Actemaclha ofrenda
1 Aptomjac nic nat Moisés: —Elhnam sat quellhip yoclhilhma alhnancoc, ayinyema Dios apquilmescama quellhip. 2 Elvitac sat quellhip acyilhna ayinyema amyip. Noeltovaoc nasa acyilhna apquilvitay siclhoc anco. Apquilanyacpec moclhama quellhip elsaclhesic as acyilhna tingma ningilmalhnancamaclha, apvisay carpa apponquinomap. 3 Emoc sat tacja sacerdote as acyilhna. Eltime sat elanic: Eycaso sicpayvam napato Dios: Acnactac coo as yoclhilhma alhnancoc singmescama Dios, aplhanma ilhnic nat napatavo ningilyeyjamcaa — sat eltime elanic. 4 Emoc sat tacja sacerdote as acyilhna apsayquinta lhip. Epquinic sat nicja altar ningmescamaclha asoc Dios. 5 Eltime sat apquillingasa napato Dios. Itne sat lhip appayvam:
Apcanito ilhnic nat sicyeyjamcaa apquilvisay arameos. Apquilmiyaclhec nic nat yoclhilhma Egipto, yoyam elhnam maa. Aplhameclhec nic nat apquilvitacpo appintalhnama najan apquilyimnatem apanco. 6 Ninlingamcoc alhta acyimtalhnama nipyesicsa co Egipto. Apquilascasquic alhta ingyimpejic, ningiltomja ningilmomalhca. 7 Ningilmalhnaquic alhta Dios, yoyam jingilpasmoc nincoo. Apjalhnoc ningilmalhnancama Dios, apvitac alhta actemaclha ninlingaycamco, actemaclha ningiltamjaycam najan singilajem co Egipto ningiltimesaycam. 8 Ingilvitascasquic alhta Dios apmopvan apanco, aptimesquisa apquilay co Egipto, ayinyema aptamjaycam simpilapquiscama. Ingilyinyovcasquic alhta yoclhilhma Egipto. 9 Ingnalantac alhta as yoclhilhma singmescama nincoo, acyitnamaclha leche najan apquimjaclha yovjan. 10 Acsantac coo acyilhna sicvitay siclha amyip, singmescama nincoo Dios — sat itne lhip apnaclha sacerdote.
Ipquin sat lhip acyilhna alhnacoc napato Dios. Ilticlhic sat aptapnaoc napato Dios. 11 Illaná sat fiesta actemaclha apcayo Dios, itne sat gracias lhip najan apyovoclhojo apquilmolhama. Elpasingvotac sat apnaymacoc levitas najan metnaja aptemolhama apquilpalhaviyam nipyesicsa quellhip — nic nat aptomjac Moisés.
12 Aptomjac nic nat Moisés: Invocmec sat ancoc tres años, imques nasa lhama asoc, acyitna inlhojo diez asoc, najan lhama aptoscama, alyanca inlhojo diez apnatoscama. Appenasquic sat ancoc apmescama nasa lhama acyilhna, alyitna inlhojo diez acyilhna. Apquillhocac sat ancoc as acyilhna levitas, najan metnaja apquiltemolhama apnaycam nipyesicsa quellhip, najan apquilyeyjeycam, najan lhintampaa, yoyam eltovamcoc natingma aclhamoclhojo nintom. 13 Itne sat lhip napato Dios elngacsic appayvam apanco:
Acpenasquic coo sicmescama nasa asoc acnaycaoc tingma ajac ayinyema amyip. Acmilasquic lhac nipyesicsa enaymacoc levitas, najan apquilpalhaviyam enlhit, najan nipyesicsa apquilyeyjeycam najan lhintampaa. Acyiplovcasquic lhac siyanyomalhca otnejic. Alyajaclhoc lhac coo, am ongvaycmoc lhama singanamaclha ayinyema lhip Dios. 14 Am alhta otavac as acyilhna naysicsa acmayovsa evalhoc, am alhta otavac naysicsa sicsilhnanoncama. Am alhta oyinyavac eltovamcoc apquilitsepma. Lhip Dios, yitnec coo sicyiplovquiscama siyanyomalhca ayinyema lhip. 15 Jelanojo coo apna netin lhip, apmaclha mayayo. Jingilpasim nincoo ningilvisay Israel najan yoclhilhma singmescama nincoo, acyitnamaclha leche najan apquimjaclha yovjan. Lhip Dios aplhanma nic nat napatavo ningilyeyjamcaa — sat itne lhip — nic nat aptomjac Moisés.
Enlhitaoc apquilponquinomap
16 Aptomjac nic nat mocjam Moisés apquilanya: —Elyiplovcasojo quellhip acnim nac jay singanamaclha najan singascamaclha Dios. Coma sat apquilvalhoc mepqui apquilyeycajascaoc. 17 Apquilpenasquic lhac apquillhanma quellhip as acnim nac jay, aptomjac Dios Visqui apancaoc apvamlha maa. Apquillhenquic quellhip elyiplovcasojo najan elilyejiclhojo singanamaclha najan singascamaclha Dios. 18 Aplhenquic lhac acnim nac jay Dios apquiltomja quellhip malyacyescama, ayinyema aplhanma alhta siclho. Apquilanyacpec quellhip elsavojo apquilyiplovquiscama singanamaclha. 19 Eltimesacpoc sat quellhip enlhitaoc malayo najan malyacyescama nipyesicsa poc enlhitaoc as nalhpop. Acno aplhanma alhta siclho, elponquinacpoc sat quellhip napato Dios.
© © Biblia en Enhlet (Lengua Norte) © Paraguayan Bible Society, 1995.
