Apminaycmascama apvisqui David
1 Eycaso apminaycmascama ilhnic nat David apcayo Dios Apyimtalhnamo, ayinyema ilhnic nat apvomsomap tap nipyesicsa cotnaja ingmoc. 2 Aptomjac nic nat David:
Lhip Dios Visqui ingac aptomja seyimnatescama. Lhip aptomja semasma coo. Aptomja sicyilhanmeycam sevomquiscama tap.
3 Aptomja Dios Visqui ajac. Aptomja malha semasma ayinyema moyasquiyam. Aptomja malha siyajapsomalhca naysicsa ningilnapomalhca. Aptomja sevomquiscama tap najan aptomja sicyilhanmeycam.
4 Innec ayaco lhip Visqui ingac. Apjalhnoc mataa lhip siyevoycam. Aptomja semasma napatavo cotnaja ingmoc.
5 Innec alhta seyasipquisa yoyam omatong. Avanjec ayay evalhoc yoyam otvasalhca.
6 Innec alhta seyasipquisa ayinyema alyascamaclha ingjangaoc. Innec alhta seyasipquisa yoyam omatong.
7 Ayevam alhta Visqui ingac naysicsa ayay evalhoc. Ayevam alhta Dios. Apjalhnoc alhta siyevoycam apna tingma apponquinomap. Appaycaoc innac, aplingac alhta siyevoycam.
8 Inyovjam alhta nalhpop (lhop). Inquilyovjam alhta mataymong alvinatem. Inquilpilhyinimquic alhta ayinyema aplom Visqui ingac.
9 Intipquic alhta etin apvajic. Intipquic alhta talha apatong najan atilh.
10 Aptipquic alhta netin apvayventa. Yipjopay alhta coning apmancoc.
11 Ángel querubín acma aplhimpancoc alhta apquinamtem. Malha alhcajayam ayimposcay intomjac aplhingam.
12 Yipjopay alhta apyilhanmomaclha najan acmamay.
13 Inyitipquic alhta netin ayinyema ayitsayolhma apanco. Inpalacmec alhta yingmin alyayem najan atilh (talha alayvom).
14 Inquilhtingyavocmec alhta netin. Inlingalhquic alhta appayvam Dios Visqui ingac. Inpalacmec alhta yingmin alyayem najan atilh (talha alayvom).
15 Apyinjac alhta yanca apancaoc. Apquilhpancasquic alhta cotnaja ingmoc. Incajac alhta tacja. Inyiplovcoc apquillhinganyam cotnaja ingmoc.
16 Invitalhquic alhta congno ayaptovnilha yingmin acvanyam. Invitalhquic alhta avjac as nalhpop, acpiquenomalhca ayalhnaclhojo. Ayinyema alhta appayvam acyimnatem Visqui ingac. Ayinyema alhta apvatipnapma malha yatepiyam.
17 Appayesaclhec alhta apectong Dios Visqui ingac. Evomcasquic alhta tap yingmin acvanyam.
18 Evomcasquic alhta tap selmam cotnaja ingmoc. Evomcasquic alhta tap selmam selinmelhaycam apquilyimnatem.
19 Apquillanac alhta quimpocjacme siclingamco acyimtalhnama. Epasmec alhta Dios Visqui ingac.
20 Evomcasquic alhta acyevey olhma. Ayinyema alhta seyasicjayo Dios Visqui ingac.
21 Ayinyema alhta Visqui ingac siclhoy acyanmongam, apvita sictemaclha sicpeyvomo. Ayinyema alhta Visqui ingac siclhoy acyanmongam, apvita actamila evalhoc.
