Incaymalhquic mongiltovacsejec ningilvomsomalhca tap
1 Incaymalhquic ongilinlhanmojo ningyiplovquiscama mataa appayvam ninlingay alhta nincoo yoyam mongillhinganmejec ningyiplom as amay. 2 Apquillingasquic nic nat ángeles amyaa acpeyvomo. Apquillingac nic nat enlhitaoc actomja nasoc anco. Am nic nat copvanac melyejiclhojo enlhit. Apvitac nic nat acyanmongayclha enlhit aptomja melyascalhma najan aptomja melyajayquiclho as amyaa. 3 Ningiltomjac sat ancoc ningvinéycam nincoo ningilvomsomalhca tap acyiviy anco, mongvanquejec ongilinquitalhca. Ayinyemaclha Visqui ingac aptomja singlingascama siclhoc anco as amyaa ningilvomsomalhca tap. Natamin apquiltomja najan singlingascama poc, apquiltomja alhta apquillingay amyaa ayinyema Visqui ingac. 4 Najan Dios aptomja singlingascama. Aptimescasquic alhta Dios nasoc anco apquillingascama apquilancam ayinyema asoc monquinatquiscama apquillanay alhta najan ayinyema aptamjaycam sinpilapquiscama. Najan ayinyema apmopvan Espíritu Santo, ayinyema apmayjayoclha apanco Dios.
Jesucristo apno apquilyalhinga
5 Inlhenalhquic Dios apquilnancascama yoyam covac sat. Am alhta eltimescasac Dios yoyam eltimjic apquilviscaa ángeles. 6 Intomjac nic nat Dios appayvam actalhesomalhca:
Lhip Dios actomja aclhanma apvalhoc enlhit. ¿Soctomja aclhena apvalhoc lhip?
¿Soctomja aptamilsa nac lhip enlhit apquitca?
7 Lhip alhta aptimesquiscama acyavataclhojo meyimtalhnamo enlhit; am alhta elhnoc ángeles.
Lhip alhta aptimesquiscama apyimtalhnamo enlhit yoyam colhic ayaco najan colhic gloria apcapongmatem.
Lhip alhta aptimesquiscama apyimtalhnamo tacjalhit aclhamoclhojo asoc allanomalhca siclhoc anco.
8 Lhip alhta aptimesquiscama apvisqui lhalhma anco
—nic nat intomjac Dios appayvam. Aptimescasquic sat ancoc Dios yoyam etnejic apvisqui lhalhma anco, colhejec sat lhama asoc mepqui avisqui ac. Am eyca etnajac mocjam apvisqui lhalhma anco quilhvo nac jay.
9 Ningyasamcoc nincoo, Dios aptimesquiscama acyavataclhojo meyimtalhnamo Jesús, am alhta elhnoc ángeles. Apquiltamjoc alhta Dios yoyam ematong acyamongam aplhamoclhojo enlhitaoc. Eycaso ayinyema apcasicjayo Dios. Innec ayaco quilhvo nac jay najan gloria ayitsayolhma, ayinyema alhta aplingaycamco acmasca apquitsepma.
10 Dios nic nat apquillanay aclhamoclhojo asoc. Yitnec aclhamoclhojo asoc yoyam colhic ayaco Dios. Apquiltamjoc Dios yoyam elpasmoc aplhamoclhojo apquitquic gloria ayitsayolhma apanco. Jesucristo aptomja alhta apquilvomquiscama tap. Aptimescasquic alhta Dios etnejic apyimtalhnamo Apquitca, ayinyema aplingaycamco acmasca. 11 Aplhamoclhojo enlhitaoc apquilponquinomap apquiltomja Apquilyapam Dios. Najan Apquitca aptomja apponquinquiscama enlhitaoc aptomja Apyap Dios. Am alhta emancac Dios Apquitca etnejic apquilvisay apquilyalhinga. 12 Aptomjac nic nat Dios Apquitca aclhanma actalhesomalhca:
Olngacsic sat nipyesicsa elyalhinga lhip apvisay.
Otnejic sat siyayo lhip naysicsa sicminaycmascama nipyesicsa apcaneyclhilha enlhit
—nic nat intomjac Dios appayvam.
13 Intomjac nic nat aclhanma mocjam:
Moyascamejec sat mataa Dios
—nic nat intomjac. Intomjac nic nat aclhanma mocjam:
Acnec coo aso. Sellhalhmaa apquitquic selmescama alhta Dios
—nic nat intomjac Dios appayvam.
14 Apquiltomjacpec apquilvisay Dios apquitquic, ayinyemaclha apquilyovoclhojo innac enlhitaoc. Acno najan aptomjayclho apyovoclhojo Jesús, aptomjayclho enlhit apanco. Apmatnec sat ancoc Jesús, etvacsic sat acmovan yavey diablo actomja ningitsepma avisqui ac. 15 Jesús aptomja apquilvoyclha aplhamoclhojo enlhitaoc apquiltomja apquilay ningitsepma aclhamoclhojo acnim apquileyvam. 16 Am alhta eltamjoc Jesús yoyam epasmoc ángeles. Apquiltamjoc alhta epasmoc enlhitaoc apquiltomja Abraham aptovana niptamin. 17 Incaymalhquic alhta Jesús etniclhac enlhit apanco apno apquilyalhinga. Yoyam etnejic apquimlaycmo nipyesicsa. Yoyam najan etnejic Dios apquilancam apyimtalhnamo. Yoyam emascocsic melyascalhma enlhitaoc. 18 Aplingamcoc alhta acmasca Jesús, aplingamcoc alhta najan acyipconma. Eycaso ayinyema apmopvan Jesús epasmoc enlhitaoc apquiltomja apquillingaycamco acyipconma.
© © Biblia en Enhlet (Lengua Norte) © Paraguayan Bible Society, 1995.
