Acnim yoyam emacpoc Jesús
(Mt 26.1-5Lc 22.1-2Jn 11.45-53)1 Anit acnim alhta pa eltamjacpoc pascua, caya apquilyeycajaycaoc. Moc ningiltimem caya quilpasmongam mepqui apquimpascaoc. Apquilyilhamacpo alhta apquilimja apmamyi sacerdotes najan apquilyascamco apquiltemaclha. Apquilyilhanmamquic alhta, yoyam elmoc najan elajic Jesús. 2 Apquilpamejitsacpec alhta:
—Mongajic sat nipyesicsa caya, yoyam incolnatjacsic enlhitaoc —alhta apquiltomjac.
Mayatsisquiscama apyimpejic Jesús asoc masis
(Mt 26.6-13Jn 12.1-8)3 Lhama alhta apna Jesús tingma Betania. Tingma pac Simón actomja lepra ningmasquem ningilyitapaycam. Naysicsa aptoycaoc aclhingacmo alhta quilvana. Insacmec alhta memonganyi asoc masis, ayingmenic acmamnave anco. Nardo ayingmenic alhta. Yejemoc alhta ayintasa memonganyi atong. Inyanquincaac alhta apyitsicsic. 4 Inquilnatjac alhta apquilvalhoc apnaymacoc. Apquilpametam alhta:
—¿Soctomja actovasa nac asoc masis ayingmenic? —alhta apquiltomjac. 5 Ingvanqui inyicje ongyinyoc acyanmongam trescientos solyayem, yoyam ongilmesic enlhit mepqui apquilnatam.
Intanovalhquic maa.
6 Aptomjac alhta apquilanya Jesús:
—Cotnejec ac lha. ¿Soctomja apquilinlhanacmo nac quilvana? Jetnescasquic lhac actamila asoc. 7 Apquilpalhcaycam mataa quellhip enlhit mepqui apquilnatam. Apvancaac quellhip elpasmoc mataa. Am opalhcac coo mataa quellhip —alhta aptomjac. 8 Inquilana inyicje asoc avanco colana. Jemoncajangvactamo as quilvana. Jeyatsiscasquic eyimpejic yicpintama ongvatongnalhca. 9 Actomjac coo siyanya quellhip: Naso, inquiltimnasalhquic sat ancoc tasic amyaa lhalhma anco, colhenalhcac sat najan actomjaclha lhac as quilvana, acno actemaclha colvoncayam —alhta aptomjac.
Judas apcanem emacpoc Jesús
(Mt 26.14-16Lc 22.3-6)10 Lhama nipyesicsa doce apquiltamsoycaoc Judas Iscariote apmiyaclho alhta apnaclha apquilimja apmamyi sacerdotes. Apquiltamjoc alhta, yoyam emacpoc Jesús. 11 Apquilitsovasoc alhta apquillinga appayvam. Apquillhenquic alhta elmesic solyayem. Appecjasquic alhta eyantamiclha, yoyam emacpoc Jesús.
Nintom actamalma
(Mt 26.17-29Lc 22.7-23Jn 13.21-301~Co 11.23-26)12 Invocmec alhta acnim aptoycamcolha quilpasmongam mepqui apquimpascaoc. Apquiltemaclha alhta apquilajem nipquesic apquitcoc pascua apto. Apquilpamejitsa alhta apquiltamsoycaoc:
—¿Jalhcojo ongilaningvoclhesic pascua apto? —alhta apquiltomjac.
13 Yejemoc alhta apquilapajasa apcanit apquiltamsoycaoc. Aptomjac alhta apquilanya:
—Elmiyaclha sat natingma. Eltajanyac sat lhama enlhit apsoyam yatingvalhva. Elyiplaclha sat maa. 14 Aptalhningvoclhec sat ancoc tingma as enlhit, elyiplov sat. Elpamejitquis sat aptomja tingma pac: “Aptomjac lhac Visqui ingac: ¿Jalhco acpayjo tingma aptoycamcolha pascua apto, apquillhalhmaa sat apquiltamsoycaoc?” —eltime sat elanic. 15 Elhicmocsic sat tingma netin acyiviy apvalhoc quilhva quilalhnascama. Innamquic najan aclhamoclhojo asoc. Elpenacsojo sat elaniclha maa —alhta aptomjac Jesús.
16 Apquillhinquic alhta apquiltamsoycaoc. Apquilvoclhec alhta natingma. Apquilvitangvoclhec alhta eyca asoc actomja aplhanma Jesús. Apquilaneclhec alhta pascua apto.
17 Intalhnacmoc alhta apmiyantamo natingma Jesús. Apquillhalhmaa alhta doce apquiltamsoycaoc. 18 Lhama alhta apnamcaa nicja mesa, aptoycaoc alhta eyca. Yejemoc alhta apquilpamejitsa Jesús:
—Actomjac coo siyanya quellhip: Naso, lhama nipyesicsa quellhip sictoycamco lhama nintom ingyanic sat, yoyam omalhca.
