Actemaclha ningmasquem
1 Aptomjac nic nat Dios Apyimtalhnamo apcanya Moisés: —Iyoclhojo sat apnaclha apvisqui faraón. Itne sat ingyanic lhip. Eycaso appayvam Dios, apyimtalhnamo apancaoc hebreos: —Ilapajas sat enlhit ajancaoc, yoyam jelpayicsojo coo. 2 Apmiyovquic sat ancoc lhip elyamyiclha enlhitaoc. 3 Eyanmongsiclhac sat Dios Apyimtalhnamo aptemaclha lhip. Ningmasquem sat colnapoc apnatoscama aleyvam amyip. Acvisay ningmasquem peste. Elsovjacpoc sat apquilitsepma nolhing najan yamelyeyjaycoc najan voncayispoc najan vayqui najan nipquesic. 4 Etnejic sat apquilyacyescama Dios Apyimtalhnamo. Mepqui alitsepma cotnejic apnatoscama enlhitaoc Israel — nic nat aptomjac.
5 Aplhenquic nic nat Dios Apyimtalhnamo yavamlha sat cotnejic. Aptomjac nic nat apcanya: —Ongvapajacsic sat secaseclha as ningmasquem — nic nat aptomjac.
6 Secaseclha ilhnic nat apcapajasa Dios Apyimtalhnamo ningmasquem. Inquilitsepquic nic nat acyovoclhojo apnatoscama co Egipto. Am nic nat cotsapac lhama aptoscama enlhitaoc Israel. 7 Apcapajasquic nic nat faraón eltiyaningvomjo apnatoscama enlhitaoc Israel. Am nic nat elvitac lhama aptoscama ayitsepma. Am nic nat cotamilam apvalhoc apvisqui faraón. Apmiyovquic nic nat ellhong enlhitaoc Israel.
Ningmasquem pascapma
8 Aptomjac nic nat Dios Apyimtalhnamo apcanya Moisés najan Aarón: —Ellic sat tajap, anit apmeoc. Etlhaoc sat nitno apnaclha apvisqui faraón. 9 Colhamiclhac sat tajap anic. Copayjiclhac sat lhalhma anco yoclhilhma Egipto. Cajiclhac sat ningmasquem pascapma apyovoclhojo enlhitaoc najan apnatoscama yoclhilhma Egipto — nic nat aptomjac.
10 Apmec nic nat Moisés najan Aarón tajap ayinyema malhic. Apquilvoclhec nic nat apnaclha apvisqui faraón. Apquilhaquic nic nat nitno tajap. Incajaclhec nic nat ningmasquem pascapma enlhitaoc najan apnatoscama. 11 Am nic nat colapvancaac elhnasojo apquiltemaclha apquilyojolhma. Apquillingamcoc nic nat apyovoclhojo ningmasquem pascapma. 12 Am nic nat cotamilam apvalhoc apvisqui faraón. Am nic nat elyajaclhoc napato Moisés najan Aarón, actemaclha apcanama Dios Apyimtalhnamo.
Actemaclha granizo yingmin alyayem
13 Aptomjac nic nat Dios Apyimtalhnamo apcanya Moisés: —Ilhaticja secaseclha. Iyoclhojo sat apnaclha apvisqui faraón. Itne sat ingyanic maa: Eycaso appayvam Dios Apyimtalhnamo: Nomyov nasa enlhitaoc ajancaoc, yoyam jelpayicsojo. 14 Apmiyovquic sat ancoc lhip, osavojoc sat silapajascama asoc alyimtalhnama. Elngamcojoc sat lhip najan apquilasinancama najan apyovoclhojo enlhitaoc. Eyasamcojoc sat lhip sicvamlha coo sicyimtalhnamo as nalhpop, paj poc. 15 Evanqui inyicje omascoscomoc aptiyascam lhip najan apyovoclhojo enlhitaoc as nalhpop. Actemaclha sicyanmongsayclha apquiltemaclha quellhip. 16 Am alhta omascosac aptiyascam lhip. Etac sat sicmovan ajanco. Colngalhcac sat sicvisay lhalhma anco nipyesicsa enlhitaoc. 17 Lhip aptemaclha apanco apquinmelhaycam maa. Apmiyovquic mataa lhip elapajacsic enlhit ajancaoc. 18 Quip ilanojo. Secaseclha ongvapajacsic sat yingmin alyayem alyivey anco. Am nic nat cotalhcac mocjam actema nac jay yoclhilhma Egipto. 19 Ingyane sat elmeyvoc enlhit apnatoscama aleyvam amyip najan asoc acnaycaoc amyip. Copalamoc sat yingmin alyayem colnapoc sat. Esovjacpoc sat apquilitsepma enlhitaoc. Cosovjalhcac sat alitsepma apnatoscama aleyvam amyip mepqui alyilhanmomaclha — sat itne ingyanic — nic nat aptomjac Dios.
