1 Apquiltimesam nic nat apvisay Bezaleel, najan aptamjaycamó lhama Aholiab najan poc apquilmopvancaa ellana lhama asoc. Visqui ingac nic nat ayinyema acyascamco apquilvalhoc najan acyicpilquemo apquilvalhoc, yoyam ellana asoc ayaymomalhca apquilmaycam carpa apponquinomap, acno apcanama siclho Visqui ingac.
Cotlaycaoc ofrendas ayinyema enlhit
2 Apcansaclhec nic nat Moisés as apcanit: Bezaleel, najan Aholiab najan apyovoclhojo apquilmopvancaa ellana asoc apquilmaycam najan apquilnatanma, ayinyema ilhnic nat Visqui ingac apquilmopvan. Najan apyovoclhojo apquilsayquinta ofrendas macmescama Dios, elpasmoc sat apquiltamjaycam. 3 Apmec nic nat tacja Moisés acyovoclhojo asoc, apquilmesa enlhitaoc apquilmopvancaa ellana apquilmaycam carpa apponquinomap, cotnejic sat culto nimpayvam congne carpa apponquinomap.
Apquilsantimcasquic nic nat israelitas ofrendas aclhamoclhojo acnim. 4 Apquillanac nic nat apquilmaycam enlhit apquilmopvancaa, ayinyema asoc macmescama. 5 Apquiltomjac nic nat apquilanya Moisés: Mongvanquejec onsavojo asoc apquilmescama nasa enlhit, ayinyema apcanama siclho Visqui ingac. Vamlha sat cotnejic — nic nat apquiltomjac.
6 Apcapajasquic nic nat Moisés, colhic altimnasa enlhitaoc natingma, elvatsamcoc enlhitaoc apquilmescama nasa carpa apponquinomap, najan maa quilvanaa, vamlha. 7 Am nic nat elsovjac asoc enlhit apquillanay apquilmaycam najan apquilnatanma. Inquilaymalhquic nic nat moc asoc, mepqui almomalhca.
Apquilanomap santuario carpa apponquinomap
(Ex 26.1-37)8 Apquillanac nic nat santuario aplhancoc apponquinomap enlhit apquilmopvan apanco, am elhno poc enlhit apquilmopvan. Apquillanac nic nat diez cortinas apava lino torcido, najan apava morada, najan apava púrpura, najan apava apyilhvasem acma aptalhamavo quilaycmasquiscama acma alhimpancoc. 9 Acvamlha acvinatem cortina apava doce metros y medio, acvamlha ancho dos metros. Acno moc mataa cortinas apava. 10 Apquilyipnaquic nic nat cinco cortinas, alyipitsomalhca mataa moc cinco cortinas. 11 Apquillanac nic nat apava apatnaoc lhama nicja apava primer grupo. Apquillanac nic nat aplhataoc nicja apava poc grupo. 12 Innoc moc mataa allanomalhca napocja apava cincuenta apatnaoc, colyipitsalhcac primer grupo najan segundo grupo as cortina apava. 13 Apquillanac nic nat ganchos asoc'jalhem de oro, colyipitsalhcac primer grupo najan segundo grupo apava as cortina apava. Eycaso ilhnic nat apyovoclhojo apava santuario apponquinomap.
14 Apquillanac nic nat Bezaleel once cortinas yataay apyimpeoc, yoyam elpaclhenic santuario apponquinomap. 15 Acvamlha ilhnic nat acvinatem trece metros y medio, acvamlha ancho dos metros. Acno moc mataa cortinas. 16 Apyipnaquic nic nat cinco cortinas yataay apyimpeoc lhama parte, najan seis cortinas moc parte. 17 Apquillanac nic nat cincuenta atnaoc nicja cortina, colyipitsalhcac sat primer grupo cortinas, najan cincuenta atnaoc nicja cortina, colyipitsalhcac sat segundo grupo cortinas. 18 Apquillanac nic nat cincuenta ganchos asoc'jalhem de bronce, yoyam elsavojoc sat alyipitsomalhca cortinas elpaclhenic carpa apponquinomap.
19 Apquillanac nic nat Bezaleel cubierta appaclhanma nipquesic apyimpeoc alyilhvasem. Apquillanac nic nat mocjam cubierta appaclhanma aso'yimpeoc alyimnatem. 20 Apquillanac nic nat yamit nicjaa tablas, colhic allana paredes carpa napocja, yamit acvisay nic nat acacia. 21 Acvamlha acvinatem tablas cuatro metros y medio, acvamlha ancho sesenta y cinco centímetros. 22 Moclhama tabla acyitna anit espigas alyipitsomalhca moc tabla yamit. Acno moc nic nat tablas apquillanomap santuario carpa apponquinomap. 23 Acvamlha veinte tablas yamit nicja nipiyam, 24 najan base avjac acvamlha cuarenta bases de plata. Moclhama tabla acyitna dos bases avjac, alyipitsomalhca dos espigas. 25 Moc pared, payjoc nilhqueyja, acvamlha veinte tablas yamit, 26 najan cuarenta bases avjac de plata, moclhama mataa tabla acvamlha dos bases. 27 Moc pared, payjoc actalhningvamlha acnim, acvamlha seis tablas yamit, 28 najan mocjam dos tablas colhic allana esquina actajescamaclha (acmasingvoyam) pared. 29 Mocanit mataa tablas alyipitsomalhca netin acvaycmo primer anillo. Eycaso ilhnic nat esquina dos tablas najan dos esquinas. 30 Acvamlha ilhnic nat acyovoclhojo ocho tablas najan dieciséis bases de plata, coning tabla mataa dos bases.
31 Apquillanac nic nat Bezaleel cinco travesaños yamit alvinatem acacia, colhic alyipitsa tablas lhama nicja santuarios carpa apponquinomap. 32 Mocjam cinco travesaños yamit alvinatem, colhic alyipitsa moc nicja santuario. Mocjam cinco travesaños yamit alvinatem, colhic alyipitsa tablas payjoc maa tap payjoc actalhningvamlha acnim. 33 Inyipitsalhquic nic nat travesaño yamit acvinatem central, payjoc nalhit tablas yamit. 34 Apquilyipitcasquic nic nat chapa de oro acyovoclhojo tablas najan argollos najan travesaños yamit alvinatem.
35 Apquillanac nic nat velo apava morada, najan apava púrpura, najan apava apyilhvasem, najan apava lino torcido acma aptalhamavo anit quilaycmasquiscama acma alhimpancoc. 36 Apquilhnec nic nat ganchos asoc'jalhem de oro netin cuatro postes yamit acacia, alyipitsomalhca chapa de oro poste alimja, najan cuatro bases avjac de plata. 37 Apquillanac nic nat ayapma atong acyivey acvisay cortina apava morada, najan apava púrpura, najan apava apyilhvasem, najan apava lino torcido acma aptalhamavo. 38 Apquinimcasquic nic nat cinco postes yamit alimja najan ganchos asoc'jalhem najan cinco bases avjac de bronce. Apquilyipitcasquic nic nat acyovoclhojo ayimpeoc chapa de oro, najan poste ayimpeoc najan anillos.
© © Biblia en Enhlet (Lengua Norte) © Paraguayan Bible Society, 1995.
