1 Quellhip eyca apquiltomja malha apnalhaticjangvaycmo lhama Cristo. Eltingya sat mataa asoc acnaycaoc netin. Apnec maa Cristo apnaclha Dios napocja acyimnatamaclha. 2 Collhen sat mataa apquilvalhoc asoc acnaycaoc netin. Nocollhen nasa apquilvalhoc asoc as nalhpop. 3 Quellhip apquiltomja malha apquilitsepma lhama Cristo. Aptamilcasquic Cristo acyimnatem apnenyaoc quellhip apnaclha Dios. 4 Cristo aptomja apyimnatescama ingnenyaoc. Apvoctac sat ancoc mocjam yoyam ongvitac sat. Elvitacpoc sat quellhip lha apquilpasmeyquiclha Cristo aptemaclha apyimtalhnamo.
Nintemaclha nano najan nintemaclha alhnancoc
5 Elnapiclha sat quellhip actemaclha almasomcaa almayjayo apquilvalhoc: Actemaclha ningilanatama, actemaclha alquitamsama ingvalhoc almasomcaa, actemaclha ningilvajaneycaoc acmasom, actemaclha ayitsepma ingnenyaoc najan actemaclha nintingyey cascama ningilnatam, actomja malha ningyiplovquiscama acyitsomalhca Dios. 6 Eyca as eyanmongsiclhac sat Dios yoyam ellingamcojoc enlhit melilyajayquiclho. 7 Apquilvajanamquic alhta quellhip lha apquiltemaclha nano. 8 Elvatsaoc sat quellhip aclhamoclhojo as asoc: ninlom, ningnatjemo, nintemaclha acmasom, actemaclha acmasom ninpayvam, nintipquiscama apvisay ingmoc. 9 Noeltime nasa apquilmopvan amyaa. Apquilyinyovquic quellhip actemaclha apquilvalhoc nano. 10 Apquilmaclhec quellhip actemaclha apquilvalhoc alhnancoc. Apquiltamjoc Dios jingilaniclhac mataa yoyam sat ongilinmalhingvoclha aptemaclha apanco. Yoyam najan ongilyicpilcangvomoc acyovoclhojo aptemaclha apanco Dios. 11 Melhenacpejec sat apvisay metnaja judíos najan apvisay judío apanco. Colhenalhquejec sat najan enlhit acyitna asoc monquinatquiscama najan enlhit mepqui asoc monquinatquiscama. Melhenacpejec sat enlhit metnaja nintemolhama najan enlhit nipvajac. Melhenacpejec sat aptomja apquimja apmamyi najan aptomja apquilancam. Elhenacpoc sat apvamlha Cristo. Quellhip eyca apquiltomja apquilyipitcayo.
12 Quellhip apquiltomja Dios apquilyacyescama aptomja apquilasicjayo. Elpiquin sat apquilvalhoc alhnancoc actemaclha actamila. Actemaclha ningamliyam najan actemaclha ningiltamila najan actemaclha conjamalhca ingvalhoc najan actemaclha actamilaycam ingvalhoc najan actemaclha ningilinlhanyacmo. 13 Noeltanovap nasa nipyesicsa quellhip. Elasicjiclhojo sat mocjam naysicsa apquilinmelhaycam. Ellhnasojo sat Cristo aptomja apmascoscama melyascalhma quellhip. 14 Eltingya siclhoc anco amamyi actemaclha ningasicjayo. Eycaso actomja ayansayclha aclhamoclhojo asoc, malha macvatjitma acyilhna. 15 Elane sat coytic actamilaycam apquilvalhoc ayinyema Cristo. Eycaso actomja apmayjayoclha Dios. Apquiltamjoc eltimjic apquilpasmeyquiclha quellhip, malha alyiptetaclha acyitna ningyovoclhojo nincoo. Eltime sat mataa gracias Dios Ingyapam.
16 Elane sat coyangvomoc allheneycam apquilvalhoc Jesucristo appayvam nipyesicsa quellhip. Ellhicmosacpojo sat nipyesicsa quellhip actemaclha apquilyascamco. Elpasim sat mataa poc. Elminaycmas sat mataa actemaclha apquilayo Dios. Elminaycmas sat ningminaycmascama alvisay salmos najan alvisay himnos najan actemaclha ningayo Dios. Collhen sat mataa apquilvalhoc Dios naysicsa apquilminaycmascama. Ayinyemaclha apquillhocac quellhip Dios apcaycaoc. 17 Collhen sat mataa apquilvalhoc Visqui ingac Jesús naysicsa apquiltamjaycam najan naysicsa apquilpameteycam. Eltime sat gracias Dios Ingyapam naysicsa apquilayo Visqui ingac.
Apquiltemaclha mataa cristianos aclhamoclhojo acnim
18 Quellhiya quilvanaa. Colilyejiclhojo sat mataa anatamcaa. Eycaso actemaclha actamila anco Jesucristo apmolhama. 19 Quellhip enlhitaoc. Elasicjojo sat mataa apnatamcaa. Noelyimtalhnesquis nasa avalhaoc apnatamcaa. 20 Quellhip apquitcaoc najan ayitcaoc. Elilyejiclhojo sat mataa apquilyap najan incanayc. Eycaso actomja apmayjayoclha Visqui ingac. 21 Quellhip apyapmayc. Noellovquis nasa apquitquic yoyam costenejec apquiltemaclha quellhip. 22 Quellhip apquilancam. Elilyejiclhojo sat mataa apquilviscaa apancaoc mepqui apquilyimtalhnesomacpo apanco, ayinyema apmayjayoclha Dios. Noelapajangvomjo nasa eltamjam elvita apvisqui apancaoc. Eycaso apquiltemaclha quellhip yoyam elyinimsic. 23 Eltamjam sat mataa quellhip malha Visqui ingac apquilancam, jave enlhit apquilancam. 24 Elyasamcojo quellhip yoyam ellhovamcoc acyanmongam ayinyema Visqui ingac. Ellhovac sat apquilmayclha acyitna netin. Ayinyemaclha quellhip apquiltomja Cristo apquilancam aptomja Apvisqui apancaoc. 25 Apquilvajanamquic sat ancoc quellhip actemaclha apquilsilhnanomap, elvitac sat acyanmongayclha apquiltemaclha apancaoc. Memyovejec mataa Dios lhama enlhit aptomja apquilsilhnanomap yoyam etanova poc. Apquilanomacpo sat eyanmongsiclha apquiltemaclha apancaoc.
© © Biblia en Enhlet (Lengua Norte) © Paraguayan Bible Society, 1995.
