Apquilvoycta apquilaoclha
1 Invocmec nic nat siete piltin. Apnam nic nat tingma apancaoc enlhitaoc Israel. Apcaneyclhec nic nat tingma Jerusalén aplhamoclhojo enlhitaoc. Am nic nat ingyaymacpoc lhama. 2 Apquiltamjoc nic nat ellana apquilvatnamaclha asoc macmescama Dios, apvisay Jesúa, Josadac apquitca najan apnaymacoc apquiltomja sacerdotes. Najan Zorobabel, Salatiel apquitca najan apnaymacoc. Apquililtamjoc nic nat elyiplovcasojo actemaclha apcanamaclha Moisés aptomja Dios aplingascama, yoyam elvitic asoc acticyovam acyanmongam melyascalhma. 3 Apquillanac nic nat apquilvatnamaclha payjo acyitnamaclha nano. Apquilvatnec nic nat asoc acticyovam acyanmongam melyascalhma. Aclhamoclhojo acnim mataa, alhtoo najan actalhnam. Inyitnec nic nat amyaa apquilinmelhaycam actomja apquilaoclha. 4 Apquilyiplovcasquic nic nat apcanamaclha nano yoyam ellana fiesta jamilh apancaoc. Najan actemaclha apcanamaclha nano elvitic asoc acticyovam moclhama acnim. 5 Actemaclha mataa apquilvatnama acyanmongam melyascalhma. Najan asoc macmescama mataa piltin apjalhnancoc najan moclhama fiestas actemaclha apyisponcama Dios. Najan aclhamoclhojo mataa asoc apquilmescama nasa enlhitaoc. 6 Ayenmo ilhnic nat lhama acnim acvaycmo siete piltin. Apquilvatnec nic nat mataa asoc acticyovam acyanmongam melyascalhma. Am nic nat collanalhcac mocjam apvojac tingma apponquinomap. 7 Apquillhocac nic nat solyayem apquillanay yatipjaymacaoc najan apquillanay tingma. Apquillhocac nic nat enlhit co Sidón najan co Tiro aptoycaoc najan apyinaycaoc najan aceite olivo ayingmenic. Apquilsantac nic nat mataa yamtaa apquilyatemenma netin inquilhe Líbano. Apquilyinyovaseclhec nic nat netin yingmin acvocmo tingma Jope. Eycaso ilhnic nat apcanamaclha Ciro co Persia.
Apvojac tingma apponquinomap
8 Anit años nic nat intomjac apquilvoycta enlhitaoc tingma apponquinomap tingma Jerusalén. Apvocmec nic nat poc piltin. Apcaneclhec nic nat maa: Zorobabel, Salatiel apquitca najan Jesúa, Josadac apquitca najan poc apnaymacoc sacerdotes najan levitas. Najan maa aplhamoclhojo apquilmomap nano apquilvactamo tingma Jerusalén. Apquiltimesacpec nic nat apquilimja apmamyi apquillanay tingma enlhitaoc levitas apquiltomja veinte años tap. 9 Apquilimja apmamyi ilhnic nat Josué najan apquitquic najan (apquilyalhinga) apnaymacoc najan Cadmiel najan apquitquic, Judá apquitquic. Najan Henadad apquitquic najan apnaymacoc levitas. Am nic nat ingyaymacpoc lhama naysicsa apquillanay tingma apvojac tingma apponquinomap. 10 Apquillanac nic nat apvojac tingma apponquinomap. Apquilantalhneclhec nic nat apava apvinatem sacerdotes. Apquilmec nic nat apquilpayvascama trompetas. Apquilmec nic nat yatalhpong símbalos enlhitaoc levitas, Asaf apquitquic. Apquilacoc nic nat Dios, acno ilhnic nat actemaclha apcanama apvisqui David nipyesicsa enlhitaoc Israel.
11 Apquilminaycmasquic nic nat naysicsa apquilayo Dios, naysicsa apquiltimem gracias: Aptasi nac Dios. Cotningvoyam nelha apquimlaycmo enlhitaoc Israel — nic nat apquiltomjac. Avanjec nic nat apquilitsovascama naysicsa apquilayó aplhamoclhojo enlhitaoc. Ayinyema ilhnic nat apquillanay apvojac tingma apponquinomap. 12 Apnam nic nat maa sacerdotes najan levitas najan apquilviscaa tingma najan apquilvanyam. Actomja apquilvitaycamco aptovasomap siclhoc nat tingma apponquinomap. Quilhvoc nic nat apquilvita apquillanomap tingma apponquinomap. Apquilyapcalhquic nic nat. Apquililpalhamam nic nat aplhamoclhojo enlhitaoc naysicsa apquilitsovascama. 13 Mongyascaoc nic nat actemaclha acyinamam olhma enlhitaoc. Avanjec nic nat apquililpalhamaycam naysicsa apquilitsovascama. Am nic nat colhno apyapcalhem apquilvanyam. Inlingalhcoc nic nat mocjay actemaclha acyinamam olhma.