19 Yejemoc alhta alipvocmo apquiltamsoycaoc, apquilpamejitsa moclhama:
—¿Jave ya coo? —alhta apquiltomjac.
20 Apcatingmavoc alhta Jesús:
—Lhama nipyesicsa doce aptomja sicticlhaycamco lhama quilpasmongam asoc payjem —alhta aptomjac. 21 Ovanquepeclhac sat sicvisay Sictiyam Sictomja Enlhit acno siclhenomalhca vaycajac actalhesomalhca. Enlhit layi aptomja apcanem, yoyam omalhca. Intasic alhta inyicje metyamoc as enlhit —alhta aptomjac.
22 Naysicsa aptoycaoc pascua apto apma alhta quilpasmongam. Apquilmalhnesquisa alhta. Apyaptec alhta. Apquilmesquic alhta apquiltamsoycaoc. Aptomjac alhta apquilanya:
—Elma, eltovaoc quellhip. Eycaso actomja sicyovoclhojo —alhta aptomjac.
23 Apmec alhta najan ingjaycoc moyayit uva yingmenic. Aclhena alhta apvalhoc. Apquilmesquic alhta apquiltamsoycaoc. Apquilyinamquic alhta apquilanomacpo. 24 Aptomjac alhta apquilanya:
—Eycaso actomja ema ajac actomja asoc monquinatquiscama apmayjayoclha Dios aplhanma alhnancoc. , Acyinquinomalhca acyanmongam aclhamoclhojo enlhit. 25 Actomjac coo siyanya quellhip: Naso, moynejec sat mocjam moyayit uva yingmenic acvocmo acnim, yoyam oynic sat mocjam Dios apquilnancascama —alhta aptomjac.
Aplhanma Jesús etnejic apyinimquiscama Pedro
(Mt 26.30-35Lc 22.31-34Jn 13.36-38)26 Natamin apquilminaycmascama apquilantepa alhta. Apquilmiyaclhec alhta inquilhe acvisay Olivos. 27 Yejemoc alhta aptomja apquilanya apquiltamsoycaoc:
—Elnatjojoc sat aplhamoclhojo quellhip as alhtaa, coo ayinyemaclha. Acno aclhanma vaycajac actalhesomalhca, actomja ilhnic nat: “Ongvajic sat quilancam nipquesic, ingyilhpanic sat apnatoscama.” 28 Natamin sat siclhaticjangviyam omyaclhac sat emamyi yoclhilhma Galilea —alhta aptomjac.
29 Yejemoc alhta apcatingmavo Pedro:
—Apquilnatjavoc sat ancoc apquilanomacpo, monatjoyc sat coo —alhta aptomjac.
30 Aptomjac alhta apcanya Jesús:
—Naso, copayoc sat tataa alhtaa nac jay. Yicpintama anit alpayvam, natqui sat etnejic lhip: Moyasamcoc coo as enlhit —alhta aptomjac.
31 Yejemoc alhta apyimnatesa appayvam Pedro:
—Ongvitsapojoc sat ancoc lhama lhip, moyinimsejec sat lhip —alhta aptomjac.
Apnasoc alhta moc apquilpamesma apquiltamsoycaoc.
Apquilmalhnancama Jesús amyip Getsemaní
(Mt 26.36-46Lc 22.39-46)32 Lhama alhta apquilvoclho amyip Getsemaní. Aptomjac alhta apquilanya apquiltamsoycaoc:
—Elhnam siclhoc asi, pac olmalhnac siclhoc maa —alhta aptomjac.
33 Apnalaclhec alhta Pedro, najan Jacobo najan Juan. Yejemoc alhta acpilhyinama apvalhoc, apyovsec anco. 34 Aptomjac alhta Jesús:
—Ayovsec evalhoc coo malha yoyam ongvitsapoc. Elhnam siclhoc asi, eliljalhnam sat quellhip —alhta aptomjac.
35 Yejemoc alhta aplhinga tap quitsic, apquilpolingvocmo alhta nalhpop. Apquilmalhnaquic alhta Dios Ingyapam, yoyam ingyeycajacsic asoc yoyam covac sat. 36 Aptomjac alhta apquilmalhna:
—Tata, apvanquic lhip aclhamoclhojo asoc. Jeyeycajas as asoc acmasca yoyam moynic. Jave eyca coo sicmayjayoclha ajanco. Cotnejic sat actomja apmayjayoclha lhip —alhta aptomjac Jesús.
37 Yejemoc alhta aptajavo. Apvitangveclhec alhta apnatena apquiltamsoycaoc. Aptomjac alhta Jesús apcanya Pedro:
—Simón, ¿aptinqui ya lhquip? ¿Am ya copvanac elyimnaticsojoc apataoc acyavatoclhojo? 38 Elalh, elilmalhna mataa quellhip, yoyam melyipconacpeje. Inquiltamjo inyicje ingvalhoc, eyca am coyimnac ingyimpejic —alhta aptomjac.
