Apminaycmascama yocsa apquillhenacpo co Tiro
1 Aptomjac alhta seyanya Visqui ingac: 2 Lhip enlhit, imnaycmas sat lhip as ningminaycmascama yocsa apquillhenacpo co Tiro. 3 Tingma apyitna nicja yingmin acvanyam, apquileyvomaclha enlhit apquilyanmongsomap apquilinyema lhalhma anco. Itne sat lhip ingyanic maa:
Ayajamalhco apquilvalhoc quellhip co Tiro, apnaycam tingma aptamila apanco.
4 Apyitsomacpo barco tiyascam nayingmin actamila anco, payjoc yingman acvanyam. Allanomalhca barco enlhit apquilmopvan ellanac barcos.
5 Avalhoc barco allanomalhca yamit, acvisay yamit pinos de Senir. Yamit acvinatem mástil allanomalhca yamit cedro de Líbano.
6 Yamit alyacvom yingmin allanomalhca yamit robles de Basán. Najan yamit cipreses alhta ayimpejic, ayinyema acyayem inquilhe Chipre, najan yamit acmamnave marfil.
7 Apava apyivey appayjem apquinyema Egipto, apma aptalhamavo malha bandera. Carpa appaclhanma alhta apyilhvasem, apquinyema nicja yingmin payjoc Elisa.
8 Apquiltamjaycam enlhit apquilinyema tingma Sidón najan Arvad. Apquillhinquiscama barco alhta apnaymacoc co Tiro.
9 Apquillaneclhec mataa avalhoc barco enlhit apquilinyema Gebal (Biblos). Enlhit marineros apquiltomja apquilhacjam asoc ningmam, alinyema lhalhma anco.
10 Enlhit apquilinyema Persia, najan Lidia, najan Libia, apquiltomja singilpilhtetemo. Apquilsoycam apquilmaycam apquilajapsomap apcatcoc najan apnenyaoc. Malha barco acnalhimsomalhca alhta intomjac.
11 Enlhit apquilinyema Arvad apquilpasmeclhec apquilnapomacpilha netin mataymong apjalhtam tingma. Apquilpasmeclhec tingma nitno enlhit co Gamad. Inquilhnec alhta apquilmaycam apquilajapsomap nicja mataymong apjalhtam tingma, malha acnatanma alhta intomjac. 12 Cotlaycaoc asoc altamila acnaycaoc quellhip actemaclha apquilyanmongsomap apquilinyema tingma Tarsis, apquilpatmeyquinta acyanmongam asoc: plata, najan hierro, najan estaño, najan plomo. 13 Apquilpatmentac asoc apancaoc co Grecia, co Tubal, najan co Mesec. Apquilhaquic alhta esclavos enlhit apquilmomap najan asoc bronce tava apac. 14 Apnalantac alhta nolhing najan yeyjaycoc enlhit co Bet-togarma, yoyam etlhaoc nipyesicsa quellhip. 15 Apquilpatmentac asoc apancaoc enlhit co Rodas, najan enlhit apquilinyema acyayem inquilhe, yoyam etlhaoc asoc acmamnave marfil najan ébano. 16 Apquilpatmentac alhta asoc apancaoc enlhit co Edom, yoyam etlhaoc nipyesicsa quellhip mataymong alyinmom najan acmamnave, najan apava teñidas apma aptalhamavo, najan apava apquillanomap lino, najan asoc acmamnave corales najan rubíes. 17 Apquilpatmentac alhta asoc apancaoc co Judá najan israelitas, yoyam etlhaoc asoc apancaoc trigo apactic ayinyema Minit, najan paat actic, najan yamyovjene, najan aceite, najan bálsamo yamit anyi. 18 Apquilpatmentac alhta asoc apancaoc co Damasco, yoyam etlhaoc nipyesicsa quellhip uva ayingmenic ayinyema Helbón, najan nipquesic apva ayinyema Sahar. 