Apcanyomap profeta Ezequiel
1 Invitac alhta mocjam sicvanmoncama. Aptomjac alhta seyanya: Lhip enlhit, itnimiclha netin. Opamejitsic sat lhip — alhta aptomjac seyanya. 2 Intalhnec alhta evalhoc Dios apmopvan apanco naysicsa sepamejitquiscama. Etnimcasquic alhta netin coo. Aclingac alhta sepamejitquiscama. 3 Aptomjac alhta seyanya: Ongvapajacsic sat lhip apvisay enlhit nipyesicsa israelitas, selinmelhaycam mataa coo. Ayinyema ilhnic nat apquilyeyjamcaa selinmelhaycam coo, acvaycmo as ningvamlha nac jay. 4 Najan maa apquitquic selinmelhaycam coo, malha acyeyjamelhma apquiltomjac. Ongvapajacsic sat lhip, yoyam etnejic elanic lhip: Eycaso appayvam apanco Dios Apyimtalhnamo. 5 Elaylhojoc sat, paj lhaja. Apquiltomja selinmelhaycam coo. Elyasamcojo sat as enlhitaoc, apna profeta aplingascama sicvisay nipyesicsa maa. 6 Lhip enlhit, nongya nasa enlhitaoc, nongya nasa apquilpayvam. Colhojoc sat aptiyascam lhip nipyesicsa, malha naysicsa amaoc, naysicsa aleyvam yitaja. Nongya nasa lhip apquilpayvam apquiltomja selinmelhaycam coo. 7 Ilngas sat lhip sicpayvam nipyesicsa maa. Elaylhojoc sat, paj lhaja. Avanjec apquiltemaclha selinmelhaycam coo. 8 Lhip, ingyeylhojo sat sicpayvam, yoyam elngacsic lhip. ¡Nojeyinmelham nasa lhip! Imayes siclho apatong, itov sat asoc yoyam omquecsic lhip — alhta aptomjac seyanya.
9 Acvitac alhta apmic acpeyvesamalhca acyiplomo vaycajac. 10 Apmayesquic alhta najato vaycajac actalhesamalhca lhama nicja najan moc nicja. Inlhenalhquic maa actemaclha ninlingaycamco acmasom, actemaclha layi, yoyam covac sat — nic nat aptomjac profeta.
© © Biblia en Enhlet (Lengua Norte) © Paraguayan Bible Society, 1995.