39 Aplhingaclhec alhta mocjam. Apquilmalhnaclhec alhta mocjam. Apnasoc alhta apquilmalhnancama. 40 Lhama alhta aptajavo mocjam. Apvitangvoctac alhta mocjam apnatena. Tiyin alhta inquilnapac. Am alhta elyasamcoc, yoyam elatingmojo. Natqui aptajemo alhta intomjac. 41 Aptomjac alhta apquilanya apquiltamsoycaoc:
—Elnateyin sat quilhvo. Ellovquis sat apquilyampay. Vamlha. Invocmec quilhvo, yoyam omalhca sicvisay Sictiyam Sictomja Enlhit, jelmoc sat enlhit melyascalhma. 42 Elnalhaticjaoc quellhip, noc ongillhong. Quip elanojo, apcamquitvaac aptomja apcanem omalhca —alhta aptomjac.
Jesús apmomap
(Mt 26.47-56Lc 22.47-53Jn 18.2-11)43 Naysicsa apquilpamejitquiscama alhta apvaa Judas. Aptomja alhta lhama nipyesicsa doce apquiltamsoycaoc. Aplhamoc alhta apquillhalhmaa. Apquilinyema alhta apquilimja apmamyi sacerdotes najan apquilyascamco apquiltemaclha najan apquilyimtalhnamo aptomja apquilapajascama. Apquilsacmec alhta sovo alvinatem najan memong yayem vajic. 44 Nalhit amay alhta apquiltimnasa Judas apquillhalhmaa asoc monquinatquiscama:
—Acpitsisquic sat ancoc apmalhimpenic enlhit, noelquinatquis nasa, equima aptomja. Elma sat eltamilsojo sat apquilyantamayclha —alhta aptomjac Judas.
45 Lhama alhta apvaa apyacmo Jesús.
—Visqui, Visqui —alhta aptomjac Judas.
Yejemoc alhta appitsisa. 46 Yejemoc alhta appasmacpo. Apmacpec alhta Jesús.
47 Apquinmam lhama enlhit napocja Jesús. Apliquic alhta sovo acvinatem najan apticponga. Apaycoc alhta apquincac apquimja apmamyi sacerdote apquilancam. 48 Aptomjac alhta apquilanya Jesús:
—¿Apquilsacme ya quellhip sovo alvinatem najan memong yayem vajic? ¿Apquililtamjo ya jelmoc malha enlhit apminyilhma? 49 Aclhamoclhojo acnim alhta mataa sicma tingma apponquinomap sillhicmoscama amyaa. Am alhta eyca jelmac. Invocmec nelha aclhanmaclha vaycajac selhanma coo —alhta aptomjac.
50 Yejemoc alhta apquinyajamco apquiltamsoycaoc. Aplhapco alhta aptomjaclha Jesús. 51 Apyiplaclhec alhta lhama apyimnanic. Apava apmopoy alhta apcalomap. Apmacpec alhta inyicje apyimnanic. 52 Aplicsacpec alhta apcalomap. Apquinyec alhta eyca mepqui apava.
Jesús napatavo apquilviscaa
(Mt 26.57-68Lc 22.54-55Lc 63-71Jn 18.12-14Jn 19-24)53 Apquilyantamaclhec alhta Jesús apnaclha apvisqui sacerdote. Apcaneyclhec alhta maa apquilimja apmamyi sacerdote, najan apquilyimtalhnamo najan apquilyascamco apquiltemaclha. 54 Apquimjamquic alhta Pedro. Aptalhningvocmec alhta apvisqui sacerdote tingma pac. Apnacmo alhta lhama singilpilhtetemo. Apquilhtangvocmec alhta talha.
55 Apcaneyclhec alhta apquilimja apmamyi sacerdotes najan apquilviscaa apquilpamejitsomap. Apquililmalhnaclho alhta amyaa. Apquililtamjoc alhta elpeyvasiclhac amyaa, yoyam elajic Jesús. Am alhta incopeyveclhac amyaa. 56 Aplhamoc alhta inyicje enlhit apquilantipquiscama apvisay. Apquilmopvan amyaa alhta eyca. Inyeycajalhquic alhta moc apquillhanma. 57 Apcaneyclhec alhta netin enlhit. Apquillhenquic alhta apvisay apmapsom Jesús. Apmopvan amyaa eyca. Apquilpamejitsa alhta:
58 —Ninglingac alhta appayvam: “Pac otvacsic sat as tingma apponquinomap enlhit apquilanay. Natqui acnim openacsic sat silanay poc, cotnaja enlhit apquilanay” —alhta aptomjac singilanya —alhta apquiltomjac.
59 Inyeycajalhquic alhta mocjam moc apquillhanma enlhit.
60 Yejemoc alhta apquinmaclho netin apvisqui sacerdote. Apquiningvoclho nipyesicsa enlhit, apquilmalhna alhta eyca Jesús:
—¿Mengyatingmameje ya lhquip? ¿Aplinga ya apquilantipquiscama lhip apvisay? —alhta aptomjac.
