Apcanit apquiltomja apquillingascama sicvisay
1 Emcasquic alhta lhama yammamoc, malha yamit ningilyipsateycaoc. Intomjac alhta siclingay:
—Itnimiclha netin. Ilyipsitaoc sat Dios tingma apponquinomap. Ilyipsitaoc sat najan acvatnamalhquilha asoc macmescama Dios. Ilyipsitaoc sat najan enlhitaoc apquiltomja apquililmalhnancama. 2 Nolyipsitaoc nasa acyiviy olhma napocja tingma apponquinomap. Ayinyemaclha actomja apquileyvomoclha metnaja judíos. Eltovacsic sat metnaja judíos tingma apvanyam aptamila acvocmo sat cuarenta y dos piltin. 3 Olapajacsic sat apcanit apquillingascama sicvisay. Yoyam ellingacsic amyaa actemaclha sicmayjayoclha acvocmo mil doscientos sesenta acnim. Yamquintim ajac sat etnejic apquilantalhnama, malha apmapyovsica sat eltimjic.
4 Anit olivo yamit actomja allingascama sicvisay najan anit alapongmateycaoc alanma napato Dios aptomja Apvisqui as nalhpop. 5 Apquililtamjoc sat ancoc cotnaja ingmoc elnatovacsic apquillingascama sicvisay, elitsapoc sat. Ayinyemaclha cotyapoc sat talha apatnaoc, yoyam colnapoc cotnaja ingmoc. 6 Apquilmopvan innac as apquillingascama sicvisay. Apvancaac elmeyvoc acmamay, malha apquilapayclha atong netin yoyam comacyejec naysicsa apquillingascama amyaa ayinyema Dios. Apvancaac najan etnescasiclhac ema acyovoclhojo yingmin. Apvancaac najan elasquisic apyimpeoc enlhitaoc lhalhma anco, aclhamoclhojo actemaclha alasquiscama apyimpeoc. Cotnejic sat mataa acvamlha actemaclha apquilmayjayoclha apcanit apquillingascama sicvisay. 7 Apquilpenasquic sat ancoc actemaclha apquillingascama sicvisay, cotyapoc sat malhic congne lhama asoc navjac aclom. Elnapacpoc sat as apcanit enlhitaoc. Colnapoc sat asoc navjac aclom, ayinyemaclha actomja acyimnatem. 8 Elhnamcoc sat apjapaoc naysicsa amay nipyesicsa tingma apvanyam. Eycaso tingma apvanyam macyipitquiscamaclha alhta asoc timyescama Visqui ingac. Acno apvisay as tingma Sodoma najan Egipto. 9 Elvitac sat apnamcolha apjapaoc enlhitaoc apquilinyema lhalhma anco, apquilinyema aplhamoclhojo apquilmolhama, apquilinyema aplhamoclhojo cotnaja ninpayvamo lhama najan apquilinyema aclhamoclhojo apquilaoclha lhalhma anco. Tres acnim najan medio sat cotnejic apnaycaoc apjapaoc. Elmiyovacpoc sat apjapaoc yoyam colhic ayatongna. 10 Colpayjiclhac sat apquilvalhoc enlhitaoc lhalhma anco apquilvita sat apquilitsepma as apcanit enlhit. Elitsovacsojoc sat enlhitaoc. Colhojoc sat mataa moc apquilmescama asoc apancaoc poc. Ayinyemaclha apquiltanovacpec alhta mataa as apcanit enlhit. Apquilanyacpec alhta conyemac apquilasquiscama apyimpeoc aplhamoclhojo enlhitaoc. 11 Natamin tres acnim najan medio aplhaticjascacmec Dios as apcanit enlhit. Apnalhaticjangvocmec alhta. Apquilangveclhec alhta aplhamoclhojo enlhitaoc apquiltomja apquilvitay. 12 Apquillingac alhta aptomja apnalhaticjangviyam actepa netin appayvam acyimnatem. Intomjac alhta appayvam:
—Elmiyama jalip netin —alhta intomjac.
Yejemoc alhta apquilmiyaclho netin naysicsa yipjopay. Apquilvitamcoc alhta apquiltomja apquilinmelhaycam malha cotnaja ingmoc. 13 Pilapcasquic alhta acyovjamcaa lhop. Apquilyaninamquic alhta aplhamoclhojo tingma as tingma apvanyam, malha décima parte. Apquilitsepquic alhta siete mil enlhitaoc naysicsa acyovjeycam lhop. Apquilacac alhta enlhitaoc apquilaymomap. Apquilacoc alhta Dios apna netin.
14 Inyeycaac mocjam moc aplhanma apquilasquiscama apyimpeoc enlhitaoc. Incaymalhquic mocjam lhama yoyam colhic alasquisa apyimpeoc, covac sat quilhvo.
