Ningminaycmascama acpayjayclha ingvalhoc
1 Elminaycmacsic sat yoclhilhma Judá as acnim actemaclha apquilayo:
Apyimnatem apanco tingma ingac, yoyam jingilvomsic tap (jingilmeyvoc nincoo). Apquillanac alhta Visqui ingac mataymong apjalhtam tingma, jingilmeyvoc sat.
2 Eljalhyovas tingma apatnaoc, elantilhic sat enlhit apquilpeyvomo, apquiltomja apquilyiplovquiscama.
3 Lhip Visqui ingac aptomja apmasma enlhit apquiltamilcasomacpo apanco mepqui inlhojo apquilyasquiyam.
4 Am elyascacmoc mataa lhip Visqui ingac, aptomja ningyilhanmeycam.
5 Aptovasquic alhta apyimtalhnesomacpo apanco, apnatovasquic alhta ayajamalhco apquilvalhoc, apnatovasacpec alhta tingma apyovoclhojo.
6 Apquiltamjoc alhta eltamoc amancaoc enlhit mepqui apquilnatam najan mepqui ayajamalhco apquilvalhoc — intomjac apquilminaycmascama.
7 Peyvoc mataa amay apquilyiplayclha enlhit apquilpeyvomo. Lhip Visqui ingac aptomja appeyvescasquiclha amay.
8 Peyvoc nincoo lha ingilvalhoc, ayinyema ningyiplovquiscama singanamaclha lhip. Ningiltamjoc mataa colhenic ingilvalhoc lhip apvisay.
9 Avanjec mataa aclhanma evalhoc lhip alhtaa, sitamsama lhip ayinyema alipvoyam evalhoc. Lhip aptomja apyicpilquemo as nalhpop, elyasingvomoc sat actemaclha acpeyvomo aplhamoclhojo enlhit.
10 Melyasingvomejec sat mataa enlhit apquilmapsomcaa actemaclha acpeyvomo, melvita inlhojo acyanmongayclha apquiltemaclha apancaoc. Apquiltomja melyascalhma nipyesicsa enlhit apquilpeyvomo, meltomja apquilayo Visqui ingac apyimtalhnamo.
11 Apvanquic lhip quilhvoc anco eyanmongsiclha apquiltemaclha apancaoc aquilmapsomcaa, naysicsa mepqui mataa apquilay lhip. Apquilvitac mataa lhip aptomja apmasma enlhit apancaoc apquilpeyvomo, naysicsa apquilasmescama apquilmapsomcaa. ¡Isavojo sat lhip apquilnapma, malha talha acsovjomo asoc ápac!
12 Lhip Visqui ingac aptomja singimlayquiclho, nasoc anco lhip singillhinquiscama naysicsa ningiltamjaycam.
13 Lhip Dios Visqui ingac, ingilmec alhta poc apquilviscaa, yoyam ongiltimesam. Lhip eyca apvamlha pac lhama ningiltomja ningilayo.
14 Apquilitsepquic maa, mellhaticjangvomejec sat mocjam. Collhaticjangvomejec sat mocjam apquiljangaoc. Ayinyema lhip alhta apyanmongsayclha apquiltemaclha apancaoc yoyam enatovasacpoc. Collhenalhquejec sat mocjam apquilvisay, colhenalhquejec sat mocjam asoc apancaoc.
15 Aplhamaseclhec lhip enlhitaoc, apyaveclhec lhip yoclhilhma apquileyvomaclha. Colhic sat mataa ayaco lhip apvisay Visqui ingac.
16 Ningitamquic lhip naysicsa ninlingaycamco acyimtalhnama najan naysicsa apyanmongsayclha lhip nintemaclha inganco.
17 Ninlingamcoc nincoo acmasca napato lhip Visqui ingac, malha quilvana yoyam cotimsic ayitca, ningiltomja ningiliclhangveycam najan (ningilpalhamaycam) ningilpayjam ingatong.
18 Ninlingamco inyicje acmasca, acno quilvana yoyam cotimsic ayitca. Jave eyca nintimquiscama sicaa, nintimcasquic nincoo alhcajayam. Am ongvanac ongilvomsic tap apyovoclhojo enlhitaoc, mongvanquejec ongvita enlhit apjalhnancaoc eleyoc sat as nalhpop.
19 Lhip Visqui ingac, enalhaticjangvomoc sat mocjam lhip apnaymacoc apquilitsepma nano, eleyoc sat mocjam lhalhma anco. Enalhaticjangvomoc sat apquilitsepma, malha apnatiyanma congne malhic, colpayjiclhac sat apquilvalhoc. Lhip ayinyema apquitsasquiscama olhma, colhic sat acnalhaticjasa apquilitsepma apnaycam congne tacjalhpopayc.
20 Quellhip enaymacoc enlhit. Elnamtilh sat congne tingma apancaoc, elapiclha sat atnaoc. elyilhanim sat maa, acsovjalhco inlhojo acyanmongayclha acyimtalhnama ayinyema Dios.
21 Visqui ingac etyapoc sat tingma pac, eyanmongsiclha apquiltemaclha apancaoc enlhitaoc as nalhpop. Elvitacpoc sat apticyovam nano, malha macpiquinayclha ayalhnaclhojo sat cotnejic, elvitacpoc apticyovam nano.
© © Biblia en Enhlet (Lengua Norte) © Paraguayan Bible Society, 1995.
