Apvisqui Manasés nipyesicsa co Judá
(2~Cr 33.1-20)1 Vocmec nic nat doce años aptiyascam Manasés aptimesacpo apvisqui tingma Jerusalén. Aptimec nic nat apvisqui acvaycmo cincuenta y cinco años. Inquin nic nat acvisay Hepsiba. 2 Somcoc nic nat aptemaclha apanco napato Dios Visqui ingac. Apyiplovcasquic nic nat apquiltemaclha apancaoc actomja apquilaoclha, apyinyovquiscama ilhnic nat Dios Visqui ingac napatavo israelitas. 3 Apyap Ezequías nic nat aptovascama acyitnamaclha quilaycmasquiscama. Manasés nic nat apquillanayclha mocjam acyitnamaclha quilaycmasquiscama, najan altares acvatnamaclha asoc macmescama quilaycmasquiscama Baal, najan apquillanay quilaycmasquiscama Asera, acno ilhnic nat apquillanay Acab apvisqui co Israel. Apquiltimec nic nat apquilayo apyovoclhojo apyová, malha apquilviscaa apancaoc. 4 Appiquinquic nic nat altares apquilvatnamaclha quilaycmasquiscama congne tingma apponquinomap, apmaclha Dios Dios tingma Jerusalén. 5 Apquillanac nic nat mocjam altares apquilvatnamaclha nipyava tingma apponquinomap, yoyam colhic ayaco apyová.
6 Apcajac nic nat moclhama apquitquic, eltimjic macmescama quilaycmasquiscama. Aptingyac nic nat mataa quilaney poc, najan apquilyascamco actemaclha yavey. Aplovquic nic nat Dios Visqui ingac, apvita aptemaclha apanco. 7 Appiquinquic nic nat congne tingma apponquinomap quilaycmasquiscama Asera. Eycaso ilhnic nat apmasma Dios Visqui ingac, aptomja ilhnic nat apcanya David najan apcanya Salomón: Olhic sat mataa coo as tingma apponquinomap, silyacyescama coo nipyesicsa apquilmolhama tribus co Israel, tingma Jerusalén. 8 Moyinyovsejec sat mataa as yoclhilhma apquileyvomaclha israelitas, sicmescama alhta siclho apquilyeyjamcaa, apquilyiplovquisa inlhojo siyanamaclha najan siyascamaclha, najan acyovoclhojo apquillhicmoscama selancam Moisés— nic nat aptomjac Dios.
9 Am nic nat eyiplovcasac apvisqui Manasés. Aptomjac nic nat apquilsilhnanoncama enlhitaoc Israel. Inyangvocmec nic nat apquiltemaclha apancaoc, am nic nat colhno apquiltemaclha apancaoc actomja apquilaoclha, apquilantipquiscama ilhnic nat Dios Visqui ingac napatavo israelitas. 10 Yitnec nic nat Dios Visqui ingac appayvam, apquillingascama profetas: Quip elaylhojo sicpayvam. 11 Avanjec alhta apsilhnanoncama enlhitaoc apvisqui Manasés. Somcoc anco aptemaclha apanco, am alhta colhno apquiltemaclha amorreos apquilictingam apmamyi. Aptimescasquic alhta elsilhnanacpoc apanco enlhitaoc payjoc acyitnamaclha quilaycmasquiscama. 12 Eycaso sicpayvam Dios Visqui apancaoc Israel. Ellingamcojoc sat acyimtalhnama apyovoclhojo Jerusalén najan apyovoclhojo Judá. Cascoc sat apjaycaoc, apquillinga inlhojo amyaa. 13 Oyanmongsiclhac sat apquiltemaclha apancaoc co Jerusalén, colhojoc sat sicyanmongsayclha apquiltemaclha apancaoc co Samaria najan aptovana apvisqui Acab alhta. Omascoscomoc sat apquileyvam natingma, elhojoc sat tingma asoc payjem ayalhnayo acpaycomalhca. 14 Poc enlhit ajancaoc apquilaymomap, olyinyovsic sat apquilmaclha, elmacpoc sat nipyesicsa cotnaja ingmoc, elhojoc sat apquilyamonquilhma nipyesicsa maa. 15 Somcoc anco apquiltemaclha apancaoc najato, seltovascama coo yoyam olvoc, ayenmo alhta sicyinyovquiscama yoclhilhma Egipto, acvaycmo as ningvamlha nac jay — alhta intomjac appayvam — nic nat aptomjac profeta.
16 Avanjec nic nat apsilhnanoncama apvisqui Manasés nipyesicsa co Judá. Avanjec nic nat aptanoncama Dios aptemaclha apanco. Apcapajasquic nic nat eticyoc apnaymacoc mepqui apquilmapsomcaa natingma Jerusalén. Invitalhquic nic nat ayinyem ema apancaoc apticyovam. 17 Yitnec nic nat mocjam amyaa actalhesomalhca aptemaclha apanco Manasés, najan aptemaclha apsilhnanomap apanco napato Dios, acvisay vaycajac crónicas apquilviscaa co Judá. 18 Apquitsepquic nic nat Manasés, apcatoynacpec nic nat ayimjaclha ilhnamoc apvisqui tingma pac, acvisay amyip apanco Uza. Aptimesacpec nic nat apquitca Amón, etnejic apvisqui apya'monquiscama apyap ninga.
