Aptalhesquiscama Pablo yoyam elyipsitic Jesucristo apmolhama tingma Efeso
1 Coo nac Pablo, sictimem apóstol siyapajasomalhca ayinyema Jesucristo. Eycaso actomja apmayjayoclha Dios. 2 Actalhescasquic as vaycajac actemaclha aclhanma evalhoc ingilyalhinga apnaycam tingma Efeso, apquiltomja melyasquiyam Jesucristo najan apquiltomja Dios apquilyacyescama. Altamjoc coo yoyam ellhovac quellhip apcaycaoc najan actamilaycam apquilvalhoc ayinyema Dios Ingyapam najan Jesucristo Visqui ingac.
Singaycaoc ayinyema Cristo yoyam comoc ingilvalhoc
3 Pac ontimjic mataa ningayo Dios aptomja Jesucristo Visqui ingac Apyap. Ningillhocac nincoo aclhamoclhojo actemaclha singaycaoc ayinyema netin. Eycaso ayinyema ningilpasmeyquiclha Jesucristo. 4 Dios aptomja singilyacyescama yoyam ongiltimjic apquitquic ayinyema Cristo. Eycaso appenescamo ilhnic nat aclhanma apvalhoc amamyi apquilantipquiscama aclhamoclhojo asoc. Apquiltamjoc nic nat Dios yoyam ongiltimjic ningiltamila napato mepqui ningilsilhnanomalhca. 5 Apquiltamjoc nic nat Dios yoyam ongiltimjic apquitquic ayinyema Jesucristo. Eycaso appenescamo nic nat aclhanma apvalhoc naysicsa singasicjayo. Eycaso actomja ilhnic nat apmayjayoclha Dios. 6 Pac ontimjic mataa ningayo Dios ayinyema singaycaoc altamila. Aptomja singmescama nasa Apquitca aptomja apcasicjayo. 7 Avanjec anco singasicjayo Dios. Apyinyovquic Apquitca singyanmongam yoyam jingilvomsic tap. Apmascosquic mongilyascalhma ayinyema apquitsepma singilyanmongam. 8 Ingillhicmosquic nincoo Dios cotlaycaoc singaycaoc, malha acyeycajangvaycmo. Ingmasquic nincoo actemaclha ningyascamco najan actemaclha ningyasingvoyam. 9 Apquiltamjoc Dios yoyam ongilyasamcojo apmayjayoclha actemaclha acyilhomalhca. Eycaso appenescamo ilhnic nat aclhanma apvalhoc Dios. 10 Invaac sat ancoc acnim, comoc sat aplhanmaclha Dios. Etnesquisic sat Apvisqui Cristo yoyam etnejic malha apquimja apmamyi asoc acnaycaoc netin najan asoc acnaycaoc nalhpop.
11 Nincoo ningiltomja ninpasmeyquiclha Cristo. Ayinyemaclha Dios aptomja singilyacyescama siclhoc anco yoyam ongillhovac asoc singaycaoc. Eycaso appenescamo ilhnic nat aclhanma apvalhoc Dios. Aptimec mataa Dios actemaclha apquiltamjoclha etnejic. 12 Ningiljalhanmec nat nincoo yoyam evac Cristo singvomquiscama tap. Quilhvo eyca pac ontimjic ningilayo Dios aptomja apyimtalhnamo apanco. 13 Najan quellhip lha apquillinga alhta amyaa actomja nasoc anco. Apquillingac alhta quellhip tasic amyaa actomja singvomquiscama tap. Apquilyanmoncasquic alhta apquilvalhoc quellhip apquiltomja melyasquiyam Cristo. Yitnec quellhip quilcajascama ayinyema Espíritu Santo, actemaclha aplhanma actomja nasoc anco yoyam ongillhovac. 14 Ningillhocac nincoo amamyi Espíritu Santo yoyam monquinatsejec actomja nasoc anco, yoyam ongilvomsalhcac sat tap ningiltomja apquitquic. Pac ontimjic ningilayo Dios aptomja apyimtalhnamo.
Apquilmalhnesquiscama Pablo ingilyalhinga yoyam ellhovac apquilyascamco ayinyema Dios
15 Aclingac coo actemaclha melyasquiyam quellhip Visqui ingac Jesús. Najan actemaclha apquilasicjayo quellhip aplhamoclhojo apquiltomja Dios apquilyacyescama. 16 Alinlhanacmec coo silmalhnesquiscama quellhip naysicsa sictimem gracias Dios Ingyapam. 17 Dios aptomja Jesucristo Visqui ingac Apyap najan aptomja Ingyapam apyimtalhnamo. Almalhnescasquic coo mataa yoyam ellhovac quellhip actemaclha ningyascamco najan actemaclha singyascasingvoyam ayinyema Espíritu apanco Dios. Coyangvomoc sat apquilyasingvoyam quellhip aptemaclha Dios. 18 Altamjoc coo yoyam eyascasingvomoc Dios apquilvalhoc quellhip. Natamin elyicpilcangvomoc sat quellhip asoc yoyam colvac sat actemaclha aljalhneycam apquilvalhoc. Elyicpilcangvomoc sat quellhip cotlaycaoc singaycaoc altamila acnaycaoc netin. Elmesic sat Dios apquiltomja apquilyacyescama. 19 Elyicpilcangvomoc sat quellhip singmescama Dios ningmovan, malha acyeycajangvaycmo tap ningiltomja mongyasquiyam. Apvitascasquic alhta Dios actemaclha apmopvan 20 naysicsa aplhaticjasquiyam Jesús nipyesicsa apquilmasquingvaycmo. Apnescaclhec alhta netin napocja actamilaclha. 21 Quilhvoc aptomja Apvisqui apyimtalhnamo tacjaplhit apquilviscaa najan apquilyimtalhnamo najan apquilmopvancaa. Aptomja Apvisqui as ningvamlha nac jay najan cotmongvoycamlha nelha. 22 Apquilmec nic nat Dios aplhamoclhojo, yoyam elilyejiclhojo actemaclha apcanamaclha Cristo aptomja Apvisqui. Aptimesacpec Cristo apquimja apmamyi nipyesicsa apmolhama. 23 Aplhamoclhojo apmolhama apquiltomja malha apyovoclhojo Cristo. Apquillhocac mataa apmolhama cotlaycaoc asoc, inyeycajangvocmoc asoc apancaoc. Epenacsojoc sat Cristo aclhamoclhojo asoc.
© © Biblia en Enhlet (Lengua Norte) © Paraguayan Bible Society, 1995.
