Enlhit apquilyimtalhnamo nipyesicsa israelitas
1 Aptomjac alhta Visqui ingac seyanya coo: 2 Lhip enlhit, ilngas sat sicpayvam nipyesicsa apquilyimtalhnamo israelitas, apquilyitsomacpo apquilancam nipquesic: Eycaso sicpayvam sicvisay Visqui apancaoc: Quellhip layi apquiltamilquiscama enlhit ajancaoc. ¡Quellhip apquiltomja apquiltamilsomacpo apanco! Apquilanyacpec quellhip eltamilsic enlhit, apquilyitsomacpo sicnatoscama. 3 Apquiltingyac mataa quellhip leche ayinyema sicnatoscama, najan apquillanay apava apquinyema sicnatoscama apva, najan apquilnapma sicnatoscama apnamilay, yoyam eltovamcoc. Am alhta eltamilcasac mataa sicnatoscama. 4 Am alhta elpasmac quellhip sicnatoscama melyimnatem, am eltamilquiscacmoc acmasca apyimpeoc, am eltamilquiscacmoc alintem apmeoc, am elsovjam apquillhinganyam najan apquilhpaneycam. Quellhip apquiltemaclha apquilasquiscama apyimpeoc sicnatoscama. 5 Apquileyvec sicnatoscama mepqui apquiltamilquiscama, apquilhpanec alhta, asoc navjac aclom alhta alnapma najan altovcamco. 6 Apquillhinganacmec alhta netin inquilhe alvinatem najan alyavatem, paj lhama enlhit yoyam esovjam sicnatoscama.
7 Quip elaylhojo quellhip apquilancam sicnatoscama. 8 Yitnec coo siclhanma mepqui sicyeycajascaoc: Apticyovquic alhta sicnatoscama ayinyema asoc navjac alnapma najan altovcamco. Mepqui apquilancam alhta sicnatoscama, paj lhama yoyam esovjam sicnatoscama. Apquiltomja apquiltamilsomacpo apanco, am eyca eltamilcasac sicnatoscama. 9 Quip elaylhojo quellhip apquilancam sicnatoscama: 10 ¡Actingyac coo sicnatoscama! ¡Quellhip apquiltomjayclho cotnaja ingmoc! ¡Colapvanquejec quellhip eltamilsic mocjam sicnatoscama, colapvanquejec eltamilsacpojo mocjam apancavo! Olnatamoc sat quellhip sicnatoscama, meltovamquejec sat mocjam quellhip — alhta aptomjac.
Apquilancam aptamila
11 Aptomjac mocjam Visqui ingac: Coo sat otnejic sictamilquiscama sicnatoscama. 12 Onalovsingvoclhac sat coo sicnatoscama apquililhpanyam moc yoclhilhma lhalhma anco. Apquilhpanec alhta naysicsa yatescamalhma najan yatepiyam. 13 Onalovsingvoclhac sat yoclhilhma apquileyvomaclha metnaja israelitas. Ongvansiclhac sat mocjam apquilaoclha nano. Elvitac sat mocjam aptoycaoc netin inquilhe najan payjoc alvata acyitnamaclha yingmin. 14 Elvitac sat aptoycaoc paat actamila anco, payjoc inquilhe apquileyvomaclha israelitas. Cotlaycaoc maa aptoycaoc, najan actamila anco apquilyinatamaclha sicnatoscama. 15 Coo sat otnejic sictamilquiscama sicnatoscama, onaliclhac sat payjoc apquilyinatamaclha actamila. Naso coo sicpayvam siclhanma, sicvisay Visqui apancaoc. 16 Osovjam sat sicnatoscama apquillhinganyam, yoyam onalovsingvoclhac. Otamilquiscomoc sat ayintem apmeoc (apmic), najan melyimnatem. Otamilsic sat apnamilay najan apquilyimnatem. Oyasamcojoc sat yavamlha otnejic — alhta aptomjac.
17 Yitnec coo mocjam sicpayvam: Quellhip apquilyitsomacpo sicnatoscama, quip elaylhojo: Yitnec apquiltemaclha apancaoc quellhip apquilyitsomacpo yataay apquilinava najan nipquesic apquilinava. 18 Apquiltovcamquic mataa paat actamila, apquiltacmec mataa paat ayaymomalhca, ¿so actomja yi? Apquilyinamquic mataa yingmin actamila anco, apquilpatipcasquic mataa apmeoc yingmin, yoyam copaysomoc, ¿so actomja yi? 19 Aptovcamquic mataa sicnatoscama paat altamomalhca, apquilyinamquic mataa yingmin apquilpaysimquiscama quellhip. 20 Eycaso ayinyema sicpayvam siyanya quellhip: Otamilsic sat coo sicnatoscama melyimnatem, yoyam elmiyovacpoc. 21 Am alhta elmiyavac quellhip sicnatoscama melyimnatem, apquiltomja apquilasquiscama apyimpeoc, yoyam elinyajamcoc. 22 Onalovsingvoclhac sat sicnatoscama, olmeyvoc sat maa. Comascoc sat apquillingaycamco acyimtalhnama.
23 Aptomjac alhta mocjam: Otingyasquisic sat lhama apanco aptamilquiscama sicnatoscama. Elhojoc sat apquilyeyjamcaa David, aptomja nat aptamilquiscama aptamila apanco. 24 Nasoc coo sicpayvam, coo sat otnejic Dios Visqui apancaoc, najan apvisqui rey etnejic sat silyacyescama, apna ilhnic nat David. 25 Ollanac sat pacto ningmiyovmalhca nipyesicsa maa, coytic sat actamilaycam apquilvalhoc. Omascocsic sat aleyvam asoc navjac aclom as yoclhilhma, elmiyovacpoc sat sicnatoscama apquileyvam amyip najan payjoc apquilyinatamaclha coning yamit.
26 Eleyoc sat sicnatoscama niyava inquilhe santo acponquinomalhca, olmeyvoc sat mataa. Ongvapajacsic sat mataa yingmin acmamay. 27 Elvitac sat mataa acyilhna, melacyejec mataa cotnaja ingmoc. Omascocsic sat apquiltemaclha apquilmomap, elyicpilcangvomoc sat sicvisay Visqui apancaoc. 28 Melacyejec sat mataa cotnaja ingmoc yoyam elimpocjac, melacyejec sat asoc navjac aclom, yoyam colnapoc. Elhnam sat mataa naysicsa actamilaycam apquilvalhoc. 29 Mellingamquejec sat mataa mayic, colhejec sat mataa acvenéycam nipyesicsa poc enlhitaoc, elvitac sat cotlaycaoc acyilhna. 30 Jelyicpilcangvomoc sat coo sicvisay Dios Visqui apancaoc, otnejic sat enlhit ajancaoc israelitas. Eycaso siclhanma mepqui sicyeycajascaoc. 31 Quellhip nac sicnatoscama nipquesic apquileyvam ayimjaclha paat amyip ajanco. Coo sicvisay Dios Visqui apancaoc — alhta aptomjac Visqui ingac.
© © Biblia en Enhlet (Lengua Norte) © Paraguayan Bible Society, 1995.