61 Apvanmaquic alhta Jesús. Am alhta ingyatingmavo. Apquilmalhnaclhec alhta mocjam:
—¿Naso ya lhquip Cristo Dios Apquitca, aptomja ningayo? —alhta aptomjac apvisqui sacerdote.
62 Yejemoc alhta apcatingmavo Jesús:
—Coo nac. Elvitangvomoc sat sicvisay Sictiyam Sictomja Enlhit sicna actamilaclha Dios Ingyapam apyimnatem. Elvitac sat najan siyilhyacmo sat naysicsa yipjopay.
63 Yejemoc alhta apquilyapitsa aptalhnama apvisqui sacerdote:
—Mongiltamjoc nincoo mocjam apquillhanma enlhit. 64 Apquillingac quellhip actemaclha aptovascam lhac Dios apvisay. ¿Jalhco sat eltimjic quellhip? —alhta aptomjac.
—Quiltimescasquic alhta apmapsom aplhamoclhojo. Am alhta coyeycajalhcac apquilvalhoc. Apquilanayquic alhta ematong.
65 Yejemoc alhta apquililhpajac apyamanong napaat. Apquilalasquic alhta napaat. Apquilyayesquic alhta apmeoc apquilticponga mataa.
—Jingiltimnas, ¿soc apticpongam qui? —alhta apquiltomjac.
Apquilpayasquic alhta apmeoc singilpilhtetemo apquilticponga napaat.
Apyinimquiscama Pedro
(Mt 26.69-75Lc 22.56-62Jn 18.15-18Jn 25-29)66 Apnacmec alhta Pedro coning tingma. Yejemoc alhta acvactamo quilvana, apvisqui sacerdote alancam. 67 Lhama alhta acvita Pedro apquilhta talha. Inquilano alhta eyca acpamejitsa:
—Lhip alhta najan aplhalhma Jesús co Nazaret —alhta intomjac.
68 Apyinimcasquic alhta Pedro:
—Jave coo. Moyasamcoc aclhena nac lha —alhta aptomjac.
Apquiningvocmec alhta Pedro tingma apatong. Yejemoc alhta acpayva tataa. 69 Invitangvoclhec alhta mocjam as quilvana. Alpamejitsa alhta enlhit apcanaycam maa:
—Aplhalhma najan aso —alhta intomjac. 70 Apyinimcasquic alhta mocjam Pedro. Natamin apquilpamejitsa alhta mocjam enlhit apcanaycam nac maa:
—Lhip alhta najan aplhalhma as enlhit. Co Galilea nac lhip —alhta apquiltomjac.
71 Yejemoc alhta apyimnatesa appayvam Pedro, acyimnavocmo appayvam:
—Moyasamcoc coo as enlhit apquillhena nac lha —alhta aptomjac.
72 Inpayvaclhec alhta mocjam tataa. Yejemoc alhta apyasingveclho actomjaclha alhta Jesús appayvam aplhanma: “Yicpintama copayo tataa anit alpayvam, natqui apyinimquiscama sat etnejic lhip, melhanma sicvisay.” —alhta intomjac aplhanma. Lhama alhta apyasingveclho actomjaclha alhta appayvam. Apvinec alhta eyca Pedro.
Énxet'ák apkeláneykekxa apkelpaqmeyesma yaqwayam yának emakpok ma'a Jesús
(Mt 26.1-5Lc 22.1-2Jn 11.45-53)1 Ánet ekhem axta keymomáxchek yaqwayam kalanaxchek kélessawássessamo ekhem Pascua, aptámákpexa axta chá'a pan meyke kempáseyak. Apkelchetamsegkek axta yaqweykenxa etnahagkok yának emakpok Jesús tén han emátog ma'a apkelámha apmonye'e nak apkelmaxnéssesso Dios énxet'ák apagkok, tén han ma'a apkelxekmósso axta apnámakkok ektémakxa segánamakxa, apkelmopwancha'a amya'a axta apkelásenneykekxa'. 2 Hakte nápakha axta chá'a aptemék apkelpaqmeyesma s'e:
—Manlanyek sa' eyke neyseksa ekhem mólwagqayam, yaqwayam enxoho ménnegkesek exma m'a énxet'ák.
Xama kelán'a éxpaqhe sokmátsa Jesús
(Mt 26.6-13Jn 12.1-8)3 Neyseksa apha axta Jesús ma'a Betania, Simón apxagkok, apkeltamhomakpo axta negmasse ektepelchamáxche egyempehek áto'. Weykmek axta xama kelán'a ekseykha xama sokmátsa axagkok élánamáxche axta meteymog alabastro ekláneyo sokmátsa nardo égmenek ekmomnáwa agko', neyseksa apha Jesús ma'a nekha mésa. Páxqatmeyk axta m'a axagkok, kexpaqhássessegkek axta apqátek ma'a Jesús. 4 Apkellamchek axta nahan nápakha m'a énxet apheykha axta m'a. Axta aptemék chá'a apkenagkama pók se'e:
—¿Yaqsa ektáha ektawáseyncha'a nak xa sokmátsa? 5 Tásek xeyk eykhel'a kólyenyekxak ekha ekyánmaga ekhémo nak trescientos ekhem ekyánmaga nentamheykha, yaqwayam enxoho kólpasmok ma'a meyke aqsok nak.