Apvisqui Amón nipyesicsa co Judá
(2~Cr 33.21-25)19 Vocmec nic nat veintidós años aptiyascam Amón aptimesacpo apvisqui. Aptimec nic nat apvisqui tingma Jerusalén acvaycmo dos años. Inquin nic nat acvisay Mesulemet, inyap nic nat apvisay Hazur apna tingma Jotba. 20 Somcoc nic nat aptemaclha apanco napato Dios Visqui ingac, acno ilhnic nat aptemaclha apanco apyap Manasés. 21 Aptomjac nic nat apcayo quilaycmasquiscama, acno ilhnic nat aptemaclha apcayo quilaycmasquiscama apyap. 22 Apquilvatasquic nic nat apcayo Dios Visqui apancaoc apquilyeyjamcaa, mengyajalhenmo apmajayoclha Dios.
23 Apquilinmelham nic nat singilpilhtetemo apquilviscaa, apquilaja congne apvisqui tingma pac. Apmatnec nic nat Amón. 24 Apquilpasmeclhec nic nat enlhitaoc, elnapoc apquilviscaa singilpilhtetemo. Apquiltimescasquic nic nat apquitca Josías, etnejic apvisqui apya'monquiscama apyap ninga.
25 Yitnec nic nat mocjam amyaa actalhesomalhca aptemaclha Amón, acvisay vaycajac crónicas apquilviscaa co Judá. 26 Apcatoynacpec nic nat amyip apanco Uza. Aptimesacpec nic nat apvisqui apquitca Josías, apya'monquiscama apyap ninga.
Manasés apteme wesse' apwányam ma'a Judá
(2 Cr 33.1-20)1 Doce apyeyam apagkok axta apkeynamo apteme wesse' apwányam Manasés, cincuenta y cinco apyeyam axta apteme wesse' apwányam ma'a Jerusalén. Hepsiba axta ekwesey egken. 2 Axta eyke kaleklók apwáxok Wesse' egegkok ektémakxa aqsok apkelane m'a, hakte apkeláneyak axta han ekmaso aptémakxa ekhawo aptamheykegkaxa axta m'a énxet'ák, ektáha axta Wesse' egegkok apkelántekkesso nepyeseksa m'a israelitas: 3 apnaqxátekháseykegkokxeyk axta makham ma'a kélpeykessamókxa axta mók aqsok kéláyókxa', apmassésseyam axta m'a Ezequías, apyáp axta; apkelánegkek axta han kélwatnéssamakxa chá'a aqsok ma'a Baal, apkelanak axta han kéleykmássesso Aserá, ektémakxa axta apkeláneya m'a Ahab, wesse' apwányam axta Israel; apkelpeykessamók axta m'a ekyókxoho aqsok élápogwátéyak nak néten, apkeláyók axta han chá'a, 4 apkelánegkek axta han élwatnamáxchexa aqsok ma'a Wesse' egegkok tegma appagkanamap apagkok, apxeyenmakxa axta Wesse' egegkok katnehek ekyetnamakxa apwesey m'a Jerusalén. 5 Apkelánekxeyk axta makham mók élwatnamáxchexa aqsok ma'a ánet apwáxok nak kélhaxtegkesso m'a Wesse' egegkok tegma appagkanamap apagkok, apteméssessek axta han kélwatnéssamakxa chá'a aqsok ma'a ekyókxoho élápogwátéyak nak néten.
6 Apkelnapmeyk axta han apketchek apkelwatnama, apkelwóneykha kélhagák axta aptemék, tén han apya'áseykegkoho aqsok ekpowásamaxche', aptekkessegkek axta negásenneykekxa kélhagák, keñe han nenteme nak yohóxma. Asagkók agko' axta aqsok apkelane nápaqtók Wesse' egegkok, axta keñamak aplókassama Wesse' egegkok. 7 Appekkenchek axta han Wesse' egegkok tegma appagkanamap apagkok ma'a xama kéleykmássesso Aserá, apxeyenmakxa axta Wesse' egegkok apkeltennassama David, tén han apketche Salomón, aptéma apkenagkama s'e: “Cháxa tegma appagkanamap apyetna nak Jerusalén, sélyéseykencha'a nak nepyeseksa apyókxoho pók aptémakxa énxet'ák Israel, katnehek sa' ekyetnamakxa sekwesey meyke néxa'. 8 Malántekkesek sa' kaxwók israelitas ma'a xapop sekmésso axta ko'o m'a apyapmeyk nano', apkelyahákxoho enxoho tén han apkelánegko enxoho ekyókxoho m'a séltémókxa nak etnahagkok, keñe han ma'a nélxekmowásamáxche sekméssama axta ko'o m'a séláneykha Moisés.”
