Actomjaclha nelha appayvam Jacob
1 Apcanyam nic nat apquitquic Jacob. Aptomjac nic nat apquilanya: —Elmiyanta jilip. Oltimnacsic sat asoc yoyam colvac sat:
2 Elmiyanta jilip quellhip Jacob apquitquic.
Elaylhojo apquilyap appayvam sicvisay Israel.
3 Rubén, lhip aptomja sictamongvoyam apvaneycaoc apmamyi.
Coo ayinyema apyimnatem lhip najan apvascapma.
Aptomja apyimtalhnamo apanco najan apmopvan apanco.
4 Metnejec sat mataa apmamyi lhip,
ayinyemaclha acpecjay mataa apvalhoc lhip,
malha yingmin ayactamalhca.
Aptovasquic alhta lhip sicyitnamaclha,
ayinyema appatjetaycaoc lhip moc etava coo.
5 Simeón najan apyalhing Leví.
Yitnec apquilmaycam yoyam ellanac quimpocjacme.
6 Mopasmejec sat mataa apquilpamejitsomap.
Apquilnapquic alhta enlhitaoc naysicsa apquillom.
Alyateyaycam apquiltimescasac vayqui inquinavo naysicsa apquilnayvom.
7 Acmasom anco actemaclha apquillom acyiplomo apquilajem.
Ongvilhpansic sat nipyesicsa enlhitaoc Israel.
8 Judá, apquilayo eltimjic sat apquilyalhing.
Apyimnatem sat etnejic, melhoyc sat cotnaja ingmoc.
Eljalhec sat lhip apquilyalhinga eltimjic apquilayo.
9 Judá, lhip aptomja sictamongvoyam, malha yamacmeyva ayitcoc.
Inyinyovquic sat ancoc acyamonquilhma, quilhvo coytic.
Malha yamacmeyva acyivey intomjac.
Mongvanquejec onlhaticjacsic.
10 Copvanquejec lhama enlhit eyinyovsic apmaycam apmic memong yayem vajic.
Evac sat actomja apancoc apanco memong yayem vajic.
Elyejiclhojoc sat aplhamoclhojo enlhitaoc.
11 Aptomja aptetem tama uva yamit yamelyeyjaycoc.
Uva yingmenic aptomja apyimyescama apava.
Nasoc anco actomja uva yingmenic.
12 Apataoc actomja alpasyam, malha uva yingmenic.
Apmaoc actomja almopoy anco, malha vayqui neme ac apyingmenic.
13 Zabulón elhic sat niyava yingmin acvanyam.
Acpayjo acyitnamaclha mataa barco actiyascam nayingmin.
Nicja yoclhilhma, acvocmo tingma Sidón.
14 Isacar aptomja malha yamelyeyjaycoc acyimnatem.
Inquillovcasquic mataa acyampay acyancaclha.
15 Apvitac mataa actamila anco yoclhilhma.
Apyispaquic mataa apquillovquiscama apyampay.
Apsovquic mataa apquilpatam.
Aptomja apquiltimesaycam cotningvoyam nelha.
16 Dan sat etnejic apcanama apmolhama,
apno apvisqui apquilmolhama Israel.
17 Dan etnejic sat malha nimisma,
malha yamacyeyva avalhoc amay.
Coticlhic sat apminic nolhing.
Etyamoc sat aptomja apquinamtem.
18 Lhip Visqui ajac, aljalhnec coo jevomsic tap.
19 Evotac sat apnaclha Gad singilpilhtetemo quimpocjacme.
Apyimnatem sat etnejic lhip. Eminlhinam sat maa.
20 Aser etac sat metlaycaoc pan.
Eltingyac sat aptoycaoc maa apquilviscaa.
21 Neftalí aptomja malha popyit apmapyiminta.
Apquilyancac apquitcoc apquiltamila.
22 José aptomja malha yamit ayimja nicja yingmin.
Cascama acyilhna as yamit. Inpayjeclhec mataa actingaoc.
23 Apquiltanovquic mataa apquilsoycam pilhpaalh.
Apquilyotac mataa yanca. Innec mataa alyasa olhma.
24 Alyimnatem apictingaoc innac José.
Cayjec anco apjalhtapongam yanca.
Appasmom aptomja mataa apquiltamilquiscama enlhitaoc Israel.
25 Appasmom aptomja Dios Visqui pac lhip apyap.
Appasmom aptomja Dios Apyimtalhnamo.
Apcaycaoc conyemac sat netin.
Apcaycaoc conyemac sat ayaptovnilha yingmin.
Apcaycaoc conyemac sat avalhoc inquin actomja sat actom neme.
26 Aplingac lhip actamila sicpayvam,
am colhnoc actemaclha siclingay apquilpayvam selyeyjamcaa.
Malha inquilhe acvinatem sat cotnejic,
comasquingvomejec sat mataa actamila sicpayvam.
Actemaclha aplingay lhip José, aptomja lhip apyacyesomap nipyesicsa apquilpipma.
27 Benjamín aptomja malha asoc navjac aclom.
Intovquic mataa alhtoo acyamonquilhma.
Actalhnam sat emlascoc asoc apsayquinta
—nic nat intomjac appayvam Jacob.
Apquitsepma Jacob
28 Eycaso apquilvisay 12 apquilmolhama Israel. Eycaso actamila appayvam apquilyap apquilanama apquitquic.
29 Aptomjac nic nat apquilyap apquilanya: —Incamquitvaac acnim yoyam ongvitsapoc. Jelatoynvoclha sat apquilatoynamaclha sicyeyjamcaa, acpayjo amyip apác enlhit apvisay Efrón. 30 Acvisay yoclhilhma Canaán. Moc acvisay amyip Macpela acpayjo tingma pac Mamre. Abraham alhta apmam apyanmonquiscama acyiplomo amyip apác Efrón. Apquiltamjoc alhta cotnejic apquilatoynamacpilha apmolhama. 31 Apcatoynacpec alhta maa Abraham najan aptava Sara. Apcatoynacpec alhta maa Isaac najan aptava Rebeca, najan maa etava Lea. , 32 Eycaso amyip actomja ningatoynamalhquilha actomja acmomalhca siclhoc alhta ayinyema enlhitaoc hititas apquilyamasma— nic nat aptomjac Jacob.
33 Appenasquic nic nat appemjitquiscama apquitquic Jacob. Apyitnaclhec nic nat apyitnamaclha. Apquitsepquic nic nat.
© © Biblia en Enhlet (Lengua Norte) © Paraguayan Bible Society, 1995.
