Apquillhenamap co Babilonia
1 Apcanyacpec nic nat Isaías, Amoz apquitca, elngacsic amyaa ayinyema Dios, yavamlha cotnejic nipyesicsa co Babilonia:
2 ¡Elnimquis sat asoc monquinatquiscama netin inquilhe, yoyam elimpocjac! Elmiyasiclha sat netin apmeoc, elevam enlhitaoc apnaymacoc ingyaniclhac sat payjoc tingma apvanyam apatnaoc.
3 Ayapajasquic coo colhic ayanseclho enaymacoc singilpilhtetemo apquilvascapma, apquiltomja selayo, elyanmongsiclha apquiltemaclha apancaoc selinmelhaycam — alhta aptomjac.
4 Inlingalhquic apquilpalhamaycam enlhitaoc appintalhnama payjoc netin inquilhe. Inlingalhquic apquilpalhamaycam metnaja israelitas apcanayclha maa. Visqui ingac apyimtalhnamo aptomja apquilaneyo singilpilhtetemo yoyam elimpocjac maa.
5 Apquilinyemac moc yoclhilhma mocjay anco, payjoc nelha lhapop. Dios Visqui ingac apnalayquinta, yoyam elnatovacsic enlhitaoc apquileyvam as nalhpop, ayinyema acyivey aplom pac Dios.
6 ¡Elyapcalhaoc sat quellhip, incamquitvaac acnim apanco Visqui ingac! Cotalhcac sat acyivey apmopvan apanco Dios apyimtalhnamo.
7 Elvayventac sat apectengaoc enlhitaoc, comascoc sat apquilyimnatem, comascoc sat apquilvascapma.
8 Cotyamoc sat apquilvalhoc apyovoclhojo. Elangvomoc sat maa naysicsa apquillingaycamco acmasca, colhojoc sat quilvana actimquiscama ayitca. Apquilanoc mataa poc, yoyam epasingvota, naysicsa acmelhanma apyimpeoc napataa (apquilmancactama).
9 Invaac lhac acnim apanco Visqui ingac, actomja acyimtalhnama najan acyivey aplom pac, acyitsomalhca talha. Cotniclhac sat yoclhilhma actamopeycaoc as nalhpop, elmasquingvomoc sat apyovoclhojo enlhit melyascalhma as nalhpop.
10 Comascoc sat ningvitay apyová netin, comascoc sat ayitsay natamin actiyapma acnim, comascoc sat apcapongmatem piltin.
11 Aptomjac alhta Visqui ingac: Oyanmongsiclhac sat apquiltemaclha apancaoc apquilmapsomcaa. Omascocsic sat apquiltemaclha apquilyimtalhnesomacpo apanco, omascocsic sat apquiltemaclha ayajamalhco apquilvalhoc.
12 Elaymacpoc sat apcanito enlhit, colhojoc sat oro acmasilhte ayinyema Ofir — alhta aptomjac.
13 Coyovjam sat netin, coyovjam sat as nalhpop naysicsa acvoy sat aplom pac Dios eyanmongsiclha apquiltemaclha apancaoc enlhitaoc.
14 Apquilyitsomacpo enlhitaoc asoc navjac macminlhinaycam, najan malha nipquesic apquililhpanyam mepqui apquilancam. Elinyajamcoc sat eltajiclha mocjam apquilaoclha yoclhilhma apquilinyemayaclha.
15 Eticyoc sat moclhama apquilmomap naysicsa apquilinyem, eticyoc sat naysicsa apquilmomap.
16 Elvitac sat actemaclha acticyovam apquitquic, actemaclha apnatovasomap tingma apancaoc, najan actemaclha acnatovasomalhca apnatamcaa.
17 Aptomjac mocjam Visqui ingac: Ongvapajacsic sat elimpocjac enlhit medos, mepqui mataa apquiltingyey oro najan plata.
18 Elimpocjac sat apquilyingam yanca apancaoc, eticyoc apquilyimnanic, coticyoc sat sicaa quilhva acpaliyam, melmiyovacpejec sat apquitcavoc — alhta aptomjac.
19 Etvasacpoc sat tingma apvanyam Babilonia, apyitsomacpo siclho asoc acmamnave najan alyinmom nipyesicsa caldeos. Elhojoc sat tingma Sodoma najan Gomorra apnatovasomap nano.
20 Melhejec sat mataa enlhit as tingma aptovasomap. Melanejec sat carpa tingma co Arabia, melvitacpejec sat mataa apquilancam nipquesic najan apquilyinatamaclha apnatoscama.
21 Coleyoc sat maa asoc navjac quilhcalhic, elyancac sat sovaya congne tingma apjapac, elleyoc sat maa lhapin, elnayoc sat yataay nipvajac.
22 Tingma apquiltamila siclho, coleyoc sat asoc navjac chacales najan lobos vavo. Ningatoc anco acnim, yoyam cotalhcac as asoc, etvasacpoc sat tingma Babilonia — alhta aptomjac Visqui ingac — nic nat aptomjac profeta.
© © Biblia en Enhlet (Lengua Norte) © Paraguayan Bible Society, 1995.
