1 Naysicsa aptimem nic nat apvisqui Joacim apquilimpocjac nic nat apvisqui co Babilonia najan apnaymacoc nipyesicsa co Judá. Tres años nic nat aptomjayclho Joacim malha apmomap. Natamin nic nat apquilinmelham napato apvisqui cotnaja ingmoc. 2 Pilapcasquic nic nat Joacim apvita cotnaja ingmoc, Dios Visqui ignac apquilapajascama, apquiltomja apquilminyilhma: caldeos, najan sirios, najan moabitas najan amonitas. Apquilanyacpec nic nat elinmelham (enatovacsic), acno ilhnic nat Dios appayvam, apquillingascama profetas. 3 Apquillingamcoc nic nat co Judá apyanmongsayclha Dios Visqui ingac apquiltemaclha maa, ayinyema ilhnic nat apquilsilhnanoncama enlhitaoc apvisqui Manasés. 4 Najan ayinyema ilhnic nat apticyovam enlhit mepqui apquilmapsomcaa, apquilvitacpoc apyovoclhojo tingma Jerusalén. Am nic nat eltamjoc Dios Visqui ingac ingyasicjiclhojo mocjam co Judá.
5 Yitnec nic nat mocjam amyaa actalhesomalhca aptemaclha apvisqui Joacim, acvisay vaycajac crónicas apquilviscaa co Judá. 6 Apquitsepquic nic nat maa. Aptimesacpec nic nat apquitca Joaquín, etnejic apvisqui apya'monquiscama apyap ninga.
7 Am nic nat elimpocjac mocjam co Egipto najan apvisqui maa. Ayinyema ilhnic nat apvisqui co Babilonia, apsovjoc nic nat apquilimpocjay yoclhilhma, ayenmo vatsam acvisay Egipto acvaycmo vatsam Éufrates.
Enlhitaoc apquilmomap
(2~Cr 36.9-10)8 Invocmec nic nat 18 años apyimnanic apvisay Joaquín. Aptimec nic nat apvisqui nipyesicsa enlhitaoc acvaycmo tres piltin. Tingma pac nic nat Jerusalén. Inquin nic nat acvisay Nehusta. Elnatán apquitca nic nat inquin. Tingma ac nic nat Jerusalén. 9 Asomcoc nic nat aptemaclha apvisqui Joaquín napato Dios. Apvajanamquic nic nat aptemaclha apyeyjamcaa.
10 Nalhit acnim nic nat intomjac. Apquilvaac nic nat singilpilhtetemo apquilinyema yoclhilhma Babilonia. Apvisqui Nabucodonosor nic nat apquilapajascama. Apquilvocjingvocmec nic nat tingma Jerusalén. 11 Apvaac nic nat najan apvisqui Nabucodonosor. Appasmec nic nat apquilvocjay tingma. 12 Apquilamyilhamquic nic nat Joaquín apvisqui nipyesicsa enlhitaoc Judá. Aplhalhma ilhnic nat inquin najan singilpilhtetemo apancaoc najan yatapquilviscaa najan apquilyimtalhnamo. Yejemoc nic nat apquilmacpo. Apvisqui co Babilonia nic nat apquilmam. Invocmec nic nat ocho años aptimem apvisqui yoclhilhma Babilonia. 13 Apquilsovjoc nic nat apquilsayclha asoc acmamnave ayinyema tingma apponquinomap. Najan asoc apancaoc apvisqui tingma pac. Apquilpalhcatquic nic nat aclhamoclhojo asoc acnaycaoc tingma apponquinomap. Apvisqui Salomón nic nat apquillanay as asoc acnaycaoc congne. Invocmec nic nat nelha aplhanmaclha Dios, yoyam covac as acnim.
14 Innec nic nat acnalaclho enlhitaoc co Jerusalén najan apquilyimtalhnamo najan acma apquilmaycam. Invocmec nic nat diez mil apquilmomap. Apsovjoc nic nat apquilmacpo apquillanay tava ápaoc. Paj nic nat lhama enlhit apcaymomap. Apquilaymacpec nic nat apquilvamlha enlhit mepqui apquilnatam apnaycam amyip, tap tingma apvanyam. 15 Innec nic nat acnalaclho maa apvisqui Joaquín najan inquin najan apnatamcaa najan yatapquilviscaa najan apquilyimtalhnamo. Apquilmacpec nic nat tingma Jerusalén. Innec nic nat acnalaclho tingma Babilonia. 16 Aplhamoclhojo ilhnic nat singilpilhtetemo, acvaycmo siete mil. Najan mil enlhitaoc apquiltamjaycam tava ápaoc. Najan aplhamoclhojo acma apquilmaycam. Apnalaclhec nic nat apquilmomap apvisqui co Babilonia.
17 Joaquín apyaja ilhnic nat Matanías. Aptimesacpec nic nat apvisqui apyamonquiscama Joaquín. Apvisqui co Babilonia ilhnic nat apcanem. Moc apvisay nic nat aptimescasac, apvisay apvisqui Sedequías.
Apvisqui Sedequías
(2~Cr 36.11-16Jer 52.1-3)18 Invocmec nic nat veintiún años Sedequías aptimem apvisqui. Once añosnic nat aptimem apvisqui nipyesicsa enlhitaoc tingma Jerusalén. Inquin nic nat acvisay Hamutal, Jeremías apquitca. Libna ilhnic nat tingma ac. 19 Asomcoc nic nat aptemaclha napato Dios. Apyiplovcasquic nic nat aptemaclha poc apvisqui apvisay nic nat Joacim. 20 Aplovquic nic nat Dios. Aptanovquic nic nat apquiltemaclha co Jerusalén najan co Judá. Apquilvatasquic nic nat apmasma enlhitaoc. Aptanovquic nic nat apvisqui Sedequías aptemaclha apvisqui co Babilonia.
© © Biblia en Enhlet (Lengua Norte) © Paraguayan Bible Society, 1995.
