Apquictingaycaoc apmamyi apquinyemayaclha Jesucristo
(Lc 3.23-38)1 Eycaso acnatalhesomalhca apquilvisay apquictingaycaoc apmamyi apquinyemayaclha Jesucristo. Abraham najan David aptovana niptamin nic nat Jesucristo.
2 Abraham apquitca ilhnic nat Isaac. Isaac apquitca ilhnic nat Jacob. Jacob apquitca ilhnic nat Judá najan apquilyalhinga. 3 Judá apquitca ilhnic nat Fares najan Zara, inquin nic nat acvisay Tamar. Fares apquitca ilhnic nat Esrom. Esrom apquitca ilhnic nat Aram. 4 Aram apquitca ilhnic nat Aminadab. Aminadab apquitca ilhnic nat Naasón. Naasón apquitca ilhnic nat Salmón. 5 Salmón apquitca ilhnic nat Booz, inquin nic nat Rahab. Booz apquitca ilhnic nat Obed, inquin nic nat Rut. Obed apquitca ilhnic nat Isaí. 6 Isaí apquitca ilhnic nat David, aptomja ilhnic nat apvisqui. Apvisqui David apquitca ilhnic nat Salmón, inquin nic nat Urías aptava niptamin.
7 Salmón apquitca ilhnic nat Roboam. Roboam apquitca ilhnic nat Abías. Abías apquitca ilhnic nat Asa. 8 Asa apquitca ilhnic nat Josafat. Josafat apquitca ilhnic nat Joram. Joram apquitca ilhnic nat Uzías. 9 Uzías apquitca ilhnic nat Jotam. Jotam apquitca ilhnic nat Acaz. Acaz apquitca ilhnic nat Ezequías. 10 Ezequías apquitca ilhnic nat Manasés. Manasés apquitca ilhnic nat Amón. Amón apquitca ilhnic nat Josías. 11 Josías apquitca ilhnic nat Jeconías najan apquilyalhinga. Apquileyvam nic nat naysicsa macnalayclha israelitas apquilmomap yoclhilhma Babilonia.
12 Natamin macnalayclha israelitas apquilmomap yoclhilhma Babilonia aptiyacmo ilhnic nat apquitca Jeconías apvisay Salatiel. Salatiel apquitca ilhnic nat Zorobabel. 13 Zorobabel apquitca ilhnic nat Abiud. Abiud apquitca ilhnic nat Eliaquim. Eliaquim apquitca ilhnic nat Azor. 14 Azor apquitca ilhnic nat Sadoc. Sadoc apquitca ilhnic nat Aquim. Aquim apquitca ilhnic nat Eliud. 15 Eliud apquitca ilhnic nat Eleazar. Eleazar apquitca ilhnic nat Matán. Matán apquitca ilhnic nat Jacob. 16 Jacob apquitca ilhnic nat José. José aptava alhta María. María ayitca alhta Jesús apvisay Cristo.
17 Invocmec nic nat catorce apyamoncascaoc apquilictingaycaoc apmamyi apquilinyema Abraham acvocmo apvisqui David. Invocmec nic nat mocjam catorce apyamoncascaoc apquilictingaycaoc apmamyi apquilinyema apvisqui David acvocmo acnim macnalayclha israelitas apquilmomap yoclhilhma Babilonia. Natamin invocmec nic nat mocjam catorce apyamoncascaoc apquilictingaycaoc apmamyi acvocmo acnim aptiyam Cristo.
Aptiyaycamlha Jesucristo
(Lc 2.1-7)18 Eycaso actemaclha alhta aptiyaycamlha Jesucristo. Inponquinalhquic alhta María. Apponcanma alhta José, yoyam etnejic aptava. Am alhta colyimjapac mocjam. Inyasamcoc alhta María actomja inlovso ayinyema apmopvan Espíritu Santo. 19 Enlhit appeyvomo alhta José. Am alhta eltamjoc etipquisam acvisay María. Inlhenquic alhta apvalhoc, yoyam eyilhacpojo eyinyoc María. 20 Naysicsa allheneycam apvalhoc alhta José, acvanmesa lhama ángel Visqui apcasinancama. Aptomjac alhta ángel apcanya José:
—José, lhip nac David aptavin niptamin. Nongya nasa etnejic aptava María. Ayinyemaclha Espíritu Santo aptimesquiscama inlovso. 21 Cotimsic sat ayitca apquinavo. Iltime sat apvisay JESUS. Elvomsic sat tap apnaymacoc enlhitaoc. Elmascocsic sat melyascalhma enlhitaoc —alhta intomjac apvanmoncama.
22 Eycaso invitalhquic alhta. Invocmec nic nat nelha Visqui ingac appayvam aplhanma ilhnic nat profeta Dios aplingascama, yoyam cotnejic:
23 Quip elanojo, inlovsoc sat cotnejic quilvana mepqui atava.
Cotimsic sat ayitca apquinavo.
Colhic sat actimesa apvisay Emanuel,
ningiltimem nincoo Dios singilpalhavoy —nic nat intomjac appayvam.
24 Lhama alhta aplhaticja José. Apquilyajaclhoc alhta actomjaclha appayvam ángel Visqui apcasinancama. Apyipitcavoc alhta José. Aptava alhta aptomjac María. 25 Am alhta epatjetamco siclho acvocmo acnim aptiyacmo ayitca. Apquiltimec alhta apvisay JESUS.