22 Acyiplovcasquic mataa appayvam Visqui ingac. Am alhta oyinyavac Dios Visqui ajac (am osilhnanalhcac ajanco).
23 Acyiplovcasquic mataa singanamaclha Dios Visqui ingac. Am alhta oyinyavac mataa.
24 Mepqui alhta sicsilhnanomalhca napato Visqui ingac. Am alhta otnajac sicmasom.
25 Sictemaclha sicpeyvomo ayinyema siclhoy acyanmongam apnaclha Visqui ingac.
26 Apcasicjavoc mataa lhip Visqui ingac, apvita inlhojo apcasicjayo enlhit. Appeyvescaseclhec lhip Visqui ingac, apvita inlhojo appeyvomo enlhit.
27 Aptasi nac lhip Dios Visqui ingac, apvita inlhojo enlhit actamilaycam apvalhoc. Apquinmelham lhip Visqui ingac, apvita inlhojo aptemaclha apyinimquiscama.
28 Apmiyovquic mataa lhip, apvita inlhojo enlhit conjamalhco apvalhoc. Apquinmelham mataa lhip, apvita inlhojo enlhit ayajamalhco apvalhoc.
29 Lhip Dios Visqui ingac aptomja apquitsasquiscama olhma. Lhip Dios Visqui ingac aptomja apquitsasquiscama olhma naysicsa yatescamalhma.
30 Ongvimpocjac sat cotnaja ingmoc, aptomja inlhojo siclhalhma lhip. Ongvaplhong sat mataymong apjalhtam tingma, aptomja inlhojo siclhalhma lhip Dios Visqui ingac.
31 Inpeyvoc anco amay (aptemaclha) Dios Visqui ingac. Mepqui apyeycajascaoc mataa aplhanma. Apmasma Visqui ingac apquiltomja melyasquiyam.
32 ¿Apvamlha ya lhama apanco Dios Visqui ingac? - Eje. ¿Apvamlha ya lhama apanco Dios singmasma nincoo? - Eje.
33 Dios Visqui ajac aptomja seyimnatescama. Aptimescasquic sictemaclha sicpeyvomo.
34 Inyitsalhquic emancoc malha popyit apmancoc. Eyantamaclhec coo netin inquilhe acvinatem.
35 Aptomja seltamescama ningilmaycam yoyam olnapalhca. Aptomja seyimnatescama sicmaycam pilhpaalh acyimnatem.
36 Lhip aptomja semasma najan sevomquiscama tap. Lhip semaycaoc emic. Siyasicjayo lhip actimesquiscama sicvascapma.
37 Appeyvaseclhec mataa lhip amay, yoyam oyiplaclha mepqui sictolhnay.
38 Acminlhinquic cotnaja ingmoc. Acsovjoquic alhta silnapma amamyi sictajemo.
39 Alyimsasquic alhta apsovjacpo apquilitsepma. Siltoyam alhta emancoc.
40 Lhip alhta seyimnatescama yoyam olnapalhca. Inmasquec apquilyimnatem cotnaja ingmoc.
41 Apquinyajasquic lhip cotnaja ingmoc. Evanquic alhta otvacsic apquiltomja selinmelhaycam.
42 Apquilpalhamam alhta yoyam elmiyovacpoc. Mepqui alhta apmasma. Apquilpalhamam alhta Visqui ingac yoyam epasmoc. Am alhta ingyajalhnoc.
43 Acminlhinquic alhta apquilvonquepa. Malha lhopactic acvoncapayclha. Actacmec alhta siclhinga. Malha yelpa sictoyam siclhinga amay.
44 Lhip alhta sevomquiscama tap napatavo selinmelhaycam. Setnesquiscama apvisqui nipyesicsa enlhitaoc. Seltimesaycam apquiltomja enlhitaoc cotnaja nintemolhama.
45 Apquiljalhnoc mataa sicpayvam. Apquilyajaclhoc apquitquic cotnaja nintemolhama.
46 Apquilvatsamquic alhta apquilnapomap apquitquic. Apquilyinyovquic alhta apquilyilhanmomaclha.
47 Innec ayaco Visqui ingac apyimnatem. Apyimtalhnamo apanco Dios semasma coo.
48 Epasmec alhta Visqui ingac oyanmongsiclha apquiltemaclha cotnaja ingmoc. Aptimescasquic alhta sicyimnatem, otnejic visqui nipyesicsa enlhitaoc.
