Singilpilhtetemo apquillhalhmaa David
1 Apquilpasmeclhec nic nat apvisqui David napocja apquillhalhmaa naysicsa apquinyem David apya'mascam Saúl najan apquillhalhmaa. Cis apquitca ilhnic nat Saúl. Apquilpasmeclhec nic nat tingma Siclag. 2 Acma apquilmaycam nic nat as enlhitaoc. Apvancaac nic nat yanca pilhpaalh najan mataymong ayitcoc yamvanteta. Apvancaac nic nat elmoc lhama apmic, acno ilhnic nat moc apmic. Eycaso ilhnic nat apquilvisay:
Apquilmolhama ilhnic nat Saúl tribu Benjamín: 3 Ahiezer mayayo apyimnatem najan Joas, Sea apquitquic, apquilinyemayaclha tingma Gabaa. Poc nic nat Jeziel najan Pelet, Azmavet apquitquic. Poc nic nat Beraca najan Jehú, apquilinyemayaclha Anatot. 4 Ismaías apquiltimem gabaonita, apvisay mayayo nipyesicsa treinta apquilyimnatem. Poc nic nat: Jeremías, Jahaziel, Johanán, Joazabad co Gedera. 5 Eluzai, Jerimot, Bealías, Semarías. Sefatías apquiltimem harufita. 6 Elcana, Isías, Azareel, Joezer najan Jasobeam apquiltimem coreítas. 7 Najan Joela najan Zabadías, Jeroham apquitquic co Gedor.
8 Apquilpasmeclhec nic nat mocjam apquilmolhama tribu Gad, apna ilhnic nat apvisqui David yoclhilhma actamopeycaoc. Apquilyimnatem nic nat enlhitaoc acma apquilmaycam sovjeva najan asoc ningajapsomalhca. Apquilyitsomacpo ilhnic nat yamacmeyva acyimnatem najan apquilinyem nalhpop malha popyit. 9 Eycaso ilhnic nat apquilvisay: Ezer, poc Obadías, poc Eliab. 10 Poc nic nat Mismana poc Jeremías. 11 Poc nic nat Atai, poc Eliel. 12 Poc nic nat Johanán, poc Elzabad. 13 Poc nic nat Jeremías, poc Macbanai. 14 Eycaso ilhnic nat apquilvisay apquilmolhama Gad singilpilhtetemo apquilviscaa. Mayayo ilhnic nat lhama, am nic nat elhno poc cien enlhitaoc. Mayayo ilhnic nat lhama, am nic nat elhno poc mil enlhitaoc acma apquilmaycam. 15 Apquilmilanquic nic nat vatsam Jordán naysicsa acyeniyam yingmin. Apquilacac nic nat yingmin acvanyam enlhitaoc apnaycam alvata nicja actiyapmaclha acnim najan moc nicja actalhningvamlha acnim.
16 Apquilpasmeclhec nic nat apquilmolhama tribu Benjamín najan apquilmolhama Judá napocja enlhitaoc. Apquilpalhavocmec nic nat tingma apyimnatem apnaclha David. 17 Apquilamyilhamquic nic nat David, aptomja apquilanya: Apquilvaac sat ancoc quellhip yoyam jelpasmoc, acyitna inlhojo actamilaycam apquilvalhoc, omoc sat tacja acyiplomo acpayjayclha evalhoc. Apquilvaac sat ancoc quellhip, yoyam jelinmelham yoyam omalhcac nipyesicsa cotnaja ingmoc, naysicsa mepqui sicsilhnanomalhca ajanco. ¡Dios Visqui apancaoc ningilyeyjamcaa aptomja apvitayo, eyanmongsiclhac sat aptemaclha apanco apmapsom!
18 Apnec nic nat Amasai, apvisqui nipyesicsa treinta apquilyimnatem. Malha espíritu de Dios ilhnic nat apvalhoc maa, aptomja apyimnatesa appayvam:
¡Mayayo nac lhip David, Isaí apquitca!
¡Actamilaycam apvalhoc lhip ayinyema Dios!
¡Mayayo nac lhip najan apyovoclhojo apquillhalhmaa!
¡Dios Visqui ingac apmasma lhip najan appasmom! — nic nat aptomjac.
Apquilmacpec nic nat tacja apnaclha David. Apquiltimesacpo apquilviscaa nipyesicsa singilpilhtetemo.
