Actemaclha ningasicjayo
1 Evanquic sat ancoc apquilpayvam enlhitaoc najan apquilpayvam ángeles. Eyca acyitna mepqui siyasicjayo. Otnejic sat coo malha tava ápac alicnajaycam najan malha asoc payjem alicnajaycam. 2 Evanquic sat ancoc olngacsic amyaa ayinyema Dios. Acyasamcoc sat ancoc aclhamoclhojo asoc acyilhomalhca ayinyema Dios. Yitnec sat ancoc aclhamoclhojo sicyascamco. Yitnec sat ancoc moyasquiyam acyimnatem yoyam oyaninsic inquilhe acvinatem. Eyca acyitna mepqui siyasicjayo. Alhtoc sat cotnejic sictemaclha. 3 Acmilasquic sat ancoc aclhamoclhojo silnatam nipyesicsa enlhit mepqui apquilnatam. Am sat ancoc omyovsalhcoc ajanco, malha acmeta sicyovoclhojo sat cotnejic. Eyca acyitna mepqui siyasicjayo. Alhtoc sat cotnejic sictemaclha.
4 Actemaclha actamilaycam ingvalhoc ayinyema ningasicjayo najan ninpayesayclha apvalhoc ingmoc. Am conyemac ningasicjayo actemaclha ningilyasipquiscama najan ningyimtalhnesomalhco inganco najan ayajamalhco ingvalhoc. 5 Am conyemac ningasicjayo actemaclha ningvinéycam najan ningilmiyovsomalhco ingmamyi asoc najan ningnatjemo najan ninlhanvayclho mataa sintimesquiscama ningmasom. 6 Eyca ayinyema ningasicjayo actemaclha acyitnocjayo ingvalhoc ningvita ingmoc aptemaclha acmasom. Najan actemaclha acpayjayclha ingvalhoc ningvita actomja nasoc anco. 7 Najan ayinyema ningasicjayo actemaclha ningilinlhanyam najan actemaclha mongyasquiyam najan actemaclha aljalhneycam ingvalhoc najan actemaclha actamilaycam ingvalhoc.
8 Comasquingvomejec mataa actemaclha ningasicjayo. Covac sat acnim yoyam comascoc ninlingascama amyaa ayinyema Dios. Comascoc sat najan actemaclha ningmovan moc actemaclha ninpayvam. Comascoc sat najan actemaclha ningyascamco asoc lhalhma anco. 9 Am onsovjac mocjam nincoo actemaclha ningyascamcolhma. Am onsovjac mocjam ningyascamco naysicsa ninlingascama amyaa ayinyema Dios. 10 Covac sat acnim yoyam ongilyasingvomoc acyovoclhojo actemaclha. Onsavojoc sat actemaclha ningyascamco. Comasquingvomoc sat actimem nicja.
11 Sictemaclha eyitcoc alhta. Innoc alhta sicpayvam actemaclha sicaa. Innoc alhta aclheneycam evalhoc actemaclha sicaa. Innoc alhta sicyasingvoyam actemaclha sicaa. Acvanamyic alhta coo, enlhit alhta actomjac. Acyinyovquic alhta actemaclha sicaa. 12 Am ongilyasingvocmoc mocjam asoc yoyam colvac sat. Malha asoc ningvitay laneyo intalhamavo quilhvo nac jay. Covac sat acnim yoyam ongvitac sat ningato. Acyasingvocmec quilhvo nac jay anit asoc. Covac sat acnim yoyam oyasingvomoc aclhamoclhojo actemaclha, acno seyicpilquemo mataa Dios. 13 Comasquingvomejec sat mataa natqui actemaclha: Lhama acvisay mongyasquiyam, moc acvisay aljalhneycam ingvalhoc, moc acvisay ningasicjayo. Actemaclha ningasicjayo actomja ayimja amamyi anco, am colhno moc.
© © Biblia en Enhlet (Lengua Norte) © Paraguayan Bible Society, 1995.