49 Aptomja alhta semasma napatavo cotnaja ingmoc apquillom. Aptomja alhta semasma napatavo selinmelhaycam. Lhip Visqui ingac aptomja semasma napatavo seltovascama.
50 Olngacsic sat nipyesicsa enlhitaoc lhalhma anco. Colhic sat ayaco lhip. Olngacsic sat lhip apvisay naysicsa ningminaycmascama.
51 Innec seyaco sicvisay visqui ayinyema lhip setnesquiscama visqui. Lhip aptomja seyasicjayo sicvisay David sicponquinomalhca. Lhip aptomja apcasicjayo etovana cotmongvoycamlha nelha.
David apmeneykmasso eñama apmallanma
(Salmo 18)1 Apmeneykmássessek axta David Wesse' egegkok se'e negmeneykmasso nak, apwagkasa axta teyp Wesse' egegkok megyahayo emok ma'a Saúl, keñe han ma'a apyókxoho apkelenmexma nak. 2 Aptáhak axta s'e:
“Wesse', xép apteme
setaqmelchesso,
sekyexánegweykekxexa',
semallahanchesso,
3 Dios ahagkok,
semasma apyennaqte,
seyáhakkásamáxche',
sewagkasso
teyp apmopwána,
xép apteme
sekyexanmomakxa
netnók agko',
tén han sekheykekxexa
nak chá'a eyxanmok,
xép apteme
sewagkasso teyp.
¡Ewagkassegkek teyp
nepyeseksa m'a énxet'ák
apkelyennaqteyáseykha
nak chá'a apyempe'ék!
4 Wesse' egegkok,
payhawók xép kólpeykesho';
ekwóneyha agkok chá'a,
hewagkasek chá'a teyp
nepyeseksa sélenmexma.
5 “Ewakhayak
axta ko'o m'a
élyaqyahayam
segaqhamo nak;
eyáyak axta ko'o
m'a yegmen ényé
ekmassésseykmohol'a
ekyókxoho aqsok.
6 Ewakhayak axta
ko'o m'a nétsapma;
¡ketók axta ko'o
semomakxa m'a
kelhanma segaqhamo nak!
7 Ekwóneykha axta
ko'o Wesse' egegkok
ma'a ekyentaxnama
axta setnamakxa',
éltémok axta
hepasmok Dios ahagkok,
aplegayók axta ko'o
sélmaxnagko m'a
ekpayho nak tegma
appagkanamap apagkok;
¡aplegayak axta
sekwóneykha!
8 “Yetlómok axta
ekyawheykha xapop
ekyennaqte agko':
kelyawheykha axta m'a
ekméyak nak néten;
Wesse' egegkok aplo
axta kelyawheyáseykha.
9 Apwéhek axta
teyapmak ekpánma,
keñe apátog ekteyapma
táxa segaqhamo nak;
¡apátog axta kelánteyapmak
átex éláléweyak nak!
10 Apmeykáseykekxeyk axta néten,
keñe axta apweyweykento.
¡Yentexek axta yaphope
ekpésyam ma'a kóneg
apkenmágkaxa axta!
11 Apchántegkek axta m'a
xama apchásenneykha
ekha nak apxempenák,
keñe axta apchampaya;
apwetamakpek axta
eksama m'a éxchahayam,
12 apmeykha axta
aptéma appakxanma m'a
ekyáqtessóxma ekyentaxno
ekwakhaya axta,
tén han yaphope ekpésyam
ekláneyo nak yegmen.
13 Xama apkelyenma
ekyennaqte agko' axta
teyapmak ma'a
apkenmágkaxa axta;
keláléweykenteyk axta
ekpalleykento átex.
14 “Kextegyawomchek axta
appeywa Wesse' egegkok
meyke nak Ekhémo m'a néten:
15 apkelnextegkessek
axta yágke aktek apagkok
tén han apkelyenma,
apkexpánchessegkek
axta sélenmexma.
