1 ¿Soc enlhit apyitsomacpo apyascamco apanco? ¿Ningyasamco ya nincoo ayinyemayaclha asoc? Altamila ingataoc najan actamila ningaat ayinyema acyascamco ingvalhoc.
Nintemaclha ningilyajayquiclho
2 Ningilanyalhquic nincoo ongilyejiclhojo singanamaclha visqui rey, ayinyema ninlhanma mepqui ningyeycajascaoc napato Dios. 3 Mongvanquejec ongilinmelham visqui ingac, mongilpasmiclhejec sat acmasom. Apvanquic etnejic apvisqui apquiltamjoclha etnejic. 4 Apmopvan innac visqui rey, mongvanquejec ongilyipconic aptemaclha apanco.
5 Monlingamquejec mataa acyimtalhnama, acyitna inlhojo ningilyajayquiclho singanamaclha. Ningyasamcoc yavamlha ontimjic, acyitna inlhojo acyascamco ingvalhoc. 6 Apyasamcoc Dios yavamlha etnejic aclhamoclhojo asoc. Lhama mataa mepqui ningyascamco asoc: 7 Mongilyasamcoc asoc yoyam colvac sat. Copvanquejec enlhit jingiltimnacsic actemaclha, yoyam covac sat.
Mepqui ningyascamco asoc.
8 Mongvanquejec ongmiyovalhcoyc inganco naysicsa ningileyvam. Mongvanquejec ongacsic ningitsepma, mongvanquejec ongilinyajamcoc naysicsa acmasom, malha ningilnapomalhca. Mevomsacpejec sat tap enlhit ayinyema aptemaclha apanco apmapsom.
9 Acvitac coo as asoc naysicsa ningileyvam as nalhpop. Lhama acyitna apmopvan apanco naysicsa aptemaclha apanco. Poc mataa apquillingaycamco acyimtalhnama.
Enlhit apquilmapsomcaa
10 Acvitac alhta coo enlhit apquilmapsomcaa apquilantalhnama congne tingma apponquinomap. Apquilantipsacpec alhta enlhit apquilpeyvomo. Paj colhenalhcac mocjam apquilvisay enlhit apquilpeyvomo. Alhto inyicje as apquiltemaclha. 11 Am alhta elyanmoncasac apquiltemalcha apancaoc apquilmapsomcaa, yiplovcoc alhta aclhanma apquilvalhoc poc enlhit, elvajanamcoc apquiltemaclha apquilmapsomcaa. 12 Ajolhec mataa apquileyvam aclhamoclhojo años enlhit apquilmapsomcaa. (Acyasamcoc coo aclhanmaclha nano: Actamila apquileyvam enlhit apquiltomja apquilayo Dios. 13 Somcoc mataa apquileyvam enlhit apquilmapsomcaa mepqui apquilayo Dios, acyitsomalhca apquileyvam pisquisca, yoyam covonquepoc mataa — intomjac aclhanmaclha.) 14 Alhto inyicje as nintemaclha. Apquillingamcoc acyimtalhnama enlhit apquilpeyvomo, naysicsa mepqui apquiltemaclha acmasom. Innec mataa ayaco enlhit apquilmapsomcaa, malha apquiltomja apquilpeyvomo. Alhto inyicje apquiltemaclha maa.
15 Incaymalhquic mataa copayjiclhac ingvalhoc aclhamoclhojo acnim. Tasi inyicje ontovamcoc, najan ongyinamcoc, najan ongilitsovasoc naysicsa ningileyvam as nalhpop. Dios aptomja singmasma, malha singmescama ningileyvam as nalhpop.
16 Altamjoc alhta oyasingvomoc actemaclha acyascamco ingvalhoc najan acyovoclhojo nintemaclha as nalhpop, tasic najan mepqui sictiyanma alhtaa. 17 Am alhta comac evalhoc coo, am alhta oyasingvocmoc aptemaclha Dios naysicsa ningileyvam as nalhpop. Aplhenquic sat ancoc enlhit: Acyasingvocmec coo aclhamoclhojo asoc as nalhpop — aptomjac maa. Apmopvan amyaa as enlhit, am alhta eyasingvocmoc aclhamoclhojo asoc.
© © Biblia en Enhlet (Lengua Norte) © Paraguayan Bible Society, 1995.