20 Apquilacac nic nat apvisqui apquilasinancama apquillinga Dios Apyimtalhnamo appayvam. Apquilyilhanmec nic nat coning apquilpaclheneycaoc najan apnatoscama. 21 Apquilyascacmec nic nat mataa poc. Am nic nat eltiyaningvocmoc apquilancam najan apnatoscama aleyvam amyip.
22 Aptomjac nic nat Dios apcanya Moises: —Imyasiclha netin apectong. Copalamoc sat yingmin alyayem, alnapma enlhitaoc najan apnatoscama najan ayimjaclha ninganma yoclhilhma Egipto.
23 Apmiyaseclhec nic nat netin apectong Moisés. Inlingalhquic nic nat ayilhtingyavoyam. Intiyacmec nic nat tacja. Impalacmec nic nat yingmin alyayem yoclhilhma Egipto. 24 Avanjec nic nat yingmin alyayem acpaliyam. Mataa ilhnic nat acpaliyam tacja. Am nic nat colngalhcac amyaa actema nac jay yoclhilhma Egipto. 25 Apsovjacpoc nic nat apquilitsepma enlhitaoc, najan maa apnatoscama amyip. Insovjalhcoc nic nat mactovascama yamtaa najan ayimjaclha ninganma as yoclhilhma. 26 Am nic nat copalacmoc yingmin alyayem yoclhilhma Gosén apnaycamcaclha enlhitaoc Israel.
27 Innec nic nat altimnasa Moisés najan Aarón. Aptomjac nic nat apvisqui faraón apcanya: —Naso, moyascalhma coo. Sicsilhnanomalhca ajanco najan enaymacoc. Appeyvomo Dios Apyimtalhnamo. 28 Jelmalhnesquis sat napato Dios Apyimtalhnamo. Ingilastinquic nincoo ayilhtingyavoyam ayinyema Dios najan yingmin alyayem. Momyovejec sat mocjam apquilantiyapma apyovoclhojo apnaymacoc — nic nat aptomjac apvisqui faraón.
29 Apcatingmavoc nic nat Moisés: —Otyapoc sat as tingma. Omyasiclhac sat netin ectingaoc. Olmalhnesquisic Dios Apyimtalhnamo. Comascoc sat ayilhtingyavoyam. Comascoc sat yingmin alyayem. Eyasingvomoc sat lhip, aptomja apyimtalhnamo Dios Apyimtalhnamo as nalhpop. 30 Acyasamcoc coo, mepqui ayay apvalhoc lhip najan apquilasinancama napato Dios — nic nat aptomjac Moisés.
31 Innec nic nat actovasa ayimjaclha lino najan cebada. Innamquic nic nat ilhnamoc. Innamquic nic nat acyilhna moc. 32 Am nic nat cotvasalhca ayimjaclha trigo motajap apactic najan centeno. Yejemoc sat actictiyapma.
33 Apyamyeclhec nic nat Moisés apvisqui faraón. Aptipquic nic nat tingma. Apmiyaseclhec nic nat apectengaoc epamejitsic Dios Apyimtalhnamo. Yejemoc nic nat acmasca ayilhtingyavoyam najan yingmin alyayem. 34 Am nic nat etac yingmin alyayem apvisqui faraón. Inmasquec nic nat ayilhtingyavoyam. Yiplovcoc nic nat mocjam meyascalhma. Am nic nat cotamilam apvalhoc apvisqui faraón najan apquilasinancama. 35 Am nic nat cotamilam apvalhoc. Apmiyovquic nic nat elanteypoc yoclhilhma enlhitaoc Israel. Am nic nat elyajaclhoc napato Moisés actemaclha apcanama Dios Apyimtalhnamo.
© © Biblia en Enhlet (Lengua Norte) © Paraguayan Bible Society, 1995.