Apxéneykha axta nahan ekmaso xa kelán'a nak.
6 Keñe axta Jesús aptéma s'e:
—Kólho aqsa, ¿yaqsa ektáha élya'asa nak exma' ektáhakxa? Aqsok ektaqmela xa setnéssesakxa nak ko'o. 7 Exmakha sa' eyke chá'a kélnepyeseksa kéxegke m'a énxet'ák meyke aqsok nak, kélwanchek chá'a kólpasmok ma'a kélmako enxoho; kaxnók ko'o, maxek sa' chá'a kélnepyeseksa kéxegke. 8 Kelanak eyewagkexa nak kalának se'e kelán'a nak: penchásawók éxpaqha'a sokmátsa sekyókxa amonye' sélátawanye. 9 Naqsók nahan ko'o sektáha séláneya kéxegke, ekyókxoho yókxexma kéltennágkaxa enxoho chá'a tásek amya'a, kaxénaxchek sa' nahan chá'a aqsok élane xa kelán'a nak, keñe sa' kaxénwakxohok chá'a kélwáxok ektémakxa.
Judas appelakkassesso apkenagko emakpok Jesús
(Mt 26.14-16Lc 22.3-6)10 Apya'eykekxeyk axta apkelámha apmonye'e apkelmaxnéssesso Dios énxet'ák apagkok yaqwayam egkések Jesús ma'a Judas Iscariote, cham'a Judas apteme axta xama m'a doce Jesús apkeltáméséyak. 11 Xama axta apkellegaya xa énxet'ák nak, kelpayheykekxeyk axta apkelwáxok, apkeltennassegkek axta anhan egkések selyaqye m'a Judas, yetlómók axta nahan apketamso yaqweykenxa elyentamakpohok yának emakpok ma'a Jesús.
Nempasmo ektaqmela
(Mt 26.17-29Lc 22.7-23Jn 13.21-301 Co 11.23-26)12 Weykmek axta eyeynókxal'a ekxega émha amonye' ekhem, aptámákpexal'a pan meyke kempáseyak, apmatñamakxa axta chá'a nepkések apketkók ekhem Pascua, axta aptemék apkelmaxneyeykencha'a apkeltáméséyak Jesús se'e:
—¿Háxko apkeltamhókxa exchep ólmahagkok anlánéssók nentéyak mólwagqayam ekhem Pascua?
13 Tén axta apkeláphassama apqánet apkeltáméséyak, axta aptemék apkelanagkama s'e:
—Kólmeyekxa sa' tegma apwányam. Sa' kólwetágwók xama énxet apseykekxa yátegwáxwa yetlo yegmen ma'a; kólyetlakxa sa', 14 keñe sa' ma'a aptaxnegwánxa enxoho, kólteme sa' kólának ektáha enxoho apagkok tegma s'e: ‘Exchek aptáhak Sẽlxekmósso apcháphássesa appeywa s'e: ¿Háxko ekpayhókxa tegma apwáxok yaqwánxa sa' ko'o atwok sekto taxnám ekhem Pascua yetlo séltáméseyak?’ 15 Exekmósek sa' kéxegke m'a tegma netno' ekyawakxa nak apwáxok, ekpenchásamáxche nak kélláneykekxa aqsok tén han yaqwayam katawaxche'. Hẽllánessem sa' aqsok eyeyméxchexa nak ma'a.
16 Apkelánteyepmeyk axta m'a apkeltáméséyak apkelmaheykegko tegma apwányam. Apkelwetágweykmek axta ekyókxoho m'a aptémakxa axta apkelanagkama m'a Jesús, apkelánegweykmek axta nahan aptéyak taxnám ekhem Pascua m'a.
17 Keñe axta ekyáqtéssama apweykmo m'a Jesús yetlo doce apkeltáméséyak. 18 Keñe axta Jesús aptéma apkelanagkama neyseksa apheykha nekha mésa apteykegko aptéyak se'e:
—Naqsók ko'o sektáha séláneya kéxegke kélxama sa' hetlakkassesek ko'o yának amaxche', sektóko nak xamo' sekto.
19 Kelyaqhápeykekxók axta nahan apkelwáxok ma'a, tén axta aptéma chá'a apkelmaxneyeykencha'a xama xama s'e:
—¿Ko'oya sa'?
20 Axta aptemék apchátegmoweykegko Jesús se'e:
—Xama sa' se'e doce nak, apyassásegko nak pan sokpayhe ahagkok xamók ko'o. 21 Katnehek sa' aptáha nak Apketche énxet ma'a ektémakxa nak ekxeyenma eknaqtáxésamaxche weykcha'áhak; ¡asagkók agko' sa' eyke katnehek kéllegassáseykegkoho m'a appelakkassesso nak apkeltémo emakpok! Tásek axta eykhel'a metyemek xa énxet nak.