16 Yáxña'akxoho
axta tamheykekxak ma'a
neysekso nak wátsam;
negwetayók axta m'a
awhak nak xapop,
eñama Wesse' egegkok
appeywa ekyennaqte agko',
tén han apwátekhapma
ekyennaqte.
17 “Ey'assáseykmek axta
ko'o apmek Dios,
etekkessegkek axta m'a
wátsam ekyawe agko' nak.
18 Ewagkassegkek axta
teyp nepyeseksa m'a
sélenmexma apkelyennaqte
setaqnagkama axta,
apmelyeyha'ak axta m'a
axta axnémók ko'o.
19 Étámeykmek axta ko'o m'a
neyseksa ekyentaxno sekha,
epasmomchek axta eyke
m'a Wesse' egegkok:
20 Etekkessegkek axta
m'a eyesagkexa axta;
¡ewagkassegkek axta teyp
hakte eyásekhayók ko'o!
21 Egkéssegkek axta ko'o
ekyánmaga Wesse' egegkok
ekpayhawo nak hegkések,
eñama eyáxñeyo sektémakxa,
22 hakte ekyetlamchek axta
ko'o m'a Wesse' egegkok
nak ámay apagkok;
¡mayenseykmok xama
enxoho m'a Dios ahagkok!
23 Kaxénmakha chá'a
ewáxok ma'a ekyókxoho
apchánamakxa nak antéhek;
¡meytnakhásseykmok
xama enxoho m'a
segánamakxa apagkok!
24 Méko agko'
ko'o aqsok ekmaso
sélane nápaqtók ma'a;
ekyamasmeyk ma'a
nentémakxa ekmaso.
25 Egkéssegkek ekyánmaga
Wesse' egegkok
eñama eyáxñeyo
sektémakxa nápaqto'.
26 “Wesse' egegkok,
meyenyawha chá'a
exchep ma'a énxet
meyenyaweykha nak chá'a,
kataqmalmakha chá'a
apwáxok elanok ma'a énxet
aptaqmelchásamákpoho nak chá'a,
27 exekmóshok
eyke chá'a exchep
apteme eyáxñeyo
aptémakxa m'a
énxet eyáxñeyo
nak aptémakxa,
ey'asagkohok eyke
chá'a exchep aptémakxa
m'a énxet apmopwána nak
appeywa elának pók.
28 Elwagkashok eyke
chá'a exchep teyp
ma'a megkaleymáxkoho
nak apkelwáxok,
apkelanawók agkok
chá'a exchep ma'a
éleymáxkoho nak apkelwáxok,
keñe etnessásekxak
chá'a mékoho.
29 Wesse' ahagkok,
xép apteme
élseyéxma ahagkok;
Dios ahagkok,
xép sélsássesso exma m'a
ekyáqtésakxa exma nak.
30 Epasmeyk sa' agkok xép,
aktamagkok sa' sélenmexma,
almallanagkok sa' ma'a
meteymog kélhaxtegkesso nak
tegma apkelyawe apagkok.
31 “Péwók ma'a
Dios ámay apagkok;
payhawók megkólya'ássemek
ma'a apxeyenma nak
elának Wesse' egegkok.
¡Eltaqmelcheshok chá'a Dios
ma'a apyókxoho énxet'ák
ektáha nak chá'a apcháyo!
32 ¡Dios apteme
wánxa xama, méko pók.
Méko mók aqsok kéláyókxa
awanchek hentaqmelchesek!
33 Dios apteme
sekyexánegweykekxexa apyennaqte,
tén han setnéssesso
ekpéwomo sektémakxa,
34 cha'a setnéssesso ko'o
meyke sekpelápegwayam
ma'a ektémól'a xenaq,
cha'a segkésso han
sekmowána atnamha
m'a netnók agko' nak,
35 cha'a seltámésso han
yaqwayam wampakhak ma'a,
tén han segkésso sekyennaqte,
yaqwayam weykesek axát'ák ma'a
yágke sawo ekyexwase nak.
