David appalhaviyam filisteos
1 Inlhenquic nic nat apvalhoc David: Naso, nalhit acnim jeyajic sat Saúl. Ongvinyejic sat yoclhilhma Filistea. Elvaticsic sat seyamascam yoclhilhma Israel lhalhma anco. Copvanquejec sat jemoc Saúl — nic nat intomjac apvalhoc. 2 Apnalaclhec nic nat seiscientos apquillhalhmaa moc yoclhilhma, eltimesam sat apvisqui Aquis, apyap nic nat Maoc, apvisqui tingma Gat. 3 Apquilpalhavocmec nic nat tingma Gat, apvisqui maa Aquis, moclhama apquilmolhama. Apnatamcaa David ilhnic nat Ahinoam de Jezreel najan Abigail, aptava niptamin Nabal co Carmel. 4 Aplingac nic nat Saúl amyaa apquinyem David. Apquilvatasquic nic nat apyamascam.
5 Aptomjac nic nat David apcanya Aquis: —Lhip visqui ingac. Inlhenquic evalhoc olhic sat poc tingma as yoclhilhma. Coo sicvisay silancam lhip. Coymalhquejec olhic mataa apnaclha lhip visqui ingac as tingma apvanyam — nic nat aptomjac David.
6 Am nic nat emyavac apvisqui Aquis elhic David tingma Siclag. Apquiltimec mataa as ningvamlha nac jay: Co Judea apancaoc tingma Siclag — intomjac amyaa.
7 Invocmec nic nat lhama año najan cuatro piltin appalhaviyam David nipyesicsa filisteos. 8 Apnalaclhec nic nat David apquillhalhmaa elimpocjac maa: nipyesicsa Gesur, nipyesicsa Gezer, nipyesicsa Amalec, actomja apquilaoclha apancaoc. Ayenmo Telaim acvaycmo nipiyam Shur, acvaycmo yoclhilhma Egipto. 9 Apquilnapacpec nic nat as yoclhilhma. Apticyovquic nic nat enlhitaoc najan quilvanaa. Apnalaclhec nic nat David nipquesic, najan vayqui, najan yamelyeyjaycoc, najan voncayispoc, najan apava apquilvitay niptamin cotnaja ingmoc. Apquiltajaclhec nic nat apnaclha apvisqui Aquis.
10 Aptomjac nic nat Aquis apcanya David: —¿Co laa acpayjo apquilnapacpo acnim nac jay? — nic nat aptomjac.
Apcatingmavoc nic nat David: —Payjoc nipiyam nipyesicsa co Judá. Najan maa: payjoc nipiyam nipyesicsa co Jerameel. Najan maa: payjoc nipiyam nipyesicsa quenitas — nic nat aptomjac David.
11 Apticyovquic nic nat enlhitaoc najan quilvanaa. Paj covocmoc mataa as amyaa tingma Gat. Am nic nat colngalhcac amyaa aptomjaclha mataa David. Eycaso aptemaclha mataa David naysicsa aptiyascam nipyesicsa filisteos. 12 Am nic nat eyascacmoc mataa Aquis aptomjaclha David. Inlhenquic nic nat mataa apvalhoc: Aptanovacpec mataa David nipyesicsa co Israel. Comasquejec sat mataa setnesaycam David — nic nat intomjac apvalhoc Aquis.
© © Biblia en Enhlet (Lengua Norte) © Paraguayan Bible Society, 1995.