22 Apmomchek axta pan Jesús neyseksa aptéyak, xama axta apméssama ekxeyenma apwáxok Dios, apyeptegkek axta tén axta apkelmeyáseykegko m'a apkeltáméséyak. Axta aptemék apkelanagkama s'e:
—Kólma, keso sekyókxa ko'o s'e.
23 Tén axta apmeykekxo nahan ma'a egheykok, apméssegkek axta makham ekxeyenma apwáxok Dios, tén axta apméssama m'a apkeltáméséyak, apyókxoho axta nahan apyeneykegkok. 24 Axta aptemék apkelanagkama s'e:
—Cháxa éma ahagkok ko'o xa, ekteme nak ekteméssesso ekmámnaqsoho m'a ekhémo mók nélpaqhetchásamáxkoho nak Dios, éma ekyegkenamaxche nak yaqwayam kapasmok apxámokma apagko' énxet. 25 Naqsók eyke ko'o sektáha séláneya kéxegke, peya meynekxók chá'a ko'o kaxwók vino élánamáxche nak anmen yámet ekyexna, ekwokmoho sa' sekyena vino axnagkok ma'a aptémakxa nak Wesse' apwányam Dios.
Jesús apxeyenma Pedro peya mexének apya'áseykegkoho
(Mt 26.30-35Lc 22.31-34Jn 13.36-38)26 Apkelmeyeykekxeyk axta Egkexe élaqneykegkaxa Olivos natámen apkelmeneykmasso eñama nak salmos. 27 Axta aptemék apkelanagkama Jesús se'e:
—Kélyókxoho sa' hélyenyók aqsa ko'o kéxegke s'e axta'a nak. Hakte temék eknaqtáxésamaxche weykcha'áhak se'e: ‘Waqhek sa' ko'o keláneykha nepkések, keñe sa' yexpaqnek ma'a nepkések.’ 28 Keñe sa' sekxátekhágwokmo enxoho makham ko'o, emonye' sa' awakxak ma'a Galilea, keñe sa' kéxegke kólwakxak axayo'.
29 Keñe axta Pedro aptéma apkenagkama s'e:
—Eyenyók sa' eykhe exchep ma'a apyókxoho nak, ko'o sa' eyke mayenyewe'.
30 Tén axta Jesús aptéma apchátegmoweykegko s'e:
—Naqsók ko'o sektáha seyáneya exchep, keso axta'a nak, amonye' ekpáweykekxa sa' makham tat'a, ántánxo sa' katnehek mehexeyenma exchep sey'áseykegkoho.
31 Apkelenxáneykmók axta eyke aptéma apkenagkama s'e:
—Kamáwhok sa' eykhe amatñohok ko'o xamo' xép, magweyxek sa' eyke axének sekya'áseykegkoho.
Hawók axta nahan aptémakxa m'a apyókxoho nak.
Jesús apteme nempeywa nélmaxnagko Getsemaní
(Mt 26.36-46Lc 22.39-46)32 Tén axta apkelmeyeykekxo m'a yókxexma ekwesey nak Getsemaní. Axta aptemék apkelanagkama apkeltáméséyak Jesús se'e:
—Kólhakha sekxók se'e, atnehek sa' sekxók ko'o nempeywa nélmaxnagko.
33 Apyentamomchek axta nahan Pedro, Santiago tén han Juan, cheynamók axta nahan ekyentaxnamo agko' apwáxok tén han eklegeykegkoho. 34 Axta aptemék apkelanagkama s'e:
—Élapwokmók ahagko' ko'o, máxa entáhak sekyekpelcha enxoho peya watsapok. Kólhakha sa' kéxegke s'e, nágkólnaqtén aqsa.
35 Yetlómók axta nahan apmahéyak Jesús yámmakhawók ma'a teyp, apháxegweykmek axta ekwokmoho aptekxekxama ekpayhakxa nápát xapop, apkelmaxnagkamchek axta Dios apkeltémo emallahanchesek apmako enxoho m'a ekmáheyo nak káhapwa'. 36 Axta aptemék apkelmaxnagko Jesús se'e: “Abbá, ‘Táta’ apwanchek xép elának ekyókxoho aqsok: nágyána aqsa ko'o eynek se'e negyà ekmáske nak, eyke nágyána aqsa kalanaxchek ma'a sekmámenyého nak ko'o kalanaxche', wánxa m'a apmopmenyého nak xép.”
37 Tén axta apmeyeykento makham ma'a apheykegkaxa axta, apwetágweykteyk axta nahan apnaqteyenma. Axta aptemék apkenagkama Pedro s'e:
—Simón, ¿aptencheya? ¿Mopwancheya exchep metyena xama hora eykhe? 38 Nágkólnaqtén, kólteme nempeywa nélmaxnagko, yaqwayam enxoho megkáhapweyk ekyepkónma. Kélmenyeyk eykhe kéxegke kóllának aqsok ektaqmela, kélyelqáxkók eyke.
