Apvoy Esdras tingma Jerusalén
1 Apnec nic nat apvisqui co Persia, apvisay Artajerjes. Lhama enlhit sacerdote aptavin apvisay nic nat Esdras. Apquilyeyjamcaa ilhnic nat Seraias, najan Azarías, najan Hilcías, 2 najan Salum, najan Sadoc, najan Ahitob, 3 najan Amarías, najan Azarías, najan Meraiot, 4 najan Zeraías, najan Uzi, najan Buqui, 5 najan Abisúa, najan Finees, najan Eleazar, najan Aarón siclhoc nic nat sacerdote. 6 Apyascamco Dios appayvam nic nat Esdras. Apyascamco ilhnic nat apcanamaclha Dios aplingascama ilhnic nat Moisés. Apyiplovcasquic nic nat apcanamaclha Dios. Am nic nat emyavac apvisqui Artajerjes asoc apquilmalhnaycam Esdras. Apyinyovquic nic nat tingma pac Babel. 7 Appecjam nic nat eyacsic tingma Jerusalén. Apquillhalhmaa ilhnic nat poc israelitas sacerdotes, najan levitas, najan enlhit apquilminaycmascama, najan apquiltamilquiscama tingma apponquinomap najan apquiltimesaycam maa. Invocmec nic nat siete años aptimem apvisqui Artajerjes. 8-9 Aplhalhma ilhnic nat Dios sacerdote Esdras, yoyam epasmoc mataa. Apquilimpaclhec nic nat tingma Babilonia lhama acnim primero, najan lhama piltin primero, najan año septimo, ningiltimem siete años aptimem apvisqui Artajerjes co Persia. Apquilvocmec nic nat tingma Jerusalén lhama acnim primero, cinco piltin quinto, año nac jay apquilimpayclha siclho. 10 Inlhenquic nic nat apvalhoc Esdras, esavojo apyascamco najan apyiplovquiscama apcanamaclha Dios. Elyasingvomoc sat apnaymacoc israelitas apcanamaclha najan apcascamaclha Dios.
11 Eycaso acvisay anit vaycajac acno moc siclho aptalhescama ilhnic nat apvisqui Artajerjes, yoyam elyipsitic sacerdote Esdras, aptomja maestro najan apyascamco singanamaclha najan singascamaclha Dios Visqui apancaoc israel. Intomjac nic nat aptalhescama:
12 Inlhenquic evalhoc sicvisay visqui Artajerjes, lhip Esdras, apvisay sacerdote najan maestro apyascamco singanamaclha Dios apna netin.
13 Yitnec coo siyanama: Apvanquic moclhama apnaymacoc, najan levitas najan sacerdotes, eltimjic apquillhalhmaa lhip, yoyam eltajiclhac tingma Jerusalén. 14 Coo najan siete apquilviscaa ningilpamejitsomalhca, ongilapajacsic lhip yoclhilhma Judá najan tingma Jerusalén, eyasamcojoc maa yavamlha eltimjic, yoyam colhic acyiplovquisa apcanamaclha Dios. 15 Elpatmaoclha sat plata najan oro ningmescama nasa coo najan apquilviscaa ningilpamejitsomalhca. Cotnejic sat macmescama Dios Apvisqui apancaoc Israel apnaclha tingma Jerusalén. 16 Ingyansiclha sat mocjam plata najan oro yoclhilhma Babilonia, najan apquilmescama nasa enlhitaoc najan sacerdotes metnaja israelitas. Epatmaoclhac sat lhip, coytic sat congne Dios tingma pac apponquinomap payjoc tingma Jerusalén. 17 Iyinyov sat lhip acyanmongam vayqui inquilinava, najan nipquesic apquilinava najan nipquesic apquitcoc. Elmoc sat najan trigo apyilhna, najan uva ayingmenic macmescama Dios congne tingma apponquinomap, apmaclha Dios Visqui apancaoc quellhip, payjoc tingma Jerusalén. 18 Am sat ancoc elsovjac quellhip oro najan plata, iyasamcojo sat lhip najan apnaymacoc yavamlha eltimjic napato Dios. 19 Elpatmaoclha sat najan asoc apquilmaycam sacerdotes congne tingma apponquinomap. Ininquin sat lhip as asoc Dios tingma pac tingma Jerusalén.
20 Itingyasquis sat moc asoc ayaymomalhca tingma apponquinomap, elmoc sat lhip almacenes apvisqui tingma pac. 21 Coo sicvisay visqui Artajerjes. Otnejic sat ongvanic apyovoclhojo apquiltamilquiscama ningilnatam as yoclhilhma nicja vatsam Éufrates: Noelmiyov nasa asoc, apquilmalhna inlhojo Esdras, sacerdote najan maestro apyascamco singanamaclha Dios apna netin. 22 Noelmiyov nasa acvaycmo tres mil trescientos kilo plata, najan ventidós mil litros trigo apactic, najan dos mil doscientos litros aceite, najan acyovoclhojo yasic aymomalhca — sat otnejic ongvanic.
23 Otnejic sat ongvanic mocjam: Noelmiyov nasa asoc, apmayavo inlhojo Dios apna netin, yoyam coytic tingma pac apponquinomap. Molngamquejec sat coo apyanmongsayclha Dios sictemaclha coo najan eyitquic najan siyanamaclha coo. 24 Elyasamcojo mocjam: Noeltingya nasa acyanmongam tributo, najan impuesto, najan derechos nipyesicsa sacerdotes, levitas, apquilminaycmascama, apquiltamilquiscama tingma apponquinomap, apquiltimesaycam tingma aponquinomap najan poc apquiltimesaycam maa — sat otnejic ongvanic.
25 Lhip Esdras, apyascamco nac lhip ayinyema Dios. Itingyasquis sat lhip enlhit apquilyicpilquemo najan yatapquilviscaa, colhic acyiplovquisa nintemaclha acpeyvomo nipyesicsa enlhitaoc apquileyvam yoclhilhma nicja vatsam Éufrates, nipyesicsa enlhitaoc apquilyascamco singanamaclha Dios. Elyascasingvom sat enlhitaoc melyascamco singanamaclha Dios. 26 Apsilhnanacpec sat ancoc apanco enlhit meyiplovquisa singanamaclha Dios najan singanamaclha apvisqui, ematong sat, poc sat emacpoc, poc sat eyinyoc acyanmongam multa, poc sat ingyalhimsacpoc singilpilhtetomaclha. Vamlha — nic nat intomjac vaycajac.
Apquilmalhnancama Esdras
27 Eycaso ilhnic nat apquilmalhnancama Esdras: Innec ayaco lhip Dios Visqui ingac najan ningilyeyjamcaa apvisqui apancaoc. Apcasinaquic alhta lhip apvisqui rey, colhic allanayclha mocjam tingma apponquinomap payjoc tingma Jerusalén. 28 Innec alhta seyaco ayinyema lhip, napato apvisqui rey, najan consejeros apquilasinancama, najan napatavo apquilyimtalhnamo. Epasmec alhta lhip siyansayclha apquillhalhmaa israelitas apquilyimtalhnamo, ongiltajiclhac sat ningaoclha — nic nat intomjac apquilmalhnancama.
© © Biblia en Enhlet (Lengua Norte) © Paraguayan Bible Society, 1995.
