1 Alhtoc ningiljalhnac nincoo. Inlhenquic ingvalhoc onlhic sat mocjam tingma Atenas. 2 Ningiltamjoc ongilapajacsic nipyesicsa quellhip ingilyalhing Timoteo. Ayinyemaclha Timoteo aptomja Dios apquilancam najan aptomja ningiltamjaycamo lhama naysicsa ninlingascama tasic amyaa ayinyema Cristo. Apvanquic eyimnatesquisic apquilvalhoc quellhip najan epayesiclhac apquilvalhoc naysicsa melyasquiyam. 3 Yoyam mellhinganmejec quellhip naysicsa acyimtalhnamo. Apquilyasamcoc quellhip, mongvanquejec mongvita acmasca. 4 Ningiltimnasquic alhta inyicje naysicsa ningma alhta nipyesicsa quellhip, mongvanquejec mongvita nincoo acmasca. Eycaso acvaa quilhvo nac jay. Apquilvita najan quellhip lha. 5 Alhtoc aljalhnac coo amyaa ayinyema quellhip. Ayapajasquic alhta ingyalhing Timoteo nipyesicsa quellhip yoyam oyasamcojo actemaclha melyasquiyam quellhip. Incacoc enquenyic colsilhnana quellhip acvisay acyipconma. Cotnejic sat alhtoc nincoo ningiltamjaycam.
6 Apvoctac mocjam ingyalhing Timoteo apquinyectamo tingma Tesalónica. Ingiltimnasquic amyaa actamila actemaclha melyasquiyam quellhip najan actemaclha apquilasicjayo. Ingiltimnasquic najan actemaclha quellhip allheneycam apquilvalhoc nincoo najan actemaclha alipvameycaoc, acno nincoo lha. 7 Quellhip ingilyalhinga. Intamilaclhec mocjam ingilvalhoc ninlinga actemaclha melyasquiyam quellhip. Ayinyemaclha yimtilhec nincoo aso naysicsa ninlingaycamco acmasca. 8 Inpayjeclhec nincoo ingvalhoc ninglinga actemaclha apquilyiplovquiscama quellhip Visqui ingac, malha singilvoncayam actemaclha acyimtalhnamo. 9 Avanjec nincoo nintimem gracias Dios Ingyapam. Avanjec anco acpayjayclha ingilvalhoc napato Dios, quellhip ayinyemaclha. 10 Ningilmalhnaquic nincoo mataa Dios Ingyapam acnim anco najan alhtaa yoyam ongilviticlhac mocjam quellhip. Yitnec sat ancoc ayaymomalhca asoc actemaclha melyasquiyam, pac ongilpasmoc sat nincoo.
11 Ningiltamjoc yoyam jingnaliclhac nipyesicsa quellhip Dios Ingyapam najan Jesucristo Visqui ingac. 12 Ningiltamjoc nincoo yoyam eyancasiclhac Visqui ingac actemaclha apquilasicjayo nipyesicsa quellhip najan nipyesicsa aplhamoclhojo enlhitaoc. Acno nincoo lha ningilasicjayo quellhip. 13 Ningiltamjoc najan yoyam elyimnatesquisic apquilvalhoc Visqui ingac. Yoyam eltimjic quellhip apquilponquinomap najan mepqui apquilsilhnanomap napato Dios Ingyapam naysicsa apvoycta sat Jesucristo Visqui ingac najan apquillhalhmaa.
© © Biblia en Enhlet (Lengua Norte) © Paraguayan Bible Society, 1995.
