Apilhquipcoc enlhitaoc apjapaoc
1 Emongvavoc alhta Visqui ingac, apnesa espíritu apanco evalhoc coo. Eyantamaclhec alhta amyip acyivey anco. Pilapcasquic sicvita enlhit apjapaoc, cotlaycaoc apilhquipcoc. 2 Eyantamaclhec alhta lhalhma anco, sicvita apilhquipcoc cotlaycaoc, alyamay anco. 3 Aptomjac alhta seyanya coo: ¿Apcanayqui ya lhquip as apjapaoc, yoyam enalhaticjangvomoc mocjam? — alhta aptomjac. Lhaja, lhip Visqui ingac apyasamcoc yavamlha cotnejic — alhta actomjac coo.
4 Aptomjac alhta seyanya Visqui ingac: Ilngas sat lhip sicpayvam apquillhenacpo apjapaoc. Itne sat lhip ingyanic: Quellhip apjapaoc, elaylhojo Visqui ingac appayvam. 5 Eycaso Visqui ingac appayvam: Olhnecsic sat mocjam apquilvalhoc quellhip. Enalhaticjangvomoc sat mocjam. 6 Colhic sat quellhip apjapitic alhnancoc, najan apjac alhnancoc, najan apyimpeoc alhnancoc, najan apquilvalhoc alhnancoc. Jelyicpilcangvomoc sat quellhip sicvisay Visqui apancaoc — alhta aptomjac seyanya. 7 Aclingasquic alhta appayvam, acno siyanyomalhca otnejic. Pilapcasquic alhta siclinga ayilhtingyovam malha acyovjeycam lhopactic. Inquilyipitcaclhec apilhquipcoc moc apilhquipcoc. 8 Acvitac alhta apjapitic alhnancoc acyipitcayclho apilhquipcoc, najan apjac apancaoc, najan alhnancoc apyimpeoc apquiltomjayclho enlhit apjalhnancaoc, mepqui mocjam apquilinamam, mepqui apquilvalhoc mocjam.
9 Aptomjac alhta Visqui ingac seyanya coo: Ilngas sat mocjam sicpayvam, yoyam elyimnavomoc as apjapaoc apquiltomjayclho apjalhnancaoc. Eycaso appayvam ayinyema Visqui ingac: Alhcajayam cotnesquisic sat apquilinamam as apjapaoc, conyemac sat ningyava lhalhma anco — alhta aptomjac. 10 Aclingasquic alhta Visqui ingac appayvam. Pilapcasquic alhta alantepa apquilinamam as apjapaoc, apnalhaticjangvocmo, apcaneclho netin. Apquilvitacpec alhta enlhit appintalhnama.
11 Aptomjac alhta mocjam Visqui ingac seyanya coo: Apquilyitsomacpo israelitas as apjapaoc, apquilitsepma siclho. Yitnec apquillhanma: Alyamay anco ingilhquipcoc nincoo, mepqui ninginamam, ningiltomja ningyinyovmalhca — apquiltomjac. 12 Lhip enlhit, ilngas sat mocjam sicpayvam sicvisay Visqui apancaoc: Quellhip enaymacoc, oljalhyovacsic sat coo tacjalhpopayc enalhaticjangvomoc sat quellhip, eltajiclhac sat mocjam apquilaoclha Israel. 13 Jelyicpilcangvomoc sat sicvisay Visqui apancaoc, apquilvita inlhojo sictomjaclha nipyesicsa quellhip. 14 Ovatipnapoc sat espíritu ajanco apquilvalhoc quellhip, eleyoc sat mocjam quellhip, eltajiclhac sat mocjam apquilaoclha apancaoc. Jelyicpilcangvomoc sat sicvisay Visqui apancaoc quellhip, siclhanma coo najan sictomjaclha coo. Naso coo sicpayvam sicvisay Visqui apancaoc — alhta aptomjac.
Apquilpasmeyquiclha co Judá najan israelitas
15 Aptomjac alhta Visqui ingac seyanya coo: 16 Ilic sat lhip yamit apqueleneycam, ilcajas sat yamit ayimpejic apvisay Judá najan apquilvisay apnaymacoc. Ilic sat moc yamit apqueleneycam, ilcajas sat ayimpejic apvisay José, moc apvisay Efraín, najan apquilvisay apnaymacoc israelitas apyovoclhojo. 17 Itne sat lhip apmaycam apmic yamit acyipitcayclha moc. 18 Elmalhnacpoc sat lhip aptomjaclha maa. 19 Ingyatingmojo sat lhip: Eycaso Visqui ingac appayvam: Lhama yamit acyitsomalhca apvisqui apquilmolhama José, quilhvo nac jay apvisqui apquilmolhama Efraín. Moc yamit acyitsomalhca apvisqui apquilmolhama Judá najan apnaymacoc. Apmaycam lhip apmic acyitsomalhca apquilpasmeyquiclha lhama apvisqui. 20 Imyasiclha netin as yamit alcajasomalhca, apmaycam lhip apmic, napatavo enlhitaoc. 21 Itne sat lhip ingyanic: Eycaso appayvam ayinyema Visqui ingac: Ongvansiclhac sat apyovoclhojo israelitas apnaycam moc yoclhilhma apquilhpanyam, colhic sat acnalaclho mocjam apquilaoclha. 22 Elhnam sat maa apquilpasmeyquiclha lhama apvisqui apancaoc, payjoc acnamcolha inquilhe Israel. Comascoc sat apquiltemaclha apcanit apquilviscaa nipyesicsa apnaymacoc, etniclhac sat lhama apvisqui nipyesicsa maa. 23 Comascoc sat apquilayo quilaycmasquiscama najan apquiltemaclha melyascalhma. Comascoc sat apquiltemaclha apquilsilhnanomap apanco najan apquillhinganyam. Otnejic sat enlhit ajancaoc, otnejic sat apvisqui apancaoc Dios. 24 Lhama sat etnejic apvisqui apancaoc, apno ilhnic nat apvisqui David. Elyiplovcasojoc sat siyanamaclha coo najan siyascamaclha. 25 Elhnam sat as yoclhilhma aplhoy nic nat selancam Jacob, apquileyvomaclha apquilyeyjamcaa quellhip. Elhnam sat mataa apquitquic najan aptovana. Lhama apvisqui sat nipyesicsa, apno ilhnic nat David. 26 Ollanac sat pacto ningmiyovmalhca nipyesicsa maa, yoyam colhic sat actamilaycam apquilvalhoc cotmongvoycamlha nelha. Elhamiclhac sat israelitas eltimjic appintalhnama. Elvitac sat mataa tingma apponquinomap nipyesicsa, jeltimjic selayo. 27 Olhic sat coo nipyesicsa maa, otnejic sat enlhit ajancaoc, otnejic sat Dios Visqui apancaoc. 28 Elvitac sat metnaja israelitas tingma apponquinomap nipyesicsa enlhit silyacyescama coo, sictomja Dios Visqui apancaoc israelitas — alhta aptomjac.
© © Biblia en Enhlet (Lengua Norte) © Paraguayan Bible Society, 1995.
