1 Casomcojoc sat asoc acmasis, ayinyema yapa apquitsepma congne alhancoc.
Comascoc sat actemaclha singayo, acyitna inlhojo acyeyjamelhma ingvalhoc.
2 Inlhenquic ingilvalhoc asoc actamila, acyitna inlhojo acyascamco ingvalhoc. Inlhenquic ingilvalhoc asoc acmasom, mepqui inlhojo acyascamco ingvalhoc.
3 Ningillhenalhquic mataa acyeyjamelhma ingvalhoc, ayinyema nintemaclha inganco.
4 Aplovquic sat ancoc visqui ningiltimesaycam, incaymalhquic ongiltamilsojo ingilvalhoc. Jingilasicjiclhojoc sat mocjam, apvita inlhojo actamilaycam ingvalhoc.
5 Acvitac coo moc asoc as nalhpop, mepqui acliclamo evalhoc, nipyesicsa apquilviscaa: 6 aptimesacpec apvisqui acyitna inlhojo acyeyjamelhma apvalhoc. Am eltomjac mayayo enlhit acyitna acyascamco apquilvalhoc. 7 Acvitac alhta enlhit apquilmomap apquillhingam nolhing apcapoc, yatapquilviscaa apquillhingam alhta nalhpop.
8 Etyamoc sat congne malhic, aptomja apmetam apanco.
Coticlhic sat acyeyva enlhit, aptomja apquilhpanquiscama mataymong apjalhtam tingma.
9 Eyimsasic sat apyimpejic enlhit, aptomja appalhcatma mataymong.
Incaymalhquic enlhit ingyavojoc tava, aptomja appalhcatma alhpongja.
10 Enlhit apmaycam tava pac mepqui ajamtic, eyampac sat naysicsa aptamjaycam. Colhyevavojoc sat aptamjaycam enlhit, acyitna inlhojo acyascamco apvalhoc.
11 Mepqui acyascamco apvalhoc enlhit apquiltamescama nimisma, actomja actaclheycaoc amamyi altamsomalhca.
12 Colhic ayaco enlhit apyascamco appayvam. Evenacpoc sat enlhit acyeyjamelhma apvalhoc. 13 Siclhoc acyeyjamelhma appayvam, natamin etnejic ayanem appayvam. 14 Enlhit aplhamasomap apvisay acyeyjamelhma apvalhoc.
Am eltimnasacpoc mataa, yavamlha cotnejic niptamin maa.
15 Avanjec mataa appayvam acyeyjamelhma enlhit, comopvan etajiclha tingma pac.
16 Enlhitaoc layi, aptomja apquitcoc mocjam apvisqui apancaoc. ¡Alhtoo aptoycaoc fiesta apancaoc yatapquilviscaa!
17 Apquilinyejemo enlhitaoc, aptomja mayayo apvisqui apancaoc. ¡Actamila apquiltemaclha aptoycaoc, mepqui anmin ataoc!
18 Enlhit coyoyam etnajam, cotyamoc sat appaclhanma apac. Enlhit mepqui aptamjaycam, eyaninic sat tingma apyovoclhojo.
19 Acpayjayclha ingilvalhoc ayinyema nintom pan najan ningyam uva ayingmenic. Incaymalhquic mataa solyayem, ongmoc as asoc.
20 Mongvanquejec ongvenam apvisqui rey, ontamilsojoc sat ingilvalhoc.
Mongvanquejec ongvenam enlhit acma apquilnatam, ontamilsojoc sat ingilvalhoc. Nintipquiscama apquilvisay colngasalhcac, coltimnasquiclhac sat maa nata ayitcoc.
© © Biblia en Enhlet (Lengua Norte) © Paraguayan Bible Society, 1995.
