalhoc, pac ongilmalhna Dios Ingyapam. Payjeclhec sat ancoc ingvalhoc, pac ongminaycmasam. 14 Yitnec sat ancoc acmasca ingyimpejic, pac ongilyoclhojo apquilimja apmamyi Jesucristo apmolhama. Jingilmalhnesquisic sat siclho, natamin eltilhnamcoc sat ingyimpejic naysicsa apquillhanma apvisay Visqui ingac. 15 Am sat ancoc ongilyascacmoc naysicsa singilmalhnesquiscama, cotamalvomoc sat ingyimpejic. Visqui ingac sat jintamilquiscomoc. Yitnec sat ancoc ningilsilhnanomalhca, comascosalhcac sat. 16 Pac onlhenic mataa ningilsilhnanomalhca ningyesicsa nincoo. Pac ongilmalhnesquisic mataa ingyalhing yoyam etamalvomoc. Acmovan innac ningilmalhnancama ningiltomja ningilpeyvomo. Eljalhnoc sat Dios Ingyapam. 17 Enlhit apanco ilhnic nat Elías Dios aplingascama, ningno nincoo. Lhama ilhnic nat apquilmalhna yoyam comacyeje as nalhpop. Am nic nat comamecac tres años najan seis piltin. 18 Natamin nic nat apquilmalhna mocjam Elías yoyam comama. Inmamecac nic nat as nalhpop. Yiplovcoc nic nat acnaclhamalhca acyilhna.
19 Quellhip elyalhinga. Aplhinganacmec sat ancoc poc aptomja aptovascama actemaclha acpeyvomo, elpayquingvom sat ingyalhing aplhinganyam yoyam ellaniclhac sat apvalhoc. 20 Elyasamcojo quellhip. Ningilpaycacmec sat ancoc ingyalhing aplhinganyam, ontimjic sat ningvomquiscama tap. Colmascosalhcac sat melyascalhma enlhit aplhinganyam.
© © Biblia en Enhlet (Lengua Norte) © Paraguayan Bible Society, 1995.
