Actemaclha ningayo Dios
1 Visqui ingac, lhip nac tata coo Dios. Otnejic sat siyayo lhip apvisay. Lhip ayinyema aptamjaycam simpilapquiscama, ayinyema aclhanma apvalhoc lhip nano. Lhip aptemaclha mataa appeyvomo najan nasoc anco nanoc alhta.
2 Aptimescasquic lhip tingma apquiltamila, eltimiclhac sat mataymong mayicjescama. Najan tingma apquilyimnatem, yoyam enatovasacpoc. Tingma apquiltamila apancaoc cotnaja ingmoc, yoyam enatovasacpoc. Mellanacpejec sat mocjam as tingma.
3 Eltimjic sat apquilayo lhip tingma apquilyimnatem. Elavojoc sat lhip enlhit apquilmapsomcaa.
4 Lhip aptomja apyilhanmeycam enlhit mepqui apquilnatam. Lhip aptomja apmasma enlhit mepqui asoc. Lhip aptomja apyilhanmeycam enlhit nipyesicsa yatepiyam. Aptomja malha pisquisca naysicsa acmajat. Apquilyitsomacpo apquilmapsomcaa malha apquilhcajayam yatepiyam.
5 Malha acmajat yoclhilhma acyamay olhma. Apnovcasquic lhip apquiltemaclha singinmelhaycam. Malha acmalhatescama pisquisca ayajapvoy yipjopay. Apnovcasquic lhip apquilmapsomcaa, yoyam elvanma.
6 Apquillanescasquic nintom actamila tingma Jerusalén Visqui ingac Apyimtalhnamo. Eltasomoc sat enlhitaoc lhalhma anco nintom actamila anco, acyiplomo uva ayingmenic actamila. Eltasomoc sat nintom actamila, acmasis anco, acyiplomo uva ayingmenic acmasis.
7 Etvacsic sat Visqui ingac netin inquilhe apava ayalomalhca apcatcoc enlhit. Etvacsic sat Visqui ingac apava apcalomap apyovoclhojo enlhitaoc.
8 Emascocsic sat Visqui ingac acvisay ningitsepma cotmongvoycamlha nelha. Emascocsic sat Visqui ingac acmayovsa apquilvalhoc enlhit apquiliclhangveycam. Emascocsic sat Visqui ingac aclingaycamco apquilvalhoc lhalhma anco. Eycaso ayinyema appayvam Dios.
9 Colngalhcac sat actemaclha ninlhanma: Quip elanojo quellhip Dios singvomquiscama tap, mepqui mataa ningyasquiyam. Elitsovacsojo, colpayjiclha apquilvalhoc aptomja singvomquiscama tap — sat cotnejic ninlhanma nincoo.
10 Apmopvan innac Dios Apyimtalhnamo, elmeyvoc sat apnaycam Jerusalén. Enatovasacpoc sat co Moab, malha paat acyamay alyancaclha ninatoscama.
11 Elpeyvacsic sat apectengaoc co Moab, malha apquilmam yingmin apquiltomjac. Elvayvamcoc sat yingmin naysicsa apquilvascapma apquilmam yingmin.
12 Enatovacsic sat Dios Apyimtalhnamo mataymong apjalhtam tingma najan apquilyilhanmomaclha. Esavojoc sat apnatovascama acyovoclhojo — nic nat aptomjac profeta.
© © Biblia en Enhlet (Lengua Norte) © Paraguayan Bible Society, 1995.
