1 Yitnec mocjam moc actemaclha acmasom nipyesicsa enlhitaoc as nalhpop, sicvitay alhta coo: 2 Apnec maa enlhit mayayo najan cascama apquilnatam, mepqui ayaymomalhca asoc. Apmiyovqui eyca Dios etoc najan ingyitsovasoc as enlhit acma apquilnatam, poc enlhit emiclhac as apquilnatam, yoyam ingyitsovacsojoc maa. Alhto inyicje aptingyey enlhit cascama apquilnatam, actemaclha coliclama ingilvalhoc. 3 Apnec sat ancoc enlhit najan cien apquitquic, etniclhac sat apvanyam, mepqui eyca acpayjayclha apvalhoc naysicsa aptiyascam, alhto sat cotnejic aptiyascam. Mengyatoynacpejec sat ancoc actemaclha mayayo. Apyitsomacpo as enlhit lhama sicaa actiyam lapamqui: 4 Alhto inyicje acvoy sicaa najan acvonquepma yatescamalhma, colhenalhquejec mataa acvisay. 5 Am cotayac acnim, am cotyisam mocjam, am colhno aclovquiscama acyampay as actiyam lapamqui. 6 Alhto inyicje aptiyascam as enlhit acvocmo inlhojo dos mil años, mepqui acpayjayclha apvalhoc, ingyatoynacpoc sat acno sicaa actiyam lapamqui.
7 Yitnec nincoo ningvascapma ningiltamjaycam, yoyam coytic mataa nintom. Yiplovcoc mataa mayic singajem. 8 Acno moc mataa nintemaclha ningyascamco najan mepqui ningyascamco. ¿Intasi ya enlhit mepqui apquilnatam etnejic apyascamco? 9 Incaymalhquic copayjiclhac mataa ingilvalhoc ningvita anit asoc ingancaoc, mepqui ayitsepma ingnenyic moc asoc. Alhto inyicje ayitsepma ingnenyic acyitsomalhca nimpatjetma alhcajayam.
10 Inlhenquic apvalhoc Dios yavamlha ontimjic nincoo mongiltiyaycamlha mocjam nincoo. Mongvanquejec nincoo ongilatingmojo (ongilatingmalhcojo) Dios aptomja apyimnatem apanco. 11 Ingvanqui inyicje ongillhamasiclha ningilpayvam napato Dios, alhto inyicje as nintemaclha. 12 Acyitsomalhca pisquisca ningileyvam as nalhpop, yavatoc anco. ¿Soc enlhit yoyam jingiltimnacsic, yavamlha ontimjic naysicsa ningileyvam, najan yavamlha cotnejic sat natamin ningileyvam as nalhpop?
© © Biblia en Enhlet (Lengua Norte) © Paraguayan Bible Society, 1995.