36 “Xép setaqmelchesso,
tén han sewagkasso teyp,
ektaqmeleykha apwáxok
sélányo keñamak
setaqmelchessessama sekha.
37 Eyaxñássessegkek
chá'a sekmaheykegkaxa',
megkaltáxñek chá'a emagkok.
38 “Élamheykegkek axta
ko'o m'a sélenmexma,
keñe sekmassésseykmo,
natámen seksawhoma
axta séxyeykmo makham.
39 ¡Eksawhomók axta
sekmassésseykmo!
¡Nápakha'a apketkók
axta ekteméssessók!
Axta enaqxétekhágweykmok.
¡Apkelyaqneneykegkek axta
ekpayhókxa sénmágkaxa!
40 Xép axta segkésso
sekyennaqte sémpakhe;
xép axta apkeltémo
elháxahagkok
emonye' m'a énxet'ák
sélenmexeykha axta chá'a,
41 tén han apkeltémo
yenyahagkok emonye'
m'a sélenmexma nak.
Cháxa sekmassésseykmo
axta ko'o m'a ektáha
axta chá'a setaqnagko.
42 Aptegyeykegkek
axta eykhe ekpasmo,
méko axta
eyke ekpasmoma;
apwóneykha axta eykhe
chá'a Wesse' egegkok,
axta eyke yátegmoweykegkok.
43 ¡Ektepelchamók axta
ektémól'a yagkamex náxop!
¡Élteyammeykha axta,
ektémól'a ólteyammaha
yelpa' m'a ámay!
44 Emallahanchessegkek
axta nepyeseksa
m'a énxet'ák
apkelnápomákpo axta
chá'a énxet'ák ahagkok,
etnéssessegkek axta
aqsa makham
sémha emonye'
nepyeseksa m'a pók
aptémakxa énxet'ák,
éltemessáseykha axta
ko'o m'a énxet'ák
megkatnaha nak sélweteykxa'.
45 Apkelleg'ak
agkok chá'a sekpeywa,
hélyahakxohok chá'a;
kaltaqmalmakha chá'a
apkelpeywa hexének
ma'a énxet'ák apkeleñama
nak mók nekha',
46 kalyelqaxchek chá'a
apkelwáxok hélanok
énxet'ák apkeleñama
nak mók nekha,
elpexyennók chá'a
elántépok ma'a
apkelyexanmomakxa
nak chá'a.
47 “¡Megyetsepek chá'a
Wesse' egegkok!
¡Apcheymákpoho sa'
chá'a kólteméssesek ma'a
setaqmelchesso nak chá'a!
¡Meyke ekhémo sa' chá'a
kólteméssesek ma'a Dios
sewagkasso nak chá'a teyp,
tén han semasma nak chá'a!
48 Cha'a apteme Dios
seyaqmagkassáseykekxa
nak chá'a mók
sélteméssessamakxa m'a,
tén han sélmésso m'a énxet'ák,
yaqwayam atnehek séláneykha.
49 Ewagkassegkek
teyp nepyeseksa m'a
sélenmexma nak,
cham'a sénmexeykha
sektámeykmo nak chá'a ko'o.
¡Wesse', ewagkassegkek
ko'o teyp xép,
nepyeseksa m'a énxet'ák
apkelyennaqteyáseykha nak
chá'a apyempe'ék!
50 Cháxa keñamak
sélpeykessamo
nak chá'a exchep,
nepyeseksa m'a
pók aptémakxa énxet'ák,
tén han sekmeneykmassama
chá'a negmeneykmasso xép apwesey.
51 Apméssegkek
xép apkelmalláneyak
ekxámokma m'a
wesse' apwányam ektáha
axta apkelyéseykha;
yásekhohok chá'a
exchep ma'a David,
tén han ma'a
aptawán'ák neptámen.”
