Apquilinmelhaycam cotnaja ingmoc
1 Inlingalhquic nic nat amyaa nipyesicsa cotnaja ingmoc, yoyam ellanacpoc mocjam tingma apponquinomap enlhitaoc apquilmomap nano co Judea najan co Benjamín apquilvactama mocjam. 2 Apquilmiyaclhec nic nat cotnaja ingmoc apnaclha Zorobabel najan Josué najan apquilviscaa maa.
Apquiltomjac nic nat apquilanya: —Jingilane sat ongilpasmoc nincoo lha tingma apponquinomap. Yitnec nincoo lha ningilayo Dios acno apquilayo quellhip. Yitnec mataa ningmescama asoc macmescama Dios, siclhoc nat aptimem apvisqui Esar-hadón, apvisqui co Asiria, aptomja ilhnic nat singnalayquinta as yoclhilhma.
3 Apquilatingmavoc nic nat Zorobabel, najan Josué najan poc apquilviscaa: —Mongvanquejec nimpasmeyquiclha ongillana tingma apponquinomap, ningilvamlha nincoo ningilvisay enlhitaoc Israel. Eycaso alhta singanama apvisqui Ciro yoclhilhma Persia.
4 Apquilinmelham nic nat mataa actomja apquilaoclha, yoyam elvatsamcoc apquillanay tingma apponquinomap. 5 Apquilpamejitsacpec nic nat apquilinmelhaycam nipyesicsa apquilviscaa, colhic acmesa acyanmongam, elinmelham sat apquilpasmeyquiclha. Eycaso apquiltemaclha apancaoc ayenmo aptimem apvisqui Ciro de Persia acvaycmo aptimem apvisqui Dario de Persia. 6 Aptimec nic nat apvisqui Asuero, apvita vaycajac actalhesomalhca ayinyema cotnaja ingmoc yoyam elinmelham apquillanay tingma co Juda najan co Jerusalén. 7 Naysicsa aptimem nic nat apvisqui Artajerjes, apvisqui co Persia, Bislam, Mitrídates, Tabeel najan apnaymacoc apnatalhesa ilhnic nat vaycajac elyipsitic apvisqui Artajerjes. Arameo appayvam nic nat actalhesamalhca najan acpeyvescasquiclha. 8 Moc vaycajac aptalhescama nic nat comandante Rehum, najan secretario Simsai actemaclha apquilinmelhaycam apquillanay tingma co Jerusalén. Apvitac nic nat vaycajac apvisqui Artajerjes. 9-11 Eycaso ilhnic nat apnatalhescama comandante Rehum, secretario Simsai, apnaymacoc apquilyicpilquemo, apquilviscaa singilpilhtetemo co Persia, co Erec, co Babilonia, co Susa acvisay Elam. Najan maa poc enlhitaoc apnalayquinta ilhnic nat apvisqui apyimtalhnamo apvisay Asnapar. Apquilnesquic nic nat as enlhitaoc yoclhilhma Samaria vatsam Éufrates, payjoc actalhningvamlha acnim. Eycaso apnatalhescama vaycajac:
Lhip visqui Artajerjes. Vaycajac ayinyema nincoo, ningiltomja lhip ningiltimesaycam, ningileyvam vatsam Eufrates, payjoc actalhningvamlha acnim:
12 Yitnec amyaa ongilyascasingvomoc lhip visqui ingac apquiltemaclha judíos. Apquilyinyovquic alhta yoclhilhma lhip apcanamaclha. Apquilvoctac tingma Jerusalén ningyesicsa, yoyam ellanac mocjam tingma apnamcaclha enlhit apquilmapsomcaa. Apquiltamjam apquillanayclha apjalhtam mataymong, najan apquillanayclha tingma apvajac. 13 Iyasamcojo sat lhip mocjam: Apquilpenasquic sat ancoc apquillanayclha apjalhtam mataymong najan apyovoclhojo tingma. Melmecsejec sat acyanmongam tributo as enlhitaoc, melmecsejec sat acyanmongam impuestos najan derechos. Cosovjalhcac sat mataa solyayem apvisqui tingma pac. 14 Ningilancam nincoo lhip visqui ingac, colhejec sat acvenná lhip visqui ingac. Eycaso ayinyema ningilapajascama soycam amyaa, colhic altimnasa lhip. 15 Lhip apquilyeyjamcaa apnatalhesa nano vaycajac, apquillhenacpoc nat as enlhitaoc apquilmapsomcaa apquilinmelhaycam mataa visqui mayayo najan yatapquilviscaa moc yoclhilhma. Aptovasacpec nat as tingma ayinyema apquiltemaclha apancaoc. 16 Iyasamcojo sat lhip mocjam: Apquilpenasquic sat ancoc apquillanayclha tingma najan apjalhtam mataymong, comascoc sat aptimem lhip apvisqui vatsam Éufrates, payjoc actalhningvamlha acnim — nic nat intomjac vaycajac.
17 Apcapajasquic nic nat vaycajac apvisqui Artajerjes, apcatingmavo:
Lhip comandante Rehum, lhip secretario Simsai najan apquillhalhmaa co Samaria najan yoclhilhma vatsam Éufrates payjoc actalhningvamlha acnim: Saludos.
Acvitac alhta vaycajac 18 selapajasquiscama alhta quellhip. Inquilyipsatalhquic alhta sicnaclha coo actemaclha nimpayvam. 19 Invitalhquic alhta vaycajac actalhesomalhca nano ningilyeyjamcaa. Apquillhenacpec enlhit apquilmapsomcaa nano as tingma, apquiltemaclha apquilinmelhaycam apquilpasmeyquiclha apnaymacoc, yoyam eltovacsic apquilviscaa nano. 20 Apnam alhta nano apquilviscaa apquilyimtalhnamo tingma Jerusalén. Apquillhocac nat acyanmongam tributo, najan impuestos najan derechos ayinyema enlhitaoc apnaycam yoclhilhma vatsam Éufrates, payjoc actalhningvamlha acnim. 21 Elane sat quellhip, yoyam elvatsamcoc enlhitaoc apquillanay tingma. Coo sat ongvanic, yavamlha sat cotnejic ellanacpoc apquillanay tingma. Coo sat ongvanic, yavamlha sat cotnejic ellanacpoc mocjam as tingma. 22 Noelpamijitsacpojo nasa enlhitaoc, coyantavomejec sat acmasom yoclhilhma ningileyvomaclha — nic nat intomjac vaycajac.
23 Inquilyipsatalhquic nic nat vaycajac ayinyema apvisqui Artajerjes napato Rehum, napato Simsai secretario najan apnaymacoc. Apquilpasmeclhec nic nat apquilmiyaclho tingma Jerusalén, apquilanama elvatsamcoc apquillanay tingma quilhvoc anco. 24 Am nic nat ellanacpoc mocjam tingma apponquinomap tingma Jerusalén, acvaycmo segundo año aptimem apvisqui Darío co Persia.
© © Biblia en Enhlet (Lengua Norte) © Paraguayan Bible Society, 1995.
