Aptemaclha Jonatán
1 Nalhit acnim nic nat intomjac. Saúl apquitca ilhnic nat Jonatán.
Aptomjac nic nat Jonatán apcanya aplhalhma apyimnanic: —Noc, incanit sat ongiljalhtiplhquetic vatsam. Ongilnapoc sat tap vatsam grupo filisteos — nic nat aptomjac.
Am nic nat elhenac Jonatán napato apyap. 2 Apnec nic nat Saúl nicja yoclhilhma Gabaa, coning yamit granado, payjoc acliclamalhquilha trigo apactic. Apquillhalhmaa ilhnic nat seiscientos apnaymacoc enlhit. 3 Am nic nat elyasamcoc apnaymacoc enlhit apyasaclha Jonatán. Apcasinancama ilhnic nat apvisay Ahías, apsoycam asoc ayamosilha sicas. Ahitob apquitca ilhnic nat Ahías, Icabod apipjenim, Finees aptavin, Elí aptavin niptamin nic nat. Sacerdote ilhnic nat Elí tingma Silo.
4 Apyilhacpoc nic nat Jonatán eyamoc grupo filisteos. Yitnec nic nat malamong mataymong, lhama nicja acvisay mataymong Boses, moc nicja acvisay Sene. 5 Lhama acyitna nilhqueyja, payjoc Micmas. Moc acyitna nipiyam, payjoc Gabaa.
6 Aptomjac nic nat Jonatán apcanya apyimnanic: —Noc, ongilyamoc grupo filisteos metnaja nintemolhama. Jingilpasmoc sat lhaja Dios. Conyemac sat Dios nintemaclha ningyimnatem, tasic nimpintalhnama, tasic najan incanit — nic nat aptomjac Jonatán.
7 Apcatingmavoc nic nat aplhalhma: —¡Lhip sat iyasamcojo! Coo eyca siclhalhma, opasmoc sat lhip — nic nat aptomjac.
8 Aptomjac nic nat Jonatán apcanya: —Quip ilanojo. Ongilyamoc siclho apnamcaclha filisteos, yoyam jingvita. 9 Apquiltomjac sat ancoc singilanya: —Va, ¡yejemec quellhip! — sat eltimjic. Mongilyamejec sat apnamcaclha. 10 Apquiltomjac sat ancoc singilanya: —Va, ¡elmiyama jilip!— sat eltimjic. Ongilyamoc sat apnamcaclha. Cotnatsalhquejec sat singilpasmom Dios, ongiltimjic ningilyimnatem — nic nat aptomjac Jonatán.
11 Pilapcasquic nic nat apquilvitacpo apcanit. Apquiltomjac nic nat filisteos apquilanya: — Quip elanojo, ¡hebreos nac lha! Apquilyilhanmeycam alhta congne malhic — nic nat apquiltomjac. 12 Apquilyimnatasquic nic nat apquilpayvam filisteos, apcanyacpo Jonatán najan aplhalhma: —¡Elmiyama jilip! ¡Yitnec nincoo amyaa! — nic nat apquiltomjac.
Aptomjac nic nat Jonatán apcanya aplhalhma: —Noc, ningilyimnatem ayinyema Dios, ongilmoc sat cotnaja ingmoc — nic nat aptomjac.
13 Aploycam apmeoc najan apmancoc nic nat Jonatán, apquinamta netin mataymong. Apyiplaclhec nic nat aplhalhma. Apnalhpolintac nic nat filisteos apquilnapomap, apquilyinjam Jonatán. Apquilnapquic nic nat apyimnanic. 14 Apmamyi ilhnic nat apquiltimec apquilimpocjay. Apticyovquic nic nat veinte cotnaja ingmoc. 15 Apquilacac nic nat apyovoclhojo filisteos najan apnaycam carpa tingma. Apquilacac nic nat grupos filisteos najan grupos apquilminyilhma. Inyovjam nic nat nalhpop, inyangvocmec nic nat apquilay filisteos.
16 Apnam nic nat Saúl apquilasinancama tingma Gabaa, apquilmolhama tribu Benjamín. Apquilvitac nic nat acyinamam olhma nipyesicsa filisteos.
17 Aptomjac nic nat Saúl apquilanya apquillhalhmaa enlhitaoc: —¡Elyipsitaoc ninlhalhmaa! ¿Ningilanalhco ya mocjam? — nic nat aptomjac.
Am nic nat elanacpoc enlhitaoc. Am nic nat etacpoc Jonatán najan aplhalhma apyimnanic. 18 Yitnec nic nat asoc ayamosilha sicas nipyesicsa israelitas.
Aptomjac nic nat Saúl apcanya sacerdote Ahías: —Isanta siclho sicas asoc ayamosilha, actomja apanco Dios — nic nat aptomjac.
19 Naysicsa apquilpamejitsomap nic nat Saúl najan sacerdote, acyangvocmo acyinamam olhma nipyesicsa filisteos.
Aptomjac nic nat Saúl apcanya sacerdote: —¡Vamlha itne, notingya nasa! — nic nat aptomjac.