39 Aptaqhémok axta makham, aphéssamók axta makham apkelmaxnagko m'a aptémakxa axta chá'a appeywa. 40 Xama axta apmeyeykento makham apheykegkaxa, apwetágweykteyk axta makham apnaqteyenma m'a apkeltáméséyak, hakte massegkek axta élyennaqte apaqta'ák apkelyenmeykha. Axta elya'áseykegkok yaqweykenxa etnahagkok yátegmowágkok. 41 Ántánxo axta temék apweykta apheykegkaxa, tén axta aptéma apkelanagkama s'e:
—¿Kélnaqtencheya makham kéxegke kéllókasa kélyampe? Nágkólnaqténekxa kaxwo', wokmek kaxwo' yaqwánxa kólmések aptáha nak Apketche énxet ma'a énxet'ák melya'assáxma nak. 42 Kólchempekxa néten, nók; ketók apwa'akxa m'a ektáha axta setlakkassesso ko'o apkeltémo amaxche'.
Jesús apmomap
(Mt 26.47-56Lc 22.47-53Jn 18.2-11)43 Axta epenchessamók makham appaqmeyesma Jesús, cham'a apweykmo axta Judas, apteme axta xama apkeñama nepyeseksa m'a doce Jesús apkeltáméséyak yetlo apkelxegexma énxet apxámokma sókwenaqte apkelmeykha tén han yámet. Axta apkeláphasso m'a apkelámha apmonye'e nak apkelmaxnéssesso Dios énxet'ák apagkok, tén han ma'a apkelxekmósso nak apnámakkok ektémakxa segánamakxa, tén han ma'a apkelámha apmonye'e nak. 44 Nanók axta nahan apkeltennasso énxet'ák yaqweykenxa etnehek ma'a Judas. Axta aptemék apkelanagkama s'e: “Énxet sekpetsesakxa enxoho ko'o, cha'a Jesús ma'a, kólma sa', kóltaqmelchesho sa' kélpextete kólyentemekxa'.” 45 Apya'áyekmek axta apkenmeykegkaxa m'a Jesús, axta aptemék apkenagkama s'e:
—¡Sẽlxekmósso!
Tén axta appetsesma. 46 Yetlómók axta han kélpathetma m'a Jesús, apmomakpek axta.
47 Keñe axta xama apkenmeykha axta han ma'a aplekweykekxo sókwenaqte apagkok, apyaqténchessegkek axta xama apeykok ma'a énxet apkeláneykha axta m'a apkemha apmonye' nak apkelmaxnéssesso Dios énxet'ák apagkok. 48 Axta aptemék Jesús apkelmaxneyeykencha'a énxet'ák se'e:
—¿Yaqsa ektáha kélsókmoho nak sókwenaqte tén han yámet sélya'awa ko'o yaqwayam hélmok? Máxa énxet ekmaso aptémakxa éltemessásak. 49 Yókxoho ekhem axta ko'o sekha kélnepyeseksa kéxegke sélxekmóssama chá'a m'a tegma appagkanamap nak, axta eyke hélmàk kéxegke xama enxoho. Temék eyke xa, yaqwayam enxoho katnehek ma'a ektémakxa nak eknaqtáxésamaxche weykcha'áhak.
50 Apyamasmeyk axta aqsa nahan apxakko' apyókxoho apkeltáméséyak ma'a Jesús, apkenyaheykegkek axta. 51 Xama wokma'ák axta eyke aqsa apyetlók, apáwa axta aqsa han apchaqlamap ma'a. Apmomchek axta eykhe nahan xa wokma'ák nak, 52 apyenyeykekxeyk axta eyke aqsa nahan apáwa apchaqlamap axta m'a, tén axta apkenyahama apxeganeykmo meyke apáwa.
Jesús kélyentama apheykegkaxa nak énxet'ák ekyawe kéláyo
(Mt 26.57-68Lc 22.54-55Lc 63-71Jn 18.12-14Jn 19-24)53 Kélyentamomchek axta Jesús aphakxa axta m'a apkemha apmonye' nak apkelmaxnéssesso Dios énxet'ák apagkok, apchaqneykekxeyk axta han apyókxoho m'a apkelámha apmonye'e nak apkelmaxnéssesso Dios énxet'ák apagkok, tén han ma'a apkelámha apmonye'e, tén han ma'a apkelxekmósso nak apnámakkok ektémakxa segánamakxa. 54 Makhawók axta nahan aptamheykegkok Pedro apyetlama ekweykmoho m'a kañe' ekyawakxa nak apwáxok apxagkok ma'a apkemha apmonye' nak apkelmaxnéssesso Dios énxet'ák apagkok, apheykmek axta xamók ma'a sẽlpextétamo aptaqmelchesso axta tegma apkelaxteykegko táxa.