Ekwatnamáxchexa aqsok kélláneykekxa makham
1 Xama axta ekwokmo siete pelten, apyókxoho énxet'ák axta apchaqnákxak ma'a Jerusalén, cham'a apkelhákxo axta makham nanók apheykegkaxa m'a israelitas. 2 Keñe axta Josué, Josadac axta apketche, yetlo apkelxegexma'a m'a apkelmaxnéssesso Dios énxet'ák apagkok, tén han ma'a Zorobabel, Salatiel axta apketche, tén han ma'a apnámakkok nak, apkelánegkek axta ekwatnamáxchexa aqsok apagkok nak ma'a Dios nak Israel, yaqwayam enxoho enegkenek aqsok apkelwatno m'a néten nak, éltémókxa nak etnahagkok ma'a Moisés segánamakxa apagkok, apteme nak Dios apkeláneykha. 3 Apxátekhásekxeyk axta ekwatnamáxchexa aqsok ma'a nanók ekyetnamakxa axta, hakte apkeláyak axta m'a énxet'ák apheykha axta m'a yókxexma nak, yókxoho axto'ók axta chá'a elwatnések aqsok kélnaqtósso m'a Wesse' egegkok, tén han yókxoho taxnám. 4 Apkelánegkek axta han ma'a kélessawássessamo nak kélpakxeneykegkaxa yenta'a aktegák étkók, ektémakxa nak ektáxésamaxche m'a segánamakxa. Apkelméságkek axta chá'a yókxoho ekhem ma'a ekwánxa nak chá'a élwatnamáxche m'a aqsok kélnaqtósso, ekwánxa nak chá'a élwatnamáxche yókxoho ekhem. 5 Apkelánegkek axta han ma'a kélnaqtósso élwatnamáxche nak chá'a yókxoho ekhem, tén han ma'a pelten aphaxnagkok nak, ekxegexma nak chá'a m'a kélessawássessamo ekpagkanamaxche apagkok nak Wesse' egegkok, tén han ma'a énxet apmáheyo apagko' nak chá'a egkések ma'a Wesse' egegkok. 6 Amonye' ekxega ekhem pelten siete axta apcheynawo apkelwatnésso kélnaqtósso m'a Wesse' egegkok, cham'a megkeynókxa axta makham apkelánamap Wesse' egegkok tegma appagkanamap apagkok. 7 Apkelméságkek axta énxet'ák Tiro tén han Sidón selyaqye m'a apkeláneyak nak tegma, tén han ma'a apkeltamheykha nak yántéseksek, tén han aptéyak, apyenéyak, yaqwayam enxoho elsakxak elyeykhásekxak wátsam ekwányam ma'a yántéseksek cedro éleñama m'a Líbano ekweykekxoho m'a Jope, ekhawo apméssama axta apkeltémókxa etnahagkok ma'a Ciro, wesse' apwányam axta m'a Persia.
Tegma appagkanamap kéleynamo kélláneykekxa makham
8 Apcheynawok axta apkeláneykekxa Dios tegma appagkanamap apagkok ekwokmo axta apqánet pelten tén han apqánet apyeyam apkelweykekxa Jerusalén ma'a Zorobabel, Salatiel axta apketche, tén han Josué, Josadac axta apketche, yetlo m'a apkelxegexma'a apkelmaxnéssesso Dios énxet'ák apagkok, tén han levitas, tén han ma'a apyókxoho kélnaqleykekxa axta megkatnahakxa apkelókxa apkelweykekxa axta makham ma'a Jerusalén, levitas axta han apkeltamhók exegkesek apkeltamheykha apwayam nak chá'a veinte apyeyam apagkok. 9 Apkelxegexma'a apagko' axta han aptáhak Josué m'a apketchek, tén han ma'a apkelyáxeg'a, yetlo Cadmiel tén han apketchek nak, apteme axta Judá aptawán'ák neptámen, keñe han ma'a Henadad aptawán'ák neptámen, apketchek tén han apkelyáxeg'a, apteme axta levitas, yaqwayam enxoho exegkessesek apkeltamheykha m'a apkeltamheykha nak apkeláneykekxa Dios tegma appagkanamap apagkok.
10 Xama axta apnegkenágko meteymog apowhók Wesse' egegkok tegma appagkanamap apagkok ma'a ektáha axta apkeláneykekxa', apkelchampákxeyk axta néten apkelmaxnéssesso Dios énxet'ák apagkok, yetlo apkelántaxneykekxa m'a apkelántaxno apkelwenaqte, tén han yetlo apkelmeykha apkelaqkahasso. Keñe axta levitas, Asaf axta aptawán'ák neptámen, apkelsawa m'a apkeltekpaga yaqwayam elpeykeshok ma'a Wesse' egegkok, apkeltémókxa axta etnahagkok ma'a David, wesse' apwányam apagkok axta Israel. 11 Nápakha axta chá'a apkelmeneykmásak apkelpeykásawo, keñe axta han nápakha aptáha chá'a apkelátegmowágko s'e: “Kólmés ekxeyenma kélwáxok Wesse' egegkok, hakte méko xama enxoho aptémakxa m'a, megkamassegwomek han apkelásekhayo m'a énxet'ák Israel.” Apyókxoho énxet axta apkelwehéseyha apkelátsencha'a apkelpeykásawo m'a Wesse' egegkok, hakte cheynawók axta makham kélxátekháseykekxa m'a Wesse' egegkok tegma appagkanamap apagkok. 12 Apxámok axta han apkelmaxnéssesso Dios énxet'ák apagkok meleysagkoho apkellekxagweyncha'a apkelwet'a kéltemessásekxo makham aphaxnagkok ma'a tegma appagkanamap, tén han levitas, tén han ma'a apkelámha apmonye'e axta chá'a apnámakkok, aptamhéyak axta apkelwányamo, ektáha axta apkelwete m'a apkemha apmonye' tegma appagkanamap axta. Apxámok axta han apkelwehéseyncha'a élpayhékxo apkelwáxok. 13 Axta keykpelcháxchek ma'a apkelwehéseykha nak élpayheykekxa apkelwáxok énxet'ák, tén han ma'a apkellekxagweykha nak, hakte kayhek axta apkelwehéseykha, makhawók axta legáxchek ekyennama exma.
