Mepqui apquilpalhcomap apcaneyquiclhilha
1 Copvanquejec epasmoc apcaneyquiclhilha israelitas enlhit mepqui appopoc, aptomja malha yamquilvana, copvanquejec najan epalhavomoc enlhit mepqui aptilha.
2 Copvanquejec enlhit quipyap (mepqui apyap) epasmiclha apcaneyquiclhilha israelitas cotmongvoyam nelha (décima aptovana).
3 Colapvanquejec mataa elpasmoc apcaneyquiclhilha israelitas apquilvisay amonitas najan moabitas cotmongvoyam nelha (tap décima aptovana). 4 Apquilyinyovquic nat quellhip yoclhilhma Egipto, yoyam elmilanic sat apquileyvomaclha apancaoc. Apquilmiyovquic nat aptoycaoc najan yingmin apyinaycaoc. Apquilyinyovquic nat acyanmongam aplhoy Balaam, Beor apquitca, apquinyemaclha Petor yoclhilhma Mesopotamia, yoyam elinmelham napatavo quellhip, elhenic appayvam acmasom. 5 Am nat ingyajalhnoc Dios Balaam appayvam. Apmasma quellhip Dios, ayinyema apcasicjayo. , 6 Noelpasmiclha nasa quellhip as enlhitaoc cotmongvoycamlha nelha apquiltiyascam quellhip.
7 Noeltanov nasa edomitas apquiltomja apquilmolhama quellhip. Noeltanov nasa egipcios, ayinyema apquileyvomaclha nat quellhip. 8 Vocmec sat ancoc tercera generación aptovana quellhip, eyca maa elpasmoc sat apcaneyquiclhilha israelitas.
Asoc singilpaysimquiscama
9 Apnam sat ancoc quellhip carpa tingma, yoyam ellana apquilimpocjay nipyesicsa cotnaja ingmoc, noelpaysimquis nasa apyimpeoc najan apquilvalhoc, etanovac sat Dios. 10 Apalec (apalem) sat ancoc enlhit naysicsa aptiyanma, incaymalhquic etyapoc carpa tingma, melhejec sat tingma acyovoclhojo acnim. 11 Natamin apyapascama yingmin apyimpejic actalhnacmo, evotac sat mocjam aplhancoc.
12 Eltingya sat tap tingma, cotnejic apquilyanmaclha. 13 Elsov sat mataa menme, yoyam elmetmoc malhic ayitcoc, elyanic sat maa, elatipiclhac sat mocjam lhopactic. 14 Apnec mataa Dios nipyesicsa quellhip, elmeyvoc sat quellhip eltimjic apquilyimnatem naysicsa apquilimpocjay nipyesicsa cotnaja ingmoc. Etnejic sat mataa apcalhnayo carpa tingma apnamcaclha quellhip napato Dios. Eyamyiclhac sat Dios, apvita inlhojo acpaysacmo apnaycamcaclha quellhip.
Enlhit apquinyem
15 Apvaac sat ancoc enlhit apmomap apquinyem, yoyam elhic sat nipyesicsa quellhip, noelapajas nasa etajojoc sat apnaclha apvitip. 16 Elmiyov sat maa, elane sat elhic natingma nipyesicsa quellhip, tasic najan poc tingma apquilyacyescama apquinyem. Noeltanov nasa quellhip.
Actemaclha apquilanatama
17 Copvanquejec lhama enlhit israelita, covanquejec lhama quilvana israelita colpasmoc actemaclha apquilanatama payjoc mayayoclha quilaycmasquiscama acyitsomalhca dios. 18 Noelma nasa tacja solyayem ayinyema mayayoclha quilaycmasquiscama, eltimjic sat macmescama Dios congne carpa apponquinomap, apmescama enlhit aplhanma mepqui apyeycajascaoc napato Dios. Aptanovquic Dios solyayem ayinyema apquilanatamaclha actema nac jay.
19 Yitnec sat ancoc apquilmaycaoc nasa apnaymacoc, noeltingya nasa interés solyayem acvoncapaycaoc. 20 Yitnec sat ancoc apquilmaycaoc nasa metnaja israelitas, eltingya sat interés solyayem acvoncapaycaoc. Epasmoc sat mataa Dios apquilvoycamlha sat quellhip yoclhilhma alhnancoc.
21 Noelyeycajas nasa apquillhanma quellhip napato Dios, elsilhnanacpoc apanco quellhip, acyiplomo apyanmongsayclha apquiltemaclha apancaoc quellhip. 22 Am sat ancoc ellhenac quellhip mepqui apquilyeycajascaoc, melsilhnanacpejec sat apanco quellhip. 23 Yitnec sat ancoc lhama aplhanma mepqui apyeycajascaoc, isavojo sat mataa apyiplovquiscama napato Dios.
24 Apquilvitac sat ancoc nalhit amay ayimjaclha uva, eltovaoc sat mepqui apquilay. Colapvanquejec quellhip elansiclha uva acyilhna congne alhancoc. 25 Apquilvitac sat ancoc apquimjaclha trigo, eljalhyovas apyilhna, yoyam eltovamcoc. Colapvanquejec quellhip elyatemenic apyilhna sovo najan yamsovo.
© © Biblia en Enhlet (Lengua Norte) © Paraguayan Bible Society, 1995.
