Singillhicmoscama actemaclha ningilmalhnancama
1 Altamjoc oltimnacsic siclhoc anco sicpayvam: Eltime sat mataa apquililmalhnancama actemaclha ningilpayescamo Dios. Elilmalhna mataa asoc altamila. Eltime sat mataa gracias Dios Ingyapam. Elmalhnesquis sat aplhamoclhojo enlhitaoc. 2 Elmalhnesquis sat apquilviscaa najan poc apquilyimtalhnamo. Yoyam cotamiljoc ningileyvam actemaclha actamilaycam ingvalhoc. Yoyam ongilavojo mataa Dios. Yoyam najan ongiltamilsalhcojo inganco. 3 Eycaso actomja actamila asoc. Apyispaquic mataa Dios aptomja singvomquiscama tap. 4 Apquiltamjoc Dios yoyam elvomsacpoc tap aplhamoclhojo enlhitaoc. Apquiltamjoc yoyam elyasingvomoc actomja nasoc anco. 5 Apnec apvamlha pac lhama Dios. Apnec apvamlha pac lhama Jesucristo aptomja enlhit apanco, aptomja singyipitcasquiclha Dios. 6 Apyinyovquic apanco acyimnatem apnenyic Jesucristo acyanmongam ningilvomsomalhca tap. Aplhenquic nic nat Dios acnim yoyam sat elvomsic tap aplhamoclhojo enlhitaoc. 7 Eycaso ayinyema aptimesquiscama sicvisay soycam amyaa najan apóstol siyapajasomalhca nipyesicsa enlhitaoc lhalhma anco. Nasoc anco siclhanma, cotnaja acmovan amyaa. Apquiltamjoc yoyam olhicmocsic actemaclha mongyasquiyam najan actomja nasoc anco.
8 Quellhip elyalhinga. Altamjoc coo yoyam elilmalhna quellhip moclhama apnaycamcaclha, acyiplomo ayalhnayo apquilvalhoc mepqui apquilnatjemo najan mepqui moc aclhanma apquilvalhoc. 9 Quellhiya quilvanaa. Altamjoc najan yoyam colilmalhna quellhiya. Incaymalhquic colantalhniclha alantalhnama actemaclha yoyam colmancacseje enlhit. Incaymalhquic coltamilsalhcojo anco. Nongyane nasa coyancasojo alpalhyincameycaoc ava apcatic. Mepqui asoc alyinmomo, mepqui lamom najan mepqui alantalhnama apava apmamnave. 10 Incaymalhquic colyiplovcasojo nintemaclha actamila, actemaclha ningiltamilcasomalhco inganco. Eycaso actamila anco actemaclha quilvanaa. 11 Incaymalhquic quilvanaa colaylhojo naysicsa ninpayvam mepqui alatingmoctamo yoyam colyasingvomoc. 12 Acmiyovquic coo cotnejic aclhicmoscama quilvana nipyesicsa Jesucristo apmolhama. Am najan covanac cotnejic acyimtalhnamo nipyesicsa enlhit. Incaymalhquic covanma quilvana. 13 Ayinyemaclha Dios apquillanay apmamyi ilhnic nat Adán. Alhayi ilhnic nat apquillanay Eva. 14 Jave ilhnic nat apsilhnanomap Adán. Eva eyca actomja ilhnic nat acsilhnanomalhca. Am nic nat colyajaclhoc apcascamaclha Dios. 15 Covomsalhcac sat tap quilvana acma ayitquic naysicsa acyiplovquiscama actemaclha mongyasquiyam najan actemaclha ningasicjayo najan actemaclha ningiltamilcasomalhco inganco. Incaymalhquic quilvana cotnejic quilvana anco.
© © Biblia en Enhlet (Lengua Norte) © Paraguayan Bible Society, 1995.
