Acyanmongam ningyiplovquiscama
1 Aptomjac alhta Dios Apyimtalhnamo apquilanya: Elyiplovquis mataa actemaclha acpeyvomo. Cotlapsic sat sicvomquiscama tap quellhip, elvitac sat sicmovan sicvomquiscama tap.
2 Apquilinyejemo enlhit apyiplovquiscama siyanamaclha mepqui apyeycajascama lhama. Apquilinyejemo enlhit aptamilquiscama acnim ninnayclha mepqui aptamjaycam, aptomja aptamilcasomacpo apanco.
3 Apyiplovcasquic sat ancoc enlhit metnaja nintemolhama. Nongyane nasa etnejic appayvam: Mejemyovejec sat Dios Apyimtalhnamo nipyesicsa enlhit apancaoc — intomjac appayvam. Nongyane nasa etnejic appayvam eunuco enlhit yamquilvana: Mejemyovejec sat Dios Apyimtalhnamo, sictomja ejápac, acno yamit ápac — intomjac appayvam.
4 Aptomjac alhta mocjam Dios Apyimtalhnamo: Yitnec sat ancoc apquiltamilquiscama acnim ninnayclha eunuco enlhit yamquilvana. Yitnec sat ancoc apyiplovquiscama siyanamaclha najan actemaclha ningmiyovmalhca.
5 Olmesic sat actamila anco, melvitay inlhojo apquitquic eunucos yamquilvana. Colhic sat actalhesa apquilvisay congne tingma apponquinomap, actalhesomalhca congne napocja tingma. Ellhocac sat apquilvisay alhnancoc, comascosalhquejec sat mataa cotmongvoycamlha nelha.
6 Olmeyvoc sat elyoycta inlhojo metnaja nintemolhama. Jeltimesam sat acyiplomo selasicjayo. Eltimjic selancam coo, apquiltamilsa inlhojo acnim ninnayclha mepqui apquiltamjaycam, mepqui inlhojo apquilyeycajascama ningmiyovmalhca.
7 Onaliclhac sat as enaymacoc netin inquilhe mayayo. Colpayjiclhac sat apquilvalhoc congne ningilmalhnancamaclha. Omoc sat tacja asoc acticyovam selmescama coo acyanmongam melyascalhma. Coo tingma ajac apvisay apquilmalhnancamaclha apyovoclhojo enlhitaoc.
8 Ongvansiclhac sat mocjam apquiltomja apquilhpaneycam — alhta aptomjac Dios Apyimtalhnamo apcansayclha israelitas apquilhpaneycam — nic nat aptomjac profeta.
Apquiltemaclha apquilmapsomcaa
9 ¡Collhing jilip acyovoclhojo asoc navjac aclom aleyvam nalhma najan lhalhma ano! ¡Colpasmiclha alyamonquilhma!
10 Mepqui apataoc apquilancam sicnatoscama, am colhenac apquilvalhoc lhama asoc. Apquilyitsomacpo simjing mepqui acpáyvam, mepqui apquiltamilquiscama. Apnatinquic mataa acyiplomo apquilvanmescama. Apnatinquic nasa.
11 Apquilyitsomacpo simjing mayic alnapma, aptingyeycaoc acyivey nintom. Apquilyitsomacpo apquilancam ninatoscama mepqui apquilyascamco. Apquilyiplaclhec mataa amay apancaoc, aptingyeycaoc asoc apancaoc.
12 Apquiltomjac mataa: Noc, ontingyac sat ningyam anmin, yoyam jingilnapoc sat. Secaseclha ongilvajanamcoc sat mocjam ningyam, ontingyac sat mocjam moc asoc — alhta aptomjac Dios Apyimtalhnamo — nic nat aptomjac profeta.
© © Biblia en Enhlet (Lengua Norte) © Paraguayan Bible Society, 1995.