55 Aptegyeykegkek axta yaqweykenxa etnahagkok yának emátog Jesús ma'a apkelámha apmonye'e nak apkelmaxnéssesso Dios énxet'ák apagkok, tén han ma'a énxet'ák ekyawe axta kéláyo; axta eyke elweteyk. 56 Apxámok axta eykhe apkelxeyenma aqsa chá'a megkamámnaqsoho m'a, yaqmagamaxcheyk axta eyke aqsok apkelxeyenma. 57 Nápakha axta nahan chá'a apkelchampeykekxak néten aptamheykegko apkelmopwancha'a amya'a apkelxeyenma aqsa chá'a m'a Jesús, axta aptemék chá'a s'e:
58 —Nenlegayak chá'a negko'o aptéma appeywa s'e: ‘Ategkesek sa' ko'o s'e tegma appagkanamap énxet apkelane nak, ántánxo ekhem sa' eyke axátekhásekxak makham pók megkatnaha nak énxet apkelane.’
59 Axta eyke kaxnémók makham mók apkelpaqmeyesma m'a ektémakxa axta aqsok apkelxeyenma.
60 Tén axta apkempeykekxo néten nepyeseksa apyókxoho énxet ma'a apkemha apmonye' nak apkelmaxnéssesso Dios énxet'ák apagkok, axta aptemék apkelmaxneyeykencha'a Jesús se'e:
—¿Megyátegmowagkeya ektáhakxa nak apxénamap xép? ¿Yaqsa xa ektáhakxa nak apxénamap xép?
61 Apwanmagkamchek axta eyke aqsa m'a Jesús, meyke apchátegmowéyak xama enxoho. Axta aptemék makham apkelmaxneyeykencha'a apkemha apmonye' apkelmaxnéssesso Dios énxet'ák apagkok se'e:
—¿Xépya Mesías, Apketche nak ma'a Dios ektaqmalma nak apxénamap?
62 Axta aptemék apkenagkama Jesús se'e:
—Ko'o neykhe. Kólwetak sa' kéxegke aptáha nak Apketche énxet exek ekpayhókxa nak apkelya'assamakxa m'a Ekha nak Apyennaqte, apkexyekmo sa' makham neyseksa yaphope m'a néten.
63 Tén axta apkelyeptama aptaxno m'a apkemha apmonye' apkelmaxnéssesso Dios énxet'ák apagkok magkenatchesso megkaleklama apwáxok ma'a aptémakxa axta appeywa m'a Jesús. Axta aptemék appaqmeyesma s'e:
—Megkeyméxchek kaxwók antegyekxohok énxet apxeyenma aptémakxa. 64 Kélleg'ak kéxegke ektáhakxa nak appeywa énmexeyncha'a m'a Dios. ¿Háxko ektáhakxa élchetamso kélwáxok kéxegke?
Apyókxoho axta nahan hémók mók apkelpaqmeyesma apkelxeyenma aptáha apsexnánémap tén han ekpayhémo emátog.
65 Yetlómók axta han chá'a apkexpaqhe apyamánog nápakha énxet'ák, tén han apnaqtehetchesso chá'a apaqta'ák, tén han aptekpageykha, axta aptemék chá'a apkenagkama s'e:
—¡Ey'asagkoho hana yaqsa ektekpaga!
Tén axta m'a apkeltaqmelchesso axta tegma aptekpagkassama chá'a nápát.
Pedro mexeyenma apya'áseyak Jesús
(Mt 26.69-75Lc 22.56-62Jn 18.15-18Jn 25-29)66 Aphegkek axta Pedro m'a kóneg apwáxok nak tegma. Wayak axta nahan aphakxa xama m'a apkemha apmonye' apkelmaxnéssesso Dios énxet'ák apagkok apkeláneykha. 67 Xama axta ekweteya Pedro aphama nekha táxa apkextama, kenegweykmek axta élányo, tén axta ektéma eyenagkama s'e:
—Xeyep axta nahan chá'a apyetleykha m'a Jesús, apkeñama nak Nazaret.
68 Axta eyke aptemék Pedro mexeyenma s'e:
—Mateyk ko'o m'a, may'ásegkok nahan xa ekxéna nak.
Tén axta apteyapma yókxexma, apmeyeykekxo m'a átog nak. Yetlómók axta han ekpáwà xama tat'a. 69 Weteykekxeyk axta makham Pedro m'a kelán'a kélásenneykha, tén axta ektéma élanagkama énxet'ák se'e:
—Keso xamal'a anhan apkelxegexma'a s'e.
70 Axta eyke exeyenmak makham. Axta nahan kanéwomo', aptéma makham apkenagkama Pedro m'a ektáha axta apchaqneykha m'a:
—Naqsók xép apteme xama xa énxet'ák nak, hakte xép nahan apkeñama Galilea.
71 Tén axta Pedro apyennaqtésseykmoho appeywa aptéma apxeyenma ekmámnaqsoho agko' se'e:
—¡Mateyk ko'o xa énxet kélxéna nak!
72 Yetlómók axta nahan ekteme ánet ekpáwà tat'a, tén axta Pedro ekxénweykekxoho apwáxok ma'a aptémakxa axta apkenagkama Jesús, aptéma axta s'e: ‘Amonye' ekpáweykekxa sa' makham tat'a, ántánxo sa' katnehek mehexeyenma exchep sey'áseykegkoho.’ Tén axta apwónama.
