1 ¿Naso ya melyascomoc sat enlhit, apquillinga inlhojo amyaa? ¿Soc enlhit yoyam elvita apmopvan apanco Visqui ingac?
2 Visqui ingac apcasinancama apyitsomacpo yamit ayitcoc actictiyapma lhopactic acyamay, acyitna apquipmenaoc congno. Eycaso apmajayoclha Dios. Mepqui actamila napaat najan apyovoclhojo, mepqui ningyisponcama ningilaneyo apyovoclhojo.
3 Yitnec apquilvenéycam apnaymacoc, apquiltomja apquilinmelhaycam. Aplingamcoc alhta acmasca, malha ningmasquem ayajem. Mepqui mocjam ningilaneyo, ayinyema ningvenéycam najan nintemaclha ningyamasma, inmasquec apvisay ningmolhama.
4 Naso, appatmec alhta acmasom, malha ningmasquem ingac najan malha acmasca ingyimpejic. Ninganayquic alhta conyemac Dios apyanmongsayclha aptemaclha, malha aplingaycamco malyicpilhquetaycam.
5 Innec alhta alyimsasa ayinyema mongilyascalhma. Innec alhta alyicpilhquetamcaa ayinyema nintemaclha inganco. Aplingamcoc alhta acyanmongayclha yoyam coytic nincoo actamilaycam ingvalhoc. Apquilyimsem ayinyema ningilvomsomalhca tap.
6 Ningillhinganyam innac ninlhamoclhojo, malha nipquesic apquillhinganyam. Ningilyasquic mataa ningilyasaclha inganco. Aplingamcoc acmasca Dios apquilancam ayinyema nincoo mongilyascalhma, malha appatimquiscama acyimtalhnama Dios.
7 Innec alhta ayasquisa apyimpejic. Apjalhec alhta naysicsa aplingaycamco. Am alhta copayjam apatong, malha nipquesic apquitcoc yoyam ematong. Malha nipquesic naysicsa macyesiscama. Am alhta colngalhcac appayvam.
8 Innec alhta acyantaveclho naysicsa macyicpilquemo najan aplingaycamco acyimtalhnama. Am alhta collhenac apquilvalhoc enlhitaoc. Innec alhta acmascosa aptiyascam as nalhpop nipyesicsa apnaymacoc. Apmatnec alhta acyanmongam mongilyascalhma.
9 Apcatoynacpec alhta nipyesicsa cotnajaclha apnaymacoc. Nipyesicsa enlhitaoc apquilmapsomcaa. Am alhta coyitnac apsilhnanomap apanco. Am alhta coyitnac apmopvan amyaa.
10 Apquiltamjoc alhta Dios Apyimtalhnamo elngamcojo acmasca apquilancam. Apyinyovquic alhta apyimnatem apanco, malha asoc macmescama Dios acyanmongam mongilyascalhma. Eleyoc sat mocjam aptovana niptamin. Etnejic sat mocjam apquilmilaneycaoc aclhamoclhojo acnim. Elngacsic sat apmayjayoclha Dios lhalhma anco.
11 Natamin aplingaycamco acyimtalhnama etac sat actamila yoyam copayjiclhac sat apvalhoc. Appeyvomo nac selancam. Avanjec alhta apyascamco. Eyascasingvomoc sat aplhamoclhojo enlhitaoc actemaclha acpeyvomo. Elngamcojoc sat acmasca, malha appatam acyimtalhnama ayinyema nintemaclha acmasom.
12 Etnejic sat apyimnatem apanco. Elmoc enlhitaoc apquilyimtalhnamo. Ingyilhpansic sat asoc almomalhca nipyesicsa apnaymacoc apquilyimnatem. Ayinyemaclha am alhta emyavac acyimnatem apnenyic acvocmo apmatnam. Innec alhta altamjamco apmapsom. Aplingamcoc alhta acmasca, malha appatam acyimtalhnama ayinyema mongilyascalhma ninlhamoclhojo. Apquilmalhnescasquic alhta mataa apquiltomja apquilsilhnanomap apanco.
© © Biblia en Enhlet (Lengua Norte) © Paraguayan Bible Society, 1995.
