1 Eycaso aptemaclha Dios apquilancam nipyesicsa enlhitaoc. Enlhitaoc apquiltomja apquilyacyescama lhama nipyesicsa Dios apquilancam yoyam etnimsacpoc apmamyi. Aptomja apcasinomap napato Dios ayinyema enlhitaoc. Aptomja apmescama mataa asoc macmescama Dios acyanmongam melyascalhma enlhitaoc. 2 Apvanquic Dios apquilancam elngamcojoc lhama naysicsa mepqui apquilyimnatem enlhit melyascamco najan enlhit apquillhinganyam. Ayinyemaclha moc acnim mataa mepqui apyimnatem Dios apquilancam. 3 Incaymalhquic Dios apquilancam elmesic asoc macmescama Dios acyanmongam melyascalhma enlhitaoc najan acyanmongam meyascalhma apanco.
4 Paj lhama enlhit apmopvan etnesacpoc apanco Dios apquilancam. Apvamlha Dios aptomja aptimesquiscama apquimja apmamyi. Apno ilhnic nat Dios apquilancam apvisay Aarón. 5 Apnoc alhta najan Cristo. Am alhta etnescasac apanco Dios apquilancam. Apvamlha Dios aptomja alhta aptimesquiscama apquilancam. Aptomjac alhta Dios apcanya Apquitca:
Lhip aptomja Sictamongvoyam.
Actimescasquic lhip Sictamongvoyam quilhvo nac jay
—nic nat aptomjac Dios.
6 Intomjac nic nat mocjam aclhanma actalhesomalhca:
Lhip aptomja Dios apquilancam cotmongvoycamlha nelha,
apno ilhnic nat apmolhama Melquisedec
—nic nat intomjac.
7 Aptiyasam alhta Cristo as nalhpop. Apquilmalhnaquic alhta mataa Dios actemaclha apvinama najan actemaclha apyimnatescama appayvam. Ayinyemaclha apvanquic alhta Dios evomsic tap naysicsa apquitsepma. Apquilyajaclhoc alhta Dios apquilmalhnancama Apquitca, ayinyema apquilyajayquiclho apmayjayoclha apyap. 8 Nasoc anco Cristo aptomja Dios Apquitca. Apyasingvocmec alhta actemaclha apquilyajayquiclho naysicsa aplingaycamco acmasca. 9 Apsovjoc alhta Cristo aclhamoclhojo asoc. Eycaso ayinyema ningilvomsomalhca tap ningiltomja ningilyajayquiclha. 10 Aptimec alhta Dios apvisay Apquitca apquilancam apno ilhnic nat apmolhama Melquisedec.
Elavojo actemaclha ningyamasma mongyasquiyam
11 Yitnec mocjam aclhamoclhojo asoc yoyam ongiltimnacsic quellhip. Yimtilhec yoyam ongilyascasingvomoc quellhip. Ayinyemaclha am colmac apquilvalhoc quellhip ayinyema alyimnatem apquilvalhoc. 12 Incaymalhquic elapvanic eltimjic quellhip apquillhicmoscama nipyesicsa poc enlhitaoc. Am eyca colapvancaac mocjam. Incaymalhquic elyasingvomoc siclho asoc alyilhyevay ayinyema singillhicmoscama Dios. Quellhip apquiltomja malha sicaa yoyam eltovamcoc neme. Colapvanquejec quellhip eltovamcoc mocjam nintom acyimnatem. 13 Apquiltovcamquic sat ancoc acvamlha neme, malha sicaa sat eltimjic. Colapvanquejec elyasingvomoc mocjam amyaa actemaclha acpeyvomo. 14 Apquiltovcamquic nintom acyimnatem enlhit meltomja sicaa. Ayinyemaclha apquilyasingvocmec aclhamoclhojo nintemaclha. Apquilyasamcoc asoc acvisay actamila najan asoc acvisay acmasom.
© © Biblia en Enhlet (Lengua Norte) © Paraguayan Bible Society, 1995.
