1 Quilaycmasquiscama acyitsomalhca dios acvisay Bel, moc quilaycmasquiscama acvisay Nebo, mepqui mataa alyimnatem, altomja eyca acnatovasomalhca. Inquilpatmalhquic apnatoscama acpoc. Inquilyampavoc apnatoscama co Babilonia.
2 Inatovasalhquic alhta dioses mepqui acmovan colvomsic tap quilaycmasquiscama. Colmalhcac sat, colhic sat acpatmaoclha moc yoclhilhma. Aptomjac alhta Visqui ingac:
3 Quip elaylhojo quellhip israelitas, apyovoclhojo enlhitaoc apquilaymomap: Ayaynaoclhec mataa quellhip nanoc anco, ayenmo apquiltiyaycamlha acvaycmo apquiltomjayclho apquilvanyam.
4 Ongvaynaoclhac sat mocjam, sicvita inlhojo almopoy apcatcoc apyitsicsaoc. Am olvatasac mataa coo sicpatmaoclha quellhip, opasingvotac sat, olvomsic sat mataa tap — alhta aptomjac.
5 Aptomjac nic nat mocjam: ¿Soc enlhit apyimtalhnamo, yoyam jelyitquisic quellhip? ¿Soc sat etnejic sicyitsomalhca coo?
6 Yitnec apquiltemaclha enlhit apquiljalhyovascama cotlaycaoc oro, najan apquilyipsatem plata. Apquilsaclhec apnaclha apquillanay asoc altamila. Apcanyacpec maa ellanac quilaycmasquiscama acyitsomalhca dios, yoyam eljalhic sat acyitnamaclha, eltimjic apquilayo as quilaycmasquiscama.
7 Apquilsovquic mataa acyavataclhojo as quilaycmasquiscama, apquilpiquenaclhec mocjam acyitnamaclha, mepqui aclhingam, mepqui acmovan as quilaycmasquiscama. Inquilmalhnalhquic maa, yoyam copasingvota enlhit, - paj, mepqui acpayvam. Covanquejec quilaycmasquiscama covomsic tap enlhit naysicsa aplingaycamco acmasom.
8 Quellhip enlhitaoc apquilsilhnanomap apanco, noncolvonquim nasa quellhip, colma sat apquilvalhoc.
9 Colyitnam apatic sictomjaclha nanoc alhta. Coo sicvisay Dios, paj poc. Coo sicvisay Dios, paj poc apyitsomacpo coo (seyitsomalhca coo).
10 Yitnec coo siclhanma nanoc alhta, yavamlha otnejic nanoc sat. Inlhenquic evalhoc yavamlha otnejic, colvitalhcac sat sictomjaclha. Allanac coo mataa siltamjoclha ollana.
11 Ayapajasquic coo colhic altimnasa lhama enlhit payjoc actiyapmaclha acnim mocjay anco. Evac sat malha mama, yoyam esavojoc apcanyomap ellana, ayinyema aclhanma siclho evalhoc coo. Osavojoc sat siclhanmaclha nano.
12 ¡Quip elaylhojo quellhip colyavameycaoc! Apquilanayquic quellhip mepqui singmasma nincoo.
13 Coo eyca ayinyema apquilvomsomap tap quellhip, ningatoc anco silvomquiscama tap quellhip. Elvitac sat co Jerusalén ningilvomsomalhca tap ayinyema coo. Ellhovamcoc sat israelitas mayayoclha ayinyema coo — alhta aptomjac Visqui ingac — nic nat aptomjac profeta.
© © Biblia en Enhlet (Lengua Norte) © Paraguayan Bible Society, 1995.