19 Apquilpalhavocmec nic nat napocja apquilmolhama tribu Manasés elpasmoc apvisqui David. Apnec nic nat siclho David nipyesicsa filisteos ingyinmelham apvisqui Saúl. Apquilmiyovcoc nic nat apquilviscaa filisteos, ayinyema apquilyasquiyam. Intomjac nic nat apquilvalhoc: Naysicsa ningimpocjay Saúl, jinginmelham sat David, epasmiclhac sat mocjam Saúl, aptomja apvisqui pac siclho — nic nat intomjac apquilvalhoc. 20 Apnaclhec nic nat tingma Siclag apvisqui David. Apquillhalhmaa ilhnic nat: Adnas, Jozabad, Jediael, Micael, Jozabad, Eliú najan Ziletai, apquilviscaa singilpilhtetemo Manasés. 21 Eycaso ilhnic nat apquillhalhmaa David, enlhitaoc apquilyimnatem apquiltimesomap singilpilhtetemo apquilviscaa. 22 Aplhameclhec nic nat apquillhalhmaa David acvaycmo appintalhnama apanco ejercito singilpilhtetemo.
Apyovoclhojo singilpilhtetemo
23 Apquitsepmec nic nat apvisqui Saúl. Apcaneclhec nic nat tingma Hebrón apnaclha David appintalhnama enlhitaoc, eltimesquisic apvisqui David, acno ilhnic nat apcanama Dios Visqui ingac. 24 Enlhitaoc acma apquilmaycam: Tribu Judá apquilmolhama 6800 acma apquilmaycam sovjeva najan ningajapsomalhca. 25 Tribu Simeón apquilmolhama 7100 apquilyimnatem acma apquilmaycam. 26 Tribu Leví apquilmolhama 4600. 27 Apquilmolhama Aarón apvisqui Joiada nic nat 3700. 28 Apquilmolhama Sadoc, apyimnanic apyimnatem apquillhalhma 22. 29 Tribu Benjamín apquilmolhama 3000, poc nic nat apquillhalhma apvisqui Saúl. 30 Tribu Efraín apquilmolhama 20800 apquilyimnatem acma apquilmaycam. 31 Media tribu Manasés 18000, apquilanyacpec nic nat eltimesquisic apvisqui David payjoc tingma Hebrón. 32 Tribu Isacar apquilviscaa najan apquillhalhmaa 200, apquilyascamco actemaclha apquilimpocjay cotnaja ingmoc. 33 Tribu Zabulón apquilmolhama 50000 acma apquilmaycam, apquilmopvan elpasmoc apvisqui David. 34 Tribu Neftalí apquilviscaa 1000 najan apquillhalhmaa 37000 acma apquilmaycam. 35 Tribu Dan 28600 enlhitaoc acma apquilmaycam. 36 Tribu Aser 40000 enlhitaoc apquilyimnatem acma apquilmaycam. 37 Tribu Rubén najan Gad najan media tribu Manasés 120000 acma apquilmaycam. Apquileyvomaclha ilhnic nat moc nicja vatsam Jordán, payjoc actiyapmaclha acnim.
38 Apcaneclhec nic nat as enlhitaoc acma apquilmaycam tingma Hebrón. Apquililtamjoc nic nat apquilpasmeyquiclha eltimesquisic apvisqui, etnejic apvisqui David nipyesicsa apyovoclhojo enlhitaoc Israel. Am nic nat coyeycajalhcac apquilvalhoc apyovoclhojo apquilmolhama najan apnaymacoc. 39 Apquilnaclhec nic nat maa tres acnim. Am nic nat elsovjac aptoycaoc najan apyinaycaoc ayinyema apnaymacoc apquilmam tacja. 40 Nicja ilhnic nat apquileyvomaclha apquilmolhama Isacar, apquilmolhama Zabulón najan apquilmolhma Neftalí. Apquilpatmentac nic nat aptoycaoc yamelyeyjaycoc acpaoc, camellos acpaoc, yeyjaycoc acpaoc najan vayqui acpaoc. Cotlaycaoc nic nat nintom apquilpatmeyquinta: motajap harina, najan acyilhna acyamay higo najan pasa, uva ayingmenic, najan olivo ayingmenic aceite, najan apitic vayqui najan nipquesic. Am nic nat elsovjac aptoycaoc. Avanjec nic nat acpayjayclha apquilvalhoc apyovoclhojo apquilmolhama Israel.
© © Biblia en Enhlet (Lengua Norte) © Paraguayan Bible Society, 1995.
