Apquilimpocjay nipyesicsa amonitas
(2~S 12.26-31)1 Niptamin piyam apcaneclhec nic nat mataa apquilviscaa, yoyam elimpocjac poc enlhitaoc. Apcansaclhec nic nat Joab apnaymacoc singilpilhtetemo yoyam elimpocja nipyesicsa amonitas. Apnatovasquic nic nat yoclhilhma, najan apyovoclhojo tingma Rabá. Apnec nic nat apvisqui David tingma pac Jerusalén. 2 Natamin apquilimpocjay nic nat apmiyaclho apvisqui David, apvita appocanma apvisqui (quilaycmasquiscama) allanomalhca oro alyinmom najan mataymong ayitcoc alyinmom alyipitsomalhca appocanma corona. Invocmec nic nat treinta y tres kilo oro alyinmom. Inpiquenalhquic nic nat corona apyitsicsic David. Apvitac nic nat maa David cotlaycaoc asoc almamnave. 3 Apquilanyacpec nic nat amonitas apquilaymomap tingma apvanyam eltimesam nipyesicsa israelitas, payjoc alyaptomalhquilha yamit, najan apquiltamjaycam tava najan yamtava apquiltipilquem mataymong. Apnasoc nic nat apvisqui David apyovoclhojo tingma apquilvanyam amonitas. Apquiltajaclhec nic nat tingma Jerusalén apyovoclhojo singilpilhtetemo apnalayclha apvisqui David.
Apquilimpocjay nipyesicsa filisteos
(2~S 21.18-20)4 Apquilimpocjac nic nat nipyesicsa filisteos tingma Gezer. Apcajac nic nat Sibecai apquinyema Husa lhama filisteo apvinatem apvisay Sipai. 5 Mocjam nic nat apquilimpocjay nipyesicsa filisteos. Apmatnec nic nat apvinatem, apvisay Lahmi, appipma ilhnic nat Goliat tingma Gat. Acyivey nic nat sovjeva pac, am colhno moc.
6 Mocjam nic nat apquilimpocjay tingma Gat. Apnec nic nat maa enlhit apvinatem, veinticuatro ilhnic nat apopjeoc: moclhama apmic mataa seis apopjeoc, najan moclhama apminic seis apopjeoc. Enlhit apquilvinatem aptovana ilhnic nat maa. 7 Aptomja ilhnic nat apvennéycam enlhitaoc Israel. Apmatnec nic nat maa, ayinyema apcajem Jonatán, Simea apquitca, David apyalhing. 8 Refa aptovana niptamin nic nat enlhit apquilvinatem, tingma Gat. Apquilmacpec nic nat. Apquilmam nic nat apvisqui David najan singilpilhtetemo apquilviscaa.
© © Biblia en Enhlet (Lengua Norte) © Paraguayan Bible Society, 1995.
