Aptamjaycam simpilapquiscama
1 Innec ayaco Visqui ingac.
Tasic anco ningminaycmascama actemaclha ningayo Dios Visqui ingac.
Sas anco actemaclha ningilayo.
2 Visqui ingac aptomja apquillanay tingma Jerusalén.
Aptomjac apcansayclha mocjam apquilhpaneycam siclho apquilmomap ingnaymacoc.
3 Aptamilquiscacmec mataa, acyitna inlhojo alipvoyam apquilvalhoc.
Appilhquitquic mataa apquilyimsem.
4 Aptomja apyascamco apquilvamlha apyova.
Aptimem apquilvisay moclhama apyova.
5 Apyimtalhnamo apanco Dios Visqui ingac.
Acyivey apmopvan apanco.
Apyascamco apanco cotmongvoyam nelha.
6 Apyimnatesquic mataa apquilvalhoc, acyitna inlhojo conjamalhca apquilvalhoc.
Aptovasacpec mataa enlhit apyimtalhnesomacpo apanco.
7 Elminaycmas sat ningayo Visqui ingac.
Elpayvas sat arpa ningayo Visqui ingac.
8 Visqui ingac alinyema yipjopay.
Ayinyema yingmin acmamay.
Visqui ingac ayinyema paat alyimseleycaoc netin inquilhe.
9 Visqui ingac ayinyema actoycaoc ninatoscama.
Najan aptoycaoc mama apquitcoc.
10 Am eyispac Visqui ingac, apvita inlhojo nolhing apyimnatem apanco.
Am eyispac Visqui ingac, apvita inlhojo apyavaoc enlhit.
11 Apyispaquic mataa Visqui ingac apquiltomja apquilayo.
Mepqui apquilyasquiyam aptemaclha singasicjayo Visqui ingac.
12 Quellhip co Jerusalén.
Eltime apquilayo Visqui ingac.
Quellhip co Sión.
Eltime sat apquilayo Dios Visqui ingac.
13 Aptomja apquiltamilquiscama quellhip napatavo cotnaja ingmoc.
Apquilmiyovacpec mataa apquitquic as tingma.
14 Visqui ingac ayinyema actamilaycam ingvalhoc (mepqui ningilnapomalhca).
Visqui ingac ayinyema cotlaycaoc nintom (trigo apactic).
15 Visqui ingac ayinyema singanamaclha acpayjayclha ayapajangvaycmo as nalhpop.
16 Visqui ingac ayinyema piyam aptiyam, malha nipquesic apva, malha tajap acpaliyam.
17 Visqui ingac ayinyema yingmin alyayem.
Piyam aptomja apyimnatescama yingmin.
18 Visqui ingac ayinyema appayvam, yoyam copayjiclhac mocjam actomja acyimnatem.
Visqui ingac ayinyema alhcajayam acyimnatem.
Conyejic sat yingmin.
19 Visqui ingac ayinyema singanamaclha, apquillhoy nic nat Jacob apquilmolhama (Israel).
20 Am elvitayac enlhitaoc metnaja nintemolhama aptamjaycam Dios Visqui ingac.
Am nic nat elyasingvocmoc singanamaclha poc enlhitaoc.
Innec ayaco Visqui ingac.
Nélpeykessamo Dios ekha apyennaqte
1 ¡Aleluya!
¡Tásók agko' nak la'a
agmeneykmássesek
negmeneykmasso
Dios egagkok,
¡Payhawók
kólmeneykmássesek
ekmátsa agko' ma'a!
2 Apxátekhásekxeyk
Wesse' egegkok Jerusalén,
apchánchesákxeyk
han ma'a israelitas
kélexpánchesso axta
kélya'asso megkatnahakxa
apkelókxa.
3 Eltaqmelchessásekxak
chá'a apkelwáxok ma'a
élyentaxno nak apkelwáxok,
elpextehetchesagkok han
chá'a m'a apkelyense.
4 Exének han chá'a
yaqwánxa etnehek
apwánxa m'a yaw'a,
enegkenchesagkok han
chá'a apkelwesey xama.
5 Apwányam apagko'
ma'a Dios egagkok,
awanhek han apmopwána;
méko néxa m'a
apya'áseykegkoho.
6 Elheyásekxak
chá'a néten
Wesse' egegkok
ma'a meyke nak
éleymáxkoho apkelwáxok,
elyaqhápenták eyke
chá'a náxop ma'a
élmasagcha'a nak
apkeltémakxa.
7 Kólmeneykmásses
Wesse' egegkok,
yetlo kélmésso
ekxeyenma kélwáxok;
kólmeneykmásses
negmeneykmasso
Dios egagkok, yetlo
kélpáwasso arpa.
8 Cha'a apcháhakkasso
chá'a yaphope néten ma'a,
emámeyaksek chá'a néten xapop,
yektegkesek chá'a pa'at
ma'a néten egkexe,
9 elagkok chá'a ektéyak
aqsok nawha'ák,
tén han kágqag étkók
élpáweyncha'a enxoho.
10 Háwe ekleklamo
apwáxok Wesse' egegkok ma'a
ektémakxa nak apyennaqte yátnáxeg,
tén han ma'a ektémakxa nak
apkelyennaqte sẽlpextétamo;
11 eyke kalkohok chá'a
apwáxok ma'a ektáha
nak chá'a apcháyo,
melya'ásseyam nak chá'a
ektémakxa segásekhayo.
12 Jerusalén,
elpeykesho
Wesse' egegkok;
Sión, elpeykesho
Dios apagkok.
13 Hakte apyennaqtéssamók
apkelápeykegkokxa
atña'ák kélagkok ma'a,
apkeltaqmelchessegkek
han énxet'ák apagkok
apheykha nak ma'a kañe'
tegma apwányam.
14 Meyke ektáhakxa
apheykha apteméssessók
énxet'ák ma'a
xapop apagkok nak,
apkelyaqkánegkessegkek
apkeleykegko m'a
hótáhap apaktek
apkeltaqmalma apagko' nak.
15 Yáphaksek chá'a
appeywa keso náxop,
keytlawhok nahan chá'a
élánamáxche m'a
aptáhakxa appeywa.
16 Aptekkesso chá'a
yeyam appok ma'a,
ektémól'a nepkések apwa',
yexpánchesha chá'a
élyenneykekxa ektémól'a yagkamex.
17 Cha'a apcháphasso
chá'a yeyam appok
ektamheykekxa nak
yegmen élyennaqte;
keynnaqtések chá'a
yegmen ma'a ekmáxaqxo
apcháphasso nak.
18 Apméssek
agkok appeywa,
keñe elpayhekxa';
yának chá'a kaxchahá',
keñe kanyehek yegmen.
19 Cha'a apya'assásegwayam
appeywa m'a Jacob, cham'a Israel,
tén han ma'a segánamakxa
apagkok ekweykekxoho m'a
apkeltémókxa nak antéhek.
20 Metnéssessók han
pók énxet'ák xa ektáha nak,
melya'ásegko apagko' nak
ma'a apchánamakxa antéhek.
¡Aleluya!
