Apquitsepma Moisés
1 Apquinamtec nic nat netin inquilhe Nebo Moisés, payjoc yoclhilhma actamopeycaoc Moab. Inquilhe ayitsicsic nic nat acvisay Pisga, payjoc tingma Jericó actiyapmaclha acnim. Apvitac nic nat Moisés yoclhilhma lhalhma anco, ayenmo yoclhilhma Galaad acvaycmo yoclhilhma Dan. 2 Najan yoclhilhma Neftalí, yoclhilhma Efraín, yoclhilhma Manasés, yoclhilhma Judá acyovoclhojo, acvaycmo yingmin acvanyam Mediterráneo. 3 Apvitac nic nat yoclhilhma Néguev, vatsam Jordán najan yingman payjoc Jericó. Apquiltimec nic nat apvisay Jericó, ningiltimem Alha Tingma, acvaycmo tingma Zoar.
4 Aptomjac nic nat Dios apcanya Moisés: —Eycaso siclhanma alhta napato Abraham, najan Isaac, najan Jacob, yoyam ellhovamcoc sat aptovana. Altamjoc coo etac lhip as yoclhilhma, copvanqueje eyca lhip epalhavomoc maa — nic nat aptomjac Dios.
5 Apquitsepquic nic nat Moisés apvisay Dios apquilancam, payjoc yoclhilhma Moab, acno aplhanma siclho Dios. 6 Innec nic nat ayatoyna payjoc alvata yoclhilhma Moab, ningatoc Bet-peor. Mepqui apyascamco lhama enlhit as ningvamlha nac jay apcatoynamacpilha Moisés. 7 Vocmec nic nat ciento veinte años aptiyascam Moisés. Cayjec nic nat mataa apyimpejic, altamila ilhnic nat apataoc acvaycmo acnim apquitsepma.
8 Invocmec nic nat treinta acnim apquilyapcalhem apnaymacoc Moisés yoclhilhma actamopeycaoc Moab, ayinyema acmayovsa apquilvalhoc apquitsepma Moisés. 9 Aplhocac nic nat Josué, Nun apquitca apyascamcolhma. Ayinyema ilhnic nat apnincanma apmeoc Moisés apyitsicsic Josué. Apquilyajaclhoc nic nat mataa apnaymacoc Israel, acno ilhnic nat apcanama siclho Moisés.
10 Naso, am nic nat etacpoc poc profeta Dios aplingascama nipyesicsa enlhitaoc Israel. Apvamlha ilhnic nat Moisés appamejitsacpo napato Dios Apyimtalhnamo. 11 Am nic nat etacpoc poc profeta, apmopvan ellaná aptamjaycam simpilapquiscama. Apvamlha ilhnic nat Moisés apna yoclhilhma Egipto apcanyacpo ingyinmelham apvisqui faraón najan yatapquilviscaa lhalhma anco. 12 Paj nic nat poc profeta apyimtalhnamo apanco nipyesicsa enlhitaoc Israel, apvamlha ilhnic nat lhama, apvisay Moisés.
© © Biblia en Enhlet (Lengua Norte) © Paraguayan Bible Society, 1995.