19 Apquilpatmentac asoc apancaoc co Vedán najan co Javán yoclhilhma Uzal, yoyam etlhaoc hierro tava apac, najan canela asoc acmasis najan moc asoc acmasis. 20 Apquilhaquic asoc apancaoc enlhit co Dedán aparejos nolhing apquiltajanquiscama. 21 Apquilmiyantac alhta apquilviscaa de Cedar najan co Arabia, yoyam elmoc asoc nipyesicsa quellhip, yoyam etlhaoc apnatoscama yataay najan nipquesic. 22 Apquilmiyantac alhta apquilyanmongsomap co Sabá najan co Raama, yoyam elmoc asoc nipyesicsa quellhip, yoyam etlhaoc asoc acmasis, najan mataymong alyinmom acmamnave, najan oro. 23 Apquilmiyantac alhta apquilyanmongsomap co Cane, co Harán, co Edén, najan co Sabá, najan co Asiria, najan co Media (Quilmad). 24 Apquilhaquic alhta apava apquilhyevay, najan ningalomalhca púrpura apyilhvasem, najan bordados, najan apava apma aptalhamavo, najan tama. 25 Apquilpatmentac alhta co Tarsis netin barcos cotlaycaoc asoc yoyam etlhaoc.
Apquilyitsomacpo quellhip barco acyivey netin yingmin, acpatmeycam cotlaycaoc apquilnatam.
26 Mocjay aclhingam alhta barco, actomjaclha congno yingmin acvanyam. Cayjec alhta alhcajayam ayinyema actiyapmaclha acnim, acyascama olhma barco aclhingam.
27 Invayvamquic alhta barco, acyiplomo alnatam, najan marineros enlhit najan pilotos apquillhinquiscama, najan apquilyanmongsomap najan singilpilhtetemo.
28 Colngalhcac sat nicja yingmin acvanyam actemaclha apquilpalhamaycam enlhit apquilvayveycaoc.
29 Elyinyoc sat barco apquiltomja apquiltamjaycam, najan marineros najan pilotos apquillhinquiscama barco, yoyam eleyoc sat nalhpop.
30 Elyapcalhic sat maa, elpalacsic sat lhopactic apyitsicsaoc, elhnam sat naysicsa tajap, ayinyema acmayovsa apquilvalhoc.
31 Apquiltingyac apava yamquintim ajac, elantalhniclha actemaclha acmayovsa apquilvalhoc, elyatemenic sat apva, elyapcalhic sat maa.
32 Elminaycmacsic sat actemaclha yocsa naysicsa acmayovsa apquilvalhoc, apquillhenacpo quellhip: ¿Soc enlhit apquilyitsomacpo enlhit co Tiro, apnaycam nicja yingmin acvanyam?
33 Apquilvoctac nipyesicsa quellhip enlhit apquilyanmongsomap apquilpatmeyquinta apquilnatam, apquilinyema lhalhma anco. Cotlaycaoc asoc alhta apquilmam apquilviscaa as nalhpop, apquiltomjayclho acma apquilnatam.
34 Apquilvayvamquic quellhip quilhvo nac jay, actomjaclha congno yingmin. Apquilvayvamquic apyovoclhojo apquiltamjaycam netin barco, najan maa apquilnatam.
35 Intiyacmec apquilvalhoc enlhitaoc moc yoclhilhma, najan maa apquilviscaa, avanjec ayay apquilvalhoc, apquilvita actemaclha apquilvayveycaoc quellhip.
36 Intiyacmec apquilvalhoc apquilvita enlhit moc yoclhilhma. Apquiltomjaclhec quellhip apquilmasquingvoyam, yoyam elavojoc sat enlhitaoc. Inmasquec apquileyvam quellhip cotningvoyam nelha — alhta aptomjac.
© © Biblia en Enhlet (Lengua Norte) © Paraguayan Bible Society, 1995.
