1 Lhip apquitcoc, noncolvonquim nasa naysicsa aptiyascam lhip Visqui ingac Dios, aptomja singilantipquiscama. Covac sat acnim aplingaycamco lhip acyimtalhnama meyisponcama lhip. 2 Comascoc sat ningvitay acnim, najan piltin, najan apyová. Natamin acmamay ongvitac sat mocjam yipjopay. 3 Comascoc sat apyimnaa, mepqui apyavaoc sat cotnejic, colpilhyinamoc sat apectengaoc lhip. Colpalamoc sat apmaoc, mepqui apataoc sat etnejic lhip, 4 najan mepqui apjaycaoc. Moc actemaclha cotniclhac sat lhip appayvam. 5 Eyampac sat lhip apquinamta inlhojo netin, etyamoc sat naysicsa aplhingam lhip.
Colvitalhcac sat ilhnamoc yamit almendro. Enatovascsic sat sova ninganma, comalhquejec sat acyilhna alcaparra yamit. Lhip apmaclha sat cotnejic congne malhic. Inlingalhquic alyapcalhem quilvanaa apvalhoc tingma.
6 Coyit apatic lhip Visqui ingac singilantipquiscama, covocmo inlhojo nelha aptiyascam lhip. Colhojoc sat nelha nintiyascam acyityepma tama allanomalhca plata, najan appalhcatma vaynca, najan appalhcatma valhva ningyajayam, najan ayintem acyeyjamaclha yamilquit. 7 Natamin acvisay lhopactic cotniclhac sat mocjam lhopactic. Cotajojoc sat apnaclha Dios ningvanmoncama espíritu inganco, aptomja singmescama siclho Dios Visqui ingac.
8 Acyasingvocmec coo sicvisay Predicador: Alhto inyicje aclhamoclhojo nintemaclha, alhto inyicje aclhamoclhojo asoc.
Nelha appayvam
9 Apyascamco apanco ilhnic nat Predicador, aptomja apyascasingvoyam enlhitaoc. Aptalhosquic nic nat aclhamoclhojo proverbios ayinyema apyascamco apanco. 10 Aptalhosquic nic nat altamila appayvam, actomja nasoc anco, yoyam colmoc ingvalhoc.
11 Altamila inyicje apquilpayvam enlhit apquilyascamco, alyitsomalhca yamit acma ajamtic ningilmaycam. Alyitsomalhca mocjam clavos alyipitsomalhca, singmescama Dios Visqui ingac, apvisay pastor nincoo. 12 Iyasamcojo sat lhip, inquillanalhquic mataa aclhamoclhojo vaycajac, ningiltomja ningilyipsatem acvaycmo ningilyampay nincoo.
13 Nelha quilhvo nac jay, ningiltomja ningyasingvoyam: Incaymalhquic nincoo ninlhamoclhojo ongilavojo Dios Visqui ingac, incaymalhquic ongyiplovcasojo singanamaclha. 14 Epquiniclhac sat ayalhnaclhojo ingvalhoc Dios, acyovoclhojo nintemaclha actamila najan acyovoclhojo nintemaclha almasomcaa, najan nintemaclha acyilhamalhca as ningvamlha nac jay.
© © Biblia en Enhlet (Lengua Norte) © Paraguayan Bible Society, 1995.