Jesucristo apyapmeyk nano'
(Lc 3.23-38)1 Keso kélnaqtáxéseyak axta apkelwesey m'a Jesucristo apyapmeyk nano', cham'a Jesucristo apteme nak David aptáwen neptámen, tén han Abraham aptáwen neptámen:
2 Abraham axta apketche m'a Isaac, keñe axta Isaac apketche m'a Jacob, keñe axta Jacob apketche m'a Judá, tén han ma'a apkelyáxeg'a nak. 3 Judá axta apketche m'a Fares, tén han ma'a Zérah, keñe axta egken ma'a Tamar. Fares axta apketche m'a Esrom, keñe axta Esrom apketche m'a Aram. 4 Aram axta apketche m'a Aminadab, keñe axta Aminadab apketche m'a Naasón. Naasón axta apketche m'a Salmón. 5 Salmón axta apketche m'a Booz, keñe axta egken ma'a Rahab. Booz axta apketche m'a Obed, keñe axta egken ma'a Rut. Obed axta apketche m'a Jesé. 6 Jesé axta apketche m'a wesse' apwányam David, keñe axta wesse' apwányam David apketche m'a Salomón, axta egken ma'a aptéma axta aptáwa' Urías.
7 Salomón axta apketche m'a Roboam, keñe axta Roboam apketche m'a Abías. Abías axta apketche m'a Asá. 8 Asá axta apketche m'a Josafat, keñe axta Josafat apketche m'a Joram. Joram axta apketche m'a Uzías. 9 Uzías axta apketche m'a Jotam, keñe axta Jotam apketche m'a Acaz. Acaz axta apketche m'a Ezequías. 10 Ezequías axta apketche m'a Manasés, keñe axta Manasés apketche m'a Amón. Amón axta apketche m'a Josías. 11 Josías axta apketche m'a Jeconías tén han ma'a apkelyáxeg'a nak, cham'a kélnaqleykekxo axta israelitas Babilonia apkelmomakpo.
12 Jeconías axta apketche m'a Salatiel, keñe axta Salatiel apketche m'a Zorobabel, cham'a natámen axta apkelmomap ma'a énxet'ák Israel. 13 Zorobabel axta apketche m'a Abiud, keñe axta Abiud apketche m'a Eliaquim, keñe axta Eliaquim apketche m'a Azor. 14 Azor axta apketche m'a Sadoc, keñe axta Sadoc apketche m'a Aquim. Aquim axta apketche m'a Eliud. 15 Eliud axta apketche m'a Eleazar, keñe axta Eleazar apketche m'a Matán. Matán axta apketche m'a Jacob. 16 Jacob axta apketche m'a José, cham'a María atáwa', egken nak ma'a Jesús, néltéma nak negko'o Mesías.
17 Catorce axta apyókxoho aptawán'ák apkelánteyapma eyeynókxa m'a Abraham ekweykekxoho m'a David, catorce axta eyeynókxa m'a David ekweykekxoho m'a apkelmomakpo axta israelitas kélnaqleykekxo Babilonia, catorce axta nahan eyeynókxa m'a apkelmomakpo axta ekweykekxoho m'a aptéyeykmo Mesías.
Jesucristo aptéyam
(Lc 2.1-7)18 Keso ektémakxa axta apteyeykmo Jesucristo s'e: Pagkanmeyk axta yaqwayam katnehek atáwa' José m'a María, egken axta; wetamaxcheyk axta eyke ektéma lóso' eñama Espíritu Santo apmopwána amonye' yaqwayam keypetchak mók. 19 Keñe m'a José, yaqwayam axta katnehek atáwa' m'a María, apteme axta énxet appéwomo, axta emáheyók etekkessesha ekwesey m'a María, apyexamakpók axta aqsa apmáheyo elwataksek apkelane. 20 Apxekmowasamákpók axta Wesse' egegkok apchásenneykha apwanmagko neyseksa ekxeyenma apwáxok etnehek xa. Axta aptemék apkenagkama s'e: “José, David aptáwen neptámen, nágye' aqsa etnehek aptáwa' María, Espíritu Santo apmopwána keñamak apteméssesso peya nak kótak étche m'a. 21 Kategkesek sa' étche apkenna' m'a María, keñe sa' etnéssesek apwesey Jesús. Eltamhakpok sa' xa ektáha nak, hakte elwagkasek sa' teyp énxet'ák apagkok ma'a ektémakxa nak apkelánéyak melya'assáxma.”
22 Sawhomáxkók axta ektéma xa, yaqwayam enxoho katnehek ma'a apxeyenma axta Wesse' egegkok katnehek, apchásenneykekxo axta exének ma'a Dios appeywa aplegasso aptéma axta s'e:
23 “Lósók sa' katnehek
kelán'a meyke
kélteméssesseykmohoxma,
kategkesek sa' étche apkenna'.
Kólteméssesek sa'
apwesey Emanuel”
(néltéma nak negko'o: “Dios sempáxaqwe.”)
24 Xama axta apxatakha'a José, apkelyahákxók axta aptáhakxa appeywa m'a Wesse' egegkok apchásenneykha, aptáwa' axta aptemék ma'a María. 25 Tegkessegkek axta étche apkenna' María meykexho apteméssesseykmohoxma m'a José, cham'a apteméssessama axta apwesey José m'a Jesús.
