Filisteos apquilpatmaoclha yamit aysicsic
1 Inmalhquic nic nat tingma Eben-ezer yamit aysicsic acyitnamaclha Dios appayvam. Apquilpatmaoclhec nic nat tingma Asdod. 2 Apquilpiquinquic nic nat yamit aysicsic congne tingma, payjoc quilaycmasquiscama acyitsomalhca dios acvisay Dagón. 3 Moc acnim nic nat intomjac. Apquilantalhnec nic nat enlhitaoc co Asdod, apquilvita acyanina nalhpop quilaycmasquiscama Dagón, payjoc acyitnamaclha yamit aysicsic. Innec nic nat animsaclho netin quilaycmasquiscama. 4 Moc acnim nic nat intomjac. Apquilvitac nic nat acyanina nalhpop quilaycmasquiscama, payjoc acyitnaclha yamit aysicsic. Apquilvitac nic nat ayintem ayispoc quilaycmasquiscama najan anit ameoc, acnaycaoc coning apatong tingma. Mepqui ilhnic nat moc asoc ayintem. 5 Apquilantalhnec nic nat mataa apquiltimesaycam quilaycmasquiscama Dagón as tingma Asdod, acvaycmo as ningvamlha nac jay. Apquilacac mataa apquiltoyam coning apatong tingma, acyanina siclhoc nic nat quilaycmasquiscama.
6 Apyanmongsaclhec nic nat Dios apquiltemaclha apancaoc co Asdod najan nipyava tingma. Apquillingamcoc nic nat acmasca, malha pascapma apyimpeoc. 7 Pilapcasquic nic nat apquilvita co Asdod, apquiltomja apquilanya: Dios apancaoc enlhitaoc Israel aptomja apyanmongsayclha nintemaclha nincoo najan actemaclha quilaycmasquiscama Dagón, acyitsomalhca dios inganco. Incaymalhquic ongilyinyovsic yamit aysicsic acyitnamaclha Dios appayvam, coytejec mocjam ningyesicsa — nic nat apquiltomjac.
8 Apquilansaclhec nic nat apyovoclhojo apquilyimtalhnamo filisteos. Apquiltomjac nic nat apquilanya: —¿Jalhco sat ontimjic yamit aysicsic acyitnamaclha Dios appayvam? — nic nat apquiltomjac.
—Elpatmaoclha sat tingma Gat — nic nat apquiltomjac apquilatingmavo.
Apquilpatmaoclhec nic nat filisteos tingma Gat yamit aysicsic. 9 Apquillingamcoc nic nat acmasca apyovoclhojo enlhitaoc tingma Gat, najan apquitcavoc najan apquilvanyam, actemaclha pascapma alnapma. Yiplovcoc nic nat acyivey ayay apquilvalhoc. 10 Apquilpatmaoclhec nic nat filisteos yamit aysicsic, coytic tingma Ecrón. Apquilacac nic nat co Ecrón, apquilvita yamit aysicsic acyitnamaclha Dios appayvam. Apquilpalhamam nic nat: Jingilmascoscomoc sat yamit aysicsic acyitnamaclha Dios appayvam. Actomja apancaoc enlhitaoc Israel — nic nat apquiltomjac.
11 Apquilansaclhec nic nat apquilyimtalhnamo filisteos, ayinyema ayay apquilvalhoc, apquiltomja apquilanya: Elyinyovquis sat maa yamit aysicsic acyitnamaclha Dios appayvam, actomja apancaoc enlhitaoc Israel. Elpatmaoclha sat maa, eltajicsojo sat ayinyemayaclha siclhoc alhta. Mongilmasquingvomejec sat ningyovoclhojo — nic nat apquiltomjac.
12 Inlingalhquic nic nat apquilpalhamaycam natingma acvaycmo netin. Inquilnapquic nic nat pascapma enlhitaoc, apquilitsepquic nic nat mataa poc.
© © Biblia en Enhlet (Lengua Norte) © Paraguayan Bible Society, 1995.
