Actemaclha ningileyvam najan ningitsepma
1 Acyasingvocmec alhta actema nac jay: Dios ayinyema apquiltemaclha enlhit apquilpeyvomo najan enlhit apquilyascamco. Paj copvanac mataa ingyasicjojo apanco enlhit, paj copvanac etanovac apanco. 2 Acno moc mataa actamongvamlha nelha: apquiltemaclha enlhit apquilpeyvomo najan mepqui apquilpeyvomo, najan enlhit apquiltamila najan apquilmapsomcaa, najan enlhit apcasicjamap najan aptanovmap napato Dios, najan apquiltingyey macmescama Dios najan mepqui asoc macmescama Dios, najan enlhit apsilhnanomap apanco najan mepqui apsilhnanomap apanco, najan aptomja aplhanma mepqui apyeycajascaoc najan aptomja apyeycajascaoc aplhanma.
3 Acno moc mataa actamongvamlha nelha, actomja coliclama ingvalhoc. Inyangvocmec mataa apquiltemaclha apancaoc enlhit apquilmapsomcaa. Nelha sat cotnejic ningitsepma.
4 Yitnec mataa mongyasquiyam naysicsa ningileyvam. Intasi inyicje ningvita simjing mepqui ayitsepma, am colhno ningvitay yamacmeyva ayitsepma. 5 Ningileyvec mocjam nincoo, ningyasamcoc nincoo nelha nintiyascam, yoyam ongitsapoc. Am elyasamcoc mataa apquilmasquingvaycmo nano, alvoncacmo inyicje apquilvisay. 6 Inmasquec nipyesicsa apquilmasquingvaycmo apquiltemaclha apquilasicjayo, najan apquiltemaclha apquillom, najan moc apquiltemaclha apancaoc. Mejingilpasmejec sat mataa naysicsa ningileyvam as nalhpop, ayinyema apquilmasquingvoyam nano.
7 ¡Ingva! Pac ontovamcoc pan naysicsa acpayjayclha ingilvalhoc, najan ongyinamcoc uva ayingmenic. Apyispaquic Dios Visqui ingac nintemaclha nincoo. 8 Pac ontingyac apava aptamila apmopoy, pac ongatsisic impatic asoc acmasis. 9 Pac ongilasicjojoc mataa intava naysicsa ningileyvam acyavatem ayinyema Dios. Actomja malha acyanmongam ningilvascapma ningiltamjaycam as nalhpop. 10 Pac ongilvascapoc mocjam ningillanay asoc ningilanyomalhca ongillana. Ningatoynalhquic sat ancoc actomjaclha nelha acnim, comascoc sat ningiltamjaycam, najan aclhanma ingilvalhoc, najan acyascamco ingvalhoc, najan ningyicpilquemo.
Alhto inyicje nintemaclha
11 Acvitac coo mocjam as nalhpop: Jave apquilvoyam apquilmamyi apquiltimesquiscama carrera. Jave apquilyimnatem apquiltimesquiscama apquilimpocjay. Jave enlhit apquilyascamco acyitnama aptoycaoc. Jave enlhit mayayo acma apquilnatam. Jave enlhit apquilmopvancaa, yoyam elmacpoc tacja. Cotlapsic sat mataa, acvaa inlhojo apquillingaycamco acyimtalhnama. 12 Paj ongilyasamcoc nincoo actomjaclha nelha ningileyvam: Ongmalhcac sat nalhit acnim, acno quilasma almomalhca yamyamayin, najan asoc navjac almomalhca trampa. Ongmalhcac sat nincoo naysicsa mepqui ningay asoc acmasom.
13 Acyasingvocmec coo mocjam acvisay nintemaclha ningyascamco: 14 Apquillanac nic nat apquilimpocjay apvisqui apyimnatem najan apnaymacoc, nipyesicsa tingma apquitcoc, apcanito enlhit. 15 Apnec nic nat natingma enlhit apyascamco mepqui apquilnatam. Apvanqui inyicje elvomsic tap apnaymacoc ayinyema aptemaclha apyascamco, am eyca colhenac apquilvalhoc apnaymacoc apvisay apanco apyascamco.
16 Naso coo sicpayvam, tasic anco nintemaclha ningyascamco, am colhno nintemaclha ningyimnatem. Am eyca ongiljalhnoc mataa appayvam enlhit apyascamco ningvita inlhojo mepqui apquilnatam, evenacpoc sat maa.
17 Intasi nac ongilaylhojo appayvam enlhit apyascamco, am colhno appayvam acyeyjamelhma apanco, aptomja ayanem.
18 Intasi nac nintemaclha ningyascamco, am colhno eyca ningilmaycam, yoyam ongilnapoc.
Lhama nimpayvam aclhinganyam, avanquic cotvacsic acyovoclhojo asoc.
© © Biblia en Enhlet (Lengua Norte) © Paraguayan Bible Society, 1995.