Actomjaclha nelha trompeta appayvascama
15 Appayvasquic alhta poc ángel trompeta appayvascama, siete alhta apvocmoc. Yejemoc alhta siclinga netin appayvam alyimnatem, intomjac alhta:
Apvisqui as nalhpop aptomja Dios Visqui ingac najan Cristo.
Etnejic sat Apvisqui cotmongvoyam nelha
—alhta inquiltomjac.
16 Acvitac alhta apnamcaa apquiltajanem veinticuatro apquilimja apmamyi napato Dios. Yejemoc alhta apnalhpolintamo nalhpop. Apquilpayasoc alhta Dios, 17 apquilpamejitsa:
Gracias ningiltomja nincoo lhip Dios Visqui ingac apyimtalhnamo.
Apma siclhoc anco najan quilhvo nac jay najan evotac sat mocjam.
Quilhvoc aplhicmosa acyiviy apmopvan.
Quilhvoc aptomja Apvisqui yoyam elasina enlhitaoc.
18 Apquillovquic enlhitaoc lhalhma anco.
Quilhvoc invaac acnim yoyam eyanmongsiclhac lhip apquiltemaclha enlhitaoc.
Eyicpilcojoc sat lhip apquiltemaclha apquilmasquingvaycmo alhta.
Elmesic sat lhip acyanmongam apquiltomja apquilancam,
apquiltomja apquillingascama lhip apvisay najan apquiltomja lhip apquilyacyescama.
Najan apquiltomja apquilayo lhip apvisay, apquiltomja apquitcaoc najan apquilvanyam.
Enatovacsic sat lhip enlhitaoc apquiltomja apnatovascama alhta as nalhpop
—alhta apquiltomjac apquilimja apmamyi.
19 Acvitamcoc alhta acmayesaclho atong Dios tingma pac apponquinomap netin. Acvitac alhta congne tingma yamit aysicsic acnaycamcolha singanamaclha Moisés. Pilapcasquic alhta sicvita aclhamocma quilyinmayam niyava yamit aysicsic. Inlhamoc alhta najan quilhtingyovayam. Inyovjam alhta lhop. Inpalacmec alhta cotlaycaoc yingmin alyayem.
Apqánet ektáha nak apweteykegkoho
1 Ekxakak axta ko'o yámet ekyaqwate negmeykha nak nélyetsátéyak, máxa axta yámpa'at la'a, axta entáhak amya'a seyáneyáxko s'e: “Etnamha, elyetseták sa' ma'a Dios tegma appagkanamap apagkok nak, tén han ma'a ekwatnamáxchexa nak chá'a aqsok, elyetset sa' nahan apwánxa apyókxoho m'a ektáha nak apkelpeykessamo m'a. 2 Eyke ná elyetseták aqsa m'a nepyáwa nak tegma appagkanamap, hakte énxet'ák melya'áseyak Dios axta apxaweyk ma'a, cham'a peya nak elteyammaha tegma apwányam appagkanamap ekweykmoho cuarenta y dos pelten ma'a. 3 Aláphaksek sa' ko'o apqánet ektáha nak ekmámnaqsoho apkelxeyenma amya'a ahagkok, yetlo apkelántaxno apáwa sẽlwáxaqxamo nak, ellegaksek sa' nahan ko'o sekpeywa ekweykmoho mil doscientos sesenta ekhem.”
4 Cháxa apqánet ektáha nak ekmámnaqsoho apkelxeyenma amya'a ahagkok, apkelyetchesamakpoho m'a ánet yámet olivo, tén han ánet cháléwasso ekhágko nak nápaqtók ma'a Wesse' nak keso náxop. 5 Apkelenxanakmek agkok chá'a etnéssessamhok exma ekmaso xama énxet xa apqánet nak, táxa chá'a etekkesek apatña'ák, esawhohok chá'a elwatnek ma'a apyókxoho apkelenmexma nak; sa' katnehek nahan apkeletsapma m'a ektáha nak apmáheyo etnéssessamhok exma ekmaso xa énxet'ák nak. 6 Yetneyk apmopwancha'a yápekxak néten xa énxet'ák apkelxeyenma nak ekmámnaqsoho amya'a ahagkok, yaqwayam enxoho megkammakyek neyseksók apkellegasso amya'a eñama nak Dios, yetneyk nahan apmopwancha'a etnessásekxak éma m'a yegmen, yetneyk nahan apmopwancha'a ellegássesagkohok apyókxoho énxet'ák keso náxop, cham'a ekyókxoho ektémakxa nak chá'a nenlegeykegkoho ekmaso, cham'a apkepmenyéxa enxoho etnahagkok.