20 Apquimpaclhec nic nat Saúl najan apnaymacoc, yoyam elnapacpoc. Pilapcasquic nic nat apquilvita apquiltemaclha filisteos, apquilnapacpo nipyesicsa apanco, mepqui cotnaja ingmoc. 21 Apnam nic nat nipyesicsa filisteos enlhit apquilpalhaviyam nano, apquilvisay hebreos. Apquilpasmec nic nat apquilpalhcomap elinmelham israelitas. Pilapcasquic nic nat apquilpaycacpo, elnapacpoc apquilpasmeyquiclha Saúl najan Jonatán, elinmelham filisteos. 22 Inlingalhquic nic nat amyaa apquilinyem filisteos. Apquillingac nic nat israelitas apquilyilhanmeycam inquilhe Efraín. Apquilquimpaclhec nic nat elinmelham najan elnapacpoc filisteos. 23 Apquilnapacpec nic nat acvaycmo tingma Bet-avén. Apquilyimnatem nic nat israelitas ayinyema Dios.
Saúl aplhanma mepqui apyeycajascaoc
24 Apquillingamcoc nic nat mayic enlhitaoc Israel, ayinyema aplhanma ilhnic nat siclho Saúl: —Etvasacpoc sat moclhama enaymacoc, aptomja aptom acnim nac jay. Osavojoc siclho sicyanmongsayclha apquiltemaclha cotnaja ingmoc, natamin eltovamcoc sat mocjam — nic nat aptomjac Saúl. Apquillhenquic nic nat apnaymacoc mepqui apquilyeycajascaoc, elyiplovcasojoc sat apcanamaclha Saúl. 25 Pilapcasquic nic nat enlhitaoc apquilvita yamyovjene nalhma. 26 Apquilvitac nic nat apyingmenic actiyapma, malha yingmin acpaliyam nic nat intomjac. Am nic nat eltavac enlhitaoc. 27 Am nic nat eyasamcoc Jonatán actomjaclha aplhanma Saúl, yoyam elyiplovcasojo apnaymacoc, meltovejec sat as acnim. Aptimec nic nat Jonatán nav'a yamit papac yamyovjene. Aptovquic nic nat apyingmenic. Inyimnaclhec nic nat mocjam apyimpejic Jonatán, inmasquec apyampay.
28 Aptomjac nic nat lhama israelita apcanya: —Lhip apyap alhta singanama, acyiplomo ninlhanma mepqui ningyeycajascaoc. Nintovquic sat ancoc as acnim nac jay, onlingamcojoc sat sintovascama. Mongvanquejec ontoc. Eycaso ayinyema ningilyampay ningyovoclhojo — nic nat aptomjac.
29 Apcatingmavoc nic nat Jonatán: —Aptemaclha apanco tata coo. ¡Quip jelanojo coo! Sictom yamyovjene apquitcoc, actomja acyimnatescama eyimpejic. 30 Aptovcamquic lha ancoc quellhip nintom apquilhacjam niptamin cotnaja ingmoc, melngamquejec apquilyampay. Nasoc lhac elsavojoc quellhip apquilnapomap filisteos — nic nat aptomjac Jonatán.
31 Apquilnapacpec nic nat israelitas. Apquilinyajamquic nic nat filisteos tingma Micmas acvaycmo Ajalón. Apquilyampavoc nic nat israelitas. 32 Apquilvitac nic nat asoc apquilhacjam niptamin cotnaja ingmoc. Apquilnapquic nic nat nipquesic najan vayqui najan vayqui ayitcoc. Aptovcamquic nic nat apitic angvitic acyiplomo ema.
33 Innec nic nat altimnasa amyaa Saúl: —Apquilsilhnanacpec lhac apanco enlhitaoc napato Dios. Aptovcamquic lhac apitic angvitic acyiplomo ema — nic nat intomjac amyaa.
Aptomjac nic nat Saúl apquilanya: —¡Melyascalhma nac quellhip! ¡Elyiptelingvasenta mataymong acyivey! 34 Elane sat enlhitaoc enalantac vayqui inquilinava najan nipquesic. Elnapoc sat quellhip yoyam eltovamcoc. Melsilhnanacpejec sat mocjam napato Dios. Meltovejec sat mocjam apitic angvitic acyiplomo ema — nic nat aptomjac Saúl.
Alhtaa ilhnic nat intomjac. Apnalantac nic nat vayqui inquilinava yoyam coticyoc. 35 Apquillanac nic nat Saúl mataymong ningilmalhnancamaclha Dios. Siclhoc anco nic nat apquillanay Saúl.
36 Aptomjac nic nat Saúl apquilanya: —Noc, ¡ongminlhinam sat filisteos alhtaa nac jay! Onsavojoc sat apquilnatam, onsavojoc sat ningilnapma cotyapma mocjam acnim — nic nat aptomjac.
Apquilatingmavoc nic nat: —Lhip sat iyasamcojo yavamlha etnejic — nic nat apquiltomjac.
Aptomjac nic nat sacerdote: —Incaymalhquic siclho ongilpamejitsalhcojo Dios — nic nat aptomjac.
