Apquiltemaclha edomitas payjoc Seir
1 Aptomjac alhta Visqui ingac seyanya coo: 2 Lhip enlhit, ilngas sat lhip sicpayvam nipyesicsa co Seir. 3 Itne sat lhip elanic maa:
Eycaso appayvam ayinyema Visqui ingac: Quellhip co Seir, apquiltomjaclhec quellhip cotnaja ingmoc. Pac oyanmongsiclhac sat apquiltemaclha apancaoc quellhip edomitas. Cotniclhac sat yoclhilhma actamopeycaoc najan mepqui enlhit.
4 Enatovasacpoc sat tingma apancaoc, etniclhac sat yoclhilhma actamopeycaoc. Jelyicpilcangvomoc sat quellhip sicvisay Visqui apancaoc — alhta aptomjac.
5 Quellhip apquiltemaclha apquiltanoncama, najan apquilimpocjay nipyesicsa israelitas, ayinyema sicyanmongsayclha apquiltemaclha apancaoc israelitas apquilmapsomcaa. 6 Naso coo siclhanma mepqui sicyeycajascaoc sicvisay Visqui: Quellhip alhta apquilnapma israelitas, eticyoc sat quellhip lha, elminlhinacpoc sat maa. 7 Yoclhilhma Seir apquileyvomaclha edomitas cotniclhac sat yoclhilhma actamopeycaoc, mepqui enlhit apquileyvam. 8 Elvitacpoc sat apjapaoc ayinyema apquilimpocjay, lhalhma anco netin inquilhe najan alvata, najan payjoc vatsam, mengyascama apjapáoc. 9 Metyisamejec sat enlhit tingma apvanyam aptomja aptamopeycaoc. Jelyicpilcangvomoc sat quellhip sicvisay Visqui apancaoc — alhta aptomjac.
10 Yitnec alhta apquilpamejitsomap quellhip: Ontimjic inganco yoclhilhma Judá najan yoclhilhma Israel. Am alhta colhenac apquilvalhoc quellhip, actomja coo ajanco as yoclhilhma. 11 Naso coo siclhanma mepqui sicyeycajascaoc, oyanmongsiclhac sat apquiltemaclha apancaoc quellhip. Jelyicpilcangvomoc sat sicvisay Visqui apancaoc. 12 Aclingac alhta aclhamoclhojo apquilpayvam quellhip apquilinmelhaycam israelitas. Apquiltomjac alhta quellhip: Apquiltamopamquic apquilaoclha israelitas, noc, ¡ontimjic inganco as yoclhilhma! — alhta apquiltomjac quellhip. 13 Apquilantipcasquic alhta sicvisay selinmelhaycam coo, alhta intomjac siclingay.
14 Naso coo sicpayvam sicvisay Visqui apancaoc: Onatovacsic sat quellhip, elitsovacsojoc sat enlhitaoc, apquilvita inlhojo sictemaclha. 15 Apquilitsovasoc alhta quellhip apquilvita macnatovascama yoclhilhma israelitas. Ellingamcojoc sat quellhip edomitas co Seir acno moc. Jelyicpilcangvomoc sat sicvisay Visqui apancaoc — alhta aptomjac.
© © Biblia en Enhlet (Lengua Norte) © Paraguayan Bible Society, 1995.