9 Axta eyke elyaheykekxohok ma'a énxet'ák nak. Apyánchessesseykmók axta aqsa apkeltémakxa ekmaso m'a Manasés, axta kaxnawok ma'a apkeltémakxa axta énxet'ák apmassésseykmo axta Wesse' egegkok apmonye'e m'a israelitas. 10 Axta keñamak appaqmeyesma Wesse' egegkok apkelásenneykxo m'a apkeláneykha apkellegasso nak appeywa. Axta aptáhak se'e: 11 “Asagkók agko' aptémakxa m'a Manasés, awanhók agko' aptémakxa ekmaso, kaxnawok ma'a amorreos, apheykencha'a axta metyapmakxa axta makham, apkelánéseykegkek melya'assáxma énxet'ák Judá, apkelpeykessamo m'a kéleykmássesso apagkok, 12 cháxa keñamak sektáha nak ko'o sekpeywa sektáha nak Wesse', Israel Dios apagkok: Wahak sa' ko'o aqsok ekmaso agko' ma'a Jerusalén tén han Judá, kaláskok sa' chá'a apeyk'ák ektáha enxoho apkellege. 13 Allegássesagkohok sa' ma'a énxet'ák nak Jerusalén ekhawo sekteméssesakxa axta m'a Samaria, keñe han ma'a Ahab axta aptawán'ák neptámen; wáxñásekxohok sa', ektémól'a kólmópeyásekxak awáxok sokpayhe keñe kólpólchesagkok. 14 Keñe sa' ma'a énxet'ák ahagkok apkeleymomap nak, akxák sa', almések sa' ma'a apkelenmexma nak, yaqwayam sa' elyementók aqsok apagkok, tén han esawhaksoho'. 15 Hakte asagkók aqsok apkeláneyak nahaqtók ko'o m'a, axta cheynamók selókasso sekxók axta apkelánteyapma apyapmeyk nano' ma'a Egipto, ekwokmoho makham se'e kaxwo' nak.”
16 Háwe axta ekwánxa agkok apkelánéseykegko melya'assáxma Manasés ma'a énxet'ák Judá, tén han aqsok ekmaso apkelánéyak nápaqtók Wesse' egegkok. Apkelnapmeyk axta han apxámokma apagko' énxet meyke apkeltémakxa m'a Jerusalén, sawheykekxók axta éma apagkok ma'a kañe' nak. 17 Ektémakxa axta apweynchámeykha Manasés, tén han ekyókxoho aqsok apkelane, keñe han apkelane mey'assáxma, hágkek eknaqtáxésamaxche m'a weykcha'áhak apagkok axta m'a apkelwesse'e apkelwányam nak Judá. 18 Xama axta apketsapma, kélátawanyegwákxeyk axta m'a kélcheneykekxexa axta pánaqte exnók ma'a nápakha apxagkok apyawe, émhakxa axta pánaqte exnók apagkok ma'a Uzá. Keñe axta apyaqmagkasa apteme wesse' apwányam ma'a apketche Amón.
Amón apteme wesse' apwányam ma'a Judá
(2 Cr 33.21-25)19 Veintidós apyeyam apagkok axta apkeynamo apteme wesse' apwányam Amón, apqánet apyeyam axta apteme wesse' apwányam ma'a Jerusalén. Mesumélet axta ekwesey egken, Harús axta apketche, apkeñama nak Jotbá. 20 Asagkek axta eyke ektémakxa aqsok apkelane nápaqtók Wesse' egegkok, ekhawo aptémakxa axta m'a Manasés, apyáp axta, 21 hakte apyetlókassegkek axta m'a ektémakxa axta ekmaso aptémakxa, apkelpeykessamók axta kéleykmássesso apkelpeykessamo axta chá'a m'a apyáp, apcháyo axta han aptemék. 22 Apyamasmeyk axta m'a Wesse' egegkok, Dios apagkok axta m'a apyapmeyk nano', axta elanék chá'a m'a apmopmenyého axta chá'a elána'.
23 Apkeláneykekxeyk axta yaqweykenxa etnéssesek sẽlpextétamo apkelámha apmonye'e apagkok ma'a Amón, apchaqhegkek axta m'a kañe' apxagkok apyawe nak. 24 Keñe axta énxet'ák apkelnapa m'a apkeláneykekxa axta yaqweykenxa etnéssesek ma'a wesse' apwányam Amón, tén axta apteméssesa wesse' apwányam ma'a apketche Josías.
25 Ektémakxa axta apweynchámeykha Amón, tén han aqsok apkelane, hágkek eknaqtáxésamaxche m'a weykcha'áhak apagkok axta m'a apkelwesse'e apkelwányam nak Judá. 26 Kélátawanyegkek axta m'a takhaxpop apagkok axta, ekyetna nak ma'a apkeneykekxexa nak pánaqte exnók ma'a Uzá. Keñe axta apyaqmagkasa apteme wesse' apwányam ma'a apketche Josías.