37 Appamejitcasquic nic nat Saúl Dios: —¿Ingvanqui ya ongminlhinam filisteos? Naso ya ningilyimnatem nincoo — nic nat aptomjac.
Am nic nat ingyatingmavoc Dios. 38 Aptomjac nic nat Saúl apquilanya: —Elmiyama jilip, quellhip apquilviscaa singilpilhtetemo. Elyipcon sat ayinyemayaclha ningilsilhnanomalhca. 39 Nasoc sicpayvam napato Dios singvomquiscama tap: Ematong sat aptomja apquilsilhnanomap apanco. Mepqui najan sicmasma sictamongvoyam Jonatán — nic nat aptomjac Saúl.
Am nic nat ingyatingmavoc lhama enlhit. 40 Aptomjac nic nat Saúl apquilanya israelitas: —Ingyaniclha sat quellhip lhama nicja. Otnamam sat moc nicja, coo najan sictamongvoyam Jonatán — nic nat aptomjac.
Apquilatingmavoc nic nat: —Lhip sat iyasamcojo yavamlha etnejic — nic nat apquiltomjac.
41 Apyimnatasquic nic nat appayvam Saúl: —Dios Apyimtalhnamo, ¿so actomja yi mejeyatingmoctama nac lhip sicvisay silancam lhip? ¿Naso ya ayinyema coo, naso ya sictamongvoyam Jonatán apsilhnanomap apanco? Ongvitac sat sicas monquinatquiscama Urim, siclhenamalhca coo najan Jonatán. Ningvitac sat ancoc sicas monquinatquiscama Tumin, cotnejic sat nasoc anco ingnaymacoc apquilsilhnanomap apanco — nic nat aptomjac Saúl.
Invitalhquic nic nat sicas monquinatquiscama apsilhnanomap apanco Jonatán najan Saúl. Mepqui ilhnic nat apquilsilhnanomap apanco apnaymacoc enlhitaoc.
42 Aptomjac nic nat Saúl apquilanya: —Eltovas sat sicas, monquinatquiscama ayinyema coo, ayinyema inlhojo Jonatán — nic nat aptomjac.
Invitalhquic nic nat apsilhnanomap apanco Jonatán. 43 Aptomjac nic nat Saúl apcanya Jonatán: —Ilhen sat lhip apsilhnanomap apanco — nic nat aptomjac.
Aplhenquic nic nat Jonatán: —Naso, acyipconquic alhta yamyovjene apyingmenic, silticlhiclhama papac yamit ayitcoc sicmaycam coo. Mongvacyejec coo omatong quilhvo nac jay — nic nat aptomjac.
44 Apyimnatasquic nic nat appayvam Saúl: —¡Momyovjec sat lhip Jonatán! Acmiyovquic sat ancoc coo, eyanmongsiclhac sat Dios sictemaclha coo — nic nat aptomjac.
45 Apquilatingmavoc nic nat apnaymacoc enlhit: —¡Copvanquejec ematong Jonatán! ¿Jalhco alhta ayinyema ningilyimnatem nipyesicsa cotnaja ingmoc? Aplhalhma mataa Dios Jonatán, ayinyemayaclha ningilyimnatem. ¡Ningmiyovquic nincoo Jonatán! ¡Melngamquejec sat acmasom! Cotyemejec sat nalhpop lhama anco apva Jonatán — nic nat apquiltomjac.
Apmiyovcacpec nic nat Jonatán. Am nic nat ematnac. 46 Apquilvatasquic nic nat Saúl elminlhinic mocjam filisteos. Aptajavoc nic nat Saúl. Apquiltajaclhec nic nat filisteos.
47 Apvisqui ilhnic nat Saúl nipyesicsa enlhitaoc Israel. Apquilnapacpec nic nat mataa cotnaja ingmoc, apquilvisay co Moab, co Amón, co Edóm, co Soba apvisqui apancaoc, najan co Filistea. Apyimnatem nic nat mataa Saúl, apvita inlhojo apquilnapomap. 48 Apcansaclhec nic nat singilpilhtetemo elnapacpoc co Amalec. Apquilvomcasquic nic nat nipyesicsa grupos apquilminyilhma.
49 Eycaso ilhnic nat Saúl apquitquic: apvisay Jonatán, apyalhing Isuí, poc apyalhing Malquisúa. Anit nic nat apquitquic quilvanaa: Merab najan inyalhing Mical. 50 Saúl aptava ilhnic nat Ahinoam, inyap nic nat apvisay Ahimaos. Apvisqui singilpilhtetemo ilhnic nat apvisay Abner, apyap nic nat Ner, apvisay nic nat Saúl apyaja. 51 Saúl apyap nic nat Cis. Abner apyap nic nat Ner. Apquilyap as apcanit nic nat Abiel.
52 Avanjec nic nat apquilnapomap Saúl apquinmelhaycam filisteos, aclhamoclhojo acnim aptiyascam nic nat Saúl. Apcanyacpec nic nat mataa enlhit apyimnatem najan apvascapma etnejic appasmeyquiclha Saúl.
© © Biblia en Enhlet (Lengua Norte) © Paraguayan Bible Society, 1995.