7 Apsawhakyek sa' agkok apkeltenneykha m'a amya'a eñama nak Dios, kalenmexek sa' ma'a aqsok nawhak eklo eñama nak ekteyapma m'a kañók agko' máxek, kamallánek sa' nahan nepyeseksa, kalnápok sa' nahan. 8 Kaxnagkok sa' nahan aphopák neyseksa ámay ma'a tegma apwányam, kélyepetchessamakxa axta aqsok ektegyésso m'a Wesse' apagkok, cham'a kéltéma nak kélyetcháseykekxoho ekwesey m'a Sodoma, tén han Egipto. 9 Ántánxo ekhem náxet mók sa' katnehek apwete aphopák ma'a pók aptémakxa énxet'ák nak, tén han ma'a mók ektémakxa nak apkelpaqmeyesma, cham'a apkeleñama nak ekyókxoho yókxexma, megyohok sa' nahan kólátawanyek. 10 Kalpayhekxak sa' nahan apkelwáxok énxet'ák apheykha nak keso náxop apkeletsapa enxoho xa. Kalpayhekxohok agko' sa' apkelwáxok egkések chá'a pók aqsok apmésso naqsa, hakte cháxa apqánet apkellegasso axta Dios appeywa, apkellegassáseykegkók apagko' axta chá'a xa énxet'ák nak.
11 Yeyk'ak axta xa ántánxo ekhem náxet mók nak, apnaqxétekhássekmek axta makham ma'a Dios, apkelchampákxeyk axta makham néten, apkelakawók apagko' axta nahan ma'a ektáha axta chá'a apkelwete. 12 Keñe axta apkelleg'a ekyennaqte kélpeywa eñama néten xa apqánet énxet ektáha axta ekmámnaqsoho apkelxeyenma amya'a eñama nak Dios. Entáhak axta amya'a apkeláneyákpo s'e: “¡Kólchenátwata s'e!” Apkelmahágkek axta néten xa, neyseksa yaphope axta apkelxegak, apkelwet'ak axta nahan ma'a apkelenmexma. 13 Keñe axta ektepa ekyawheykha xapop ekyennaqte agko', palchesakmek axta anhan nápakha tegma ekwokmo axta chá'a diez apyókxoho, siete mil axta anhan apyókxoho apkeletsapma énxet'ák. Keñe axta m'a apkeleymomap axta meletsapma, apkelpeykásawók axta Dios apha nak néten yetlo ekyawe agko' apkelaye.
14 Ánet entáhak ekyeykhe kéláphasso aqsok ekmaso agko', xegakmek eyke makham ma'a yaqwayam sa' katnehek ántánxo.
Ektáhakxa siete kélaqkahasso
15 Appáwássek axta apchaqkahasso m'a aptáhakxa axta siete Dios apchásenneykha, tén axta eklegáxko ekyennaqte agko' kélpeywa m'a néten. Axta entáhak se'e:
“Wesse' egegkok kaxwók aptáhak
Wesse' apwányam keso náxop,
tén han ma'a Mesías apkeñama nak Dios.
Etnahagkok sa' Kelwesse'e apkelwányam
megkatnégwayam néxa.”
16 Apkelháxahánteyk axta náxop veinticuatro énxet'ák apkelámha apmonye'e apheykencha'a axta néten aptaháno éltaqmela nápaqtók Dios, apkelpeykásawók axta m'a Dios. 17 Axta aptáhak apkelpeywa s'e:
“Negméssek negko'o ekxeyenma egwáxok
xép Wesse' egegkok,
Dios ekha nak apyennaqte,
apheyk makham xép,
aphegkek axta nahan nano' axta,
hakte apmeyk axta exchep
ekyawe agko' apmopwána
tén axta apcheynawo
apteme Wesse' apwányam.
18 Apkellókek axta apyókxoho énxet'ák
apheykha nak ekyókxoho yókxexma,
wa'ak eyke exchep ma'a aplo,
cham'a yaqwánxa nak xép
elyekpelkohok ma'a énxet'ák
apkeletsapma axta;
egkések sa' nahan aqsok apmésso naqsa
m'a énxet'ák ektáha axta
apkellegasso xép appeywa,
tén han ma'a ektáha nak
xép énxet'ák apagkok apkelpagkanamap
tén han ma'a énxet apteme nak chá'a
apcháyo exchep apwesey,
cham'a ekha nak kéláyo,
tén han ma'a meyke nak kéláyo,
emassessók sa' nahan xép ma'a énxet'ák
aptawáseykha nak keso náxop.”
19 Keñe axta ekmayhékxo átog ma'a Dios tegma appagkanamap apagkok apyetna nak néten, wetáxcheyk axta ekyetna yántéseksek kélxátamakxa axta m'a ekhémo mók nélpaqhetchásamáxkoho nak Dios kañe' xa tegma appagkanamap nak. Tén axta ektepa apkelyenmayam, kélpeywa, éxtegyawà, tén han xapop ekyawheykha, tén han ekxámokma ekpalleykenta yegmen élyennaqte.
