Netin inquilhe Ebal
1 Aptomjac nic nat Moisés najan ningayo apquilanya enlhitaoc: — Elyiplovcasojo quellhip siyanamaclha as acnim nac jay. 2 Elmilanic sat quellhip vatsam Jordán. Elvitac sat quellhip yoclhilhma alhnancoc, aplhanma alhta Dios yoyam ellhovamcoc quellhip. Elquinimquis netin mataymong alyivey, elmopis sat asoc ningmopiscama cal. 3 Colhic sat acnatalhesa sicpayvam siyanama quellhip. Elvitac sat quellhip yoclhilhma alhnancoc, aplhanma alhta Dios ellhovamcoc quellhip. Acvisay yoclhilhma acyitnamaclha leche najan apquimjaclha yovjan. Cotnejic sat acno aplhanma alhta Dios napatavo ningilyeyjamcaa. 4 Elmilanic sat quellhip vatsam Jordán. Elmiyaclhac sat quellhip netin inquilhe acvinatem acvisay Ebal. Elquinimquis sat mataymong alyivey, elmopis sat asoc ningmopiscama cal. 5-6 Ellana sat maa mataymong mayicjescama actemaclha ningilmalhnancamaclha Dios. Cotnejic sat mataymong anco, mepqui acpalhcatemalhca. Elninquin sat netin mataymong asoc acmatnam macmescama Dios acyanmongam melyascalhma. 7 Najan moc asoc macmescama Dios actemaclha singasicjayquiclha mocjam. Ellana sat maa fiesta naysicsa aptoycaoc napato Dios. 8 Eltalhos sat actamila anco mataymong nicja acyovoclhojo sicpayvam siyanama quellhip — nic nat aptomjac.
9 Apcanelhec nic nat sacerdotes levitas apnaclha Moisés. Aptomjac nic nat Moisés apquilanya enlhitaoc Israel: —¡Elvanma siclho, ellaylhojo quellhip co Israel! Quellhip apquiltomja quilhvo nac jay malyacyescama Dios, apquilmolhama Dios Apyimtalhnamo. 10 Elilyejiclhojo sat mataa, elyiplovcasojo singanamaclha najan singascamaclha Dios Apyimtalhnamo, siclhanma coo as acnim nac jay — nic nat aptomjac Moisés.
Ninlingaycamco mactovascama
11 Aptomjac nic nat Moisés as acnim apquilanya: 12 —Elmilanic sat quellhip vatsam Jordán. Ingyaniclhac sat netin inquilhe Gerizim apquillingascama singayo actamila: apquilmolhama Simeón, apquilmolhama Leví, apquilmolhama Judá, apquilmolhama Isacar, apquilmolhama José najan apquilmolhama Benjamín. 13 Ingyaniclhac sat netin inquilhe Ebal apquillingascama sintovascama: apquilmolhama Rubén, apquilmolhama Gad, apquilmolhama Aser, apquilmolhama Zabulón, apquilmolhama Dan najan apquilmolhama Neftalí. 14 Apquilmolhama Leví eltimjic sat mataa apquiltimnascama apquilmamyi napatavo enlhitaoc Israel. Elyimnaticsojoc sat apquilpayvam:
15 —Etvasacpoc sat enlhit apquillanay quilaycmasquiscama acyitsomalhca dios, allanomalhca tava ápac najan yamit. Aptomja apposcama quilaycmasquiscama. Innec acvenná Dios Apyimtalhnamo. Elatingmojoc sat enlhitaoc: ¡Naso! — sat eltimjic.
16 Etvasacpoc sat enlhit apvennéycam apyap najan inquin: ¡Naso! — sat eltimjic.
17 Etvasacpoc sat enlhit apminyilhma nicja amyip actomja poc apanco. Elatingmojoc sat apyovoclhojo enlhit: ¡Naso! — sat eltimjic.
18 Etvasacpoc sat enlhit aptomja aplhinganimquiscama mepqui apataoc. Elatingmojoc sat apyovoclhojo enlhit: ¡Naso! — sat eltimjic.
19 Etvasacpoc sat enlhit aptovascama tampeyi, najan apyeyjeycam, najan poc appalhaviyam. Elatingmojoc sat enlhitaoc: ¡Naso! — sat eltimjic.
20 Etvasacpoc sat enlhit aptovascama apyap aptava. Innec acvenná apyap. Elatingmojoc sat apyovoclhojo enlhit: ¡Naso! — sat eltimjic.
21 Etvasacpoc sat enlhit aptovascama aptoscama, aptomja apminsom. Elatingmojoc sat apyovoclhojo enlhit: ¡Naso! — sat eltimjic.
22 Etvasacpoc sat enlhit aptovascama apyap apquitca quilvana, najan inquin ayitca. Elatingmojoc sat apyovoclhojo enlhit: ¡Naso! — sat eltimjic.
23 Etvasacpoc sat enlhit aptovascama apipyamong, aptomja appatjeteycaoc. Elatingmojoc sat apyovoclhojo enlhit: ¡Naso! — sat eltimjic.
24 Etvasacpoc sat enlhit apyilhacpo ingyajic poc. Elatingmojoc sat apyovoclhojo enlhit: ¡Naso! — sat eltimjic.
25 Etvasacpoc sat enlhit apmam tacja solyayem, ingyajic poc. Elatingmojoc sat apyovoclhojo enlhit: ¡Naso! — sat eltimjic.
26 Etvasacpoc sat enlhit meyiplovquiscama najan melyajayquiclho as singanamaclha. Elatingmojoc sat apyovoclhojo enlhit: ¡Naso! — sat eltimjic — nic nat aptomjac Moisés.
© © Biblia en Enhlet (Lengua Norte) © Paraguayan Bible Society, 1995.